Ebrewita 6:1-20
6 Ape puranga yasasawana isui kua nyenga iwasuimawaa Kristu rese, tuyuwe aramana yande sese, tiarama yayumbue mukuĩsawa sasiyara arama yamanduari yanepekadu uxariwaa yakanyemu, sese yuiri kua uruyarisawa Deus rese.
2 Umbuesawa batizmu rese, yaxari yuiri yaneipu amuita rese, sese kua yapuamuwaa manusawa sui, sese yuiri umbeuwaa rupiara yanepekadu anyu aramawaa.
3 Yawe yamunya kuri, Deus uxari rame.
Yawaite tirame yaruyari
4 Nyãse tiaintaupuderi aintaumanduari sasiyara aintapuxuwerasawa mukuĩsawa kuaita ukuawaitana, kuaita usaãwaita purangawaa kua uriwaa iwaka sui, kuaita urikuita Espiritu Santu.
5 Kuaita usaãwaita purangawaa kua Deus nyenga, ikirimbawasawa yuiri kua mundu uriwaa kuri;
6 Aintauwari rame inyenga sui timaa aintaupuderi sasiyara aintaumanduari aintapuxuwerasawa, nyãse ainta supe aramate aintaunupa uyari kurusa rese kua Deus raira mukuĩsawa, aintauxari yuiri puxi aintaumaa ixupe panye.
7 Nyãse Deus uabensuari kua iwi usiki rire kua amana uwariwaa sese siya viaji, asui umusemu mitima purangawaa ainta supe arama kuaita upurakiwaita.
8 Maa umusemu rame yuu, kukuna yuiri, retentuwaa maa ae; anyunte yapuderi yambeu puxi sese, asui anyu aramawaa yasapi maa ae.
Salvasão purangawaa
9 Maa penye yagustariwaita, yambeu pukusawa penye arama kirimbawa, yakuawate perikuana kua puranga piri sese kua salvasão
10 Nyãse timaa puxi kua Deus sesarai arama isui kua pepurakiwaa, isui yuiri kua pegustarisawa, pemukamewaa aintaumaa sera rese, peajudari resewara kuera kuaita uruyariwaita, kuiri yuiri peajudari ainta.
11 Asui yaputari peyaweyawe pemukame aintaumaa kirimbawa peputari pemunya purangawaa, peiku kuri santa sese kua pesaruwaa ate anyu aramawaa.
12 Tiarama yatima peiku, pemaa arama perangawa ainta, pemunya arama kuaye aintayawe kuaita urikuwaita kua purangawaa, aintauruyari resewara aintaumuturusu resewara aintapia.
Kua Deus umbeuwaa tiutrukari
13 Asui Deus umbeu rame Abraão supe kua umbeuwaa, timaa uwasemu amu puranga piri isui umbeu arama maa sese nyenga kirimbawa piri, ape umbeu sesepawate.
14 Unyee ixupe: Supiwa, haabensuari kuri inde, hamusiya kuri nerimiariruita.
15 Asui kua Abraão umuturusu rire kua ipia, usaru, asui urikuana kua Deus umbeuwaa ixupe.
16 Nyãse kuaita apigawaita aintaumbeu nyenga kirimbawawaa sese kua puranga piri aintasui, asui aintaumbeu resewara kua nyenga kirimbawa aintaupituana aintaumbeu sese.
17 Ape Deus umbeu nyenga kirimbawa sesepawa, uputari rame umukame kuaita urikuwaita kuri kua umbeuwaa, aintaumaa tiutrukari umanduarisawa.
18 Timaa Deus upuderi uganani aintarese kuaita mukuĩwaita tiwaita utrukari, umusuuri arama yande, kirimbawa yande uputariwaita umukaturu yande, yariku arama kuri kua yasaruwaa yanerunde kitirewaa.
19 Kua yasaruwaa uxari ipuse yanepia santa, uxari yamaa yanerunde kiti, iwaka kiti,
20 Jesus usu akiti yanerunde, yaneresewara Deus uxari rire saserdutita ruixawa ae yawewarawate kuaye Melkizedeki yawe.
