Ebrewita 7:1-28
7 Nyãse kua Melkizedeki, Salem ruixawa ae, saserduti ae Deus kirimbawawaa irumu, usu usuanti kua Abraão uyuiriwaa upe uyuká rire kuaita tuixawaita, asui uabensuari ae.
2 Asui Abraão utiari Melkizedeki supe dizimu panye iyaraita suiwara. Yawesawa sera kua Melkizedeki, purangawaa ruixawa ae, asui Salem ruixawa ae yuiri, tuixawa yuiri ae uxariwaa timaarese ainta;
3 ipayaimawaa ae, imayaimawaa ae, tiyuiri uriku samunyaita, tiyuiri uriku uyupirungawa, tiyuiri upawasawa, nyãse kuaye Deus raira yawe ae, saserduti ae yawewarawate.
Puranga piri Kristu upurandu yanerese
4 Pemaa maye puranga ae, kua yaneramunya Abraão uxariwaa kuera ixupe dizimu panye iyaraita suiwara.
5 Asui kuaita Levi rimiariruita suiwara saserdutita ainta, Deus nyenga kuximawara umundu ainta aintauyuka arama miraita sui panye dizimu, aintate kuaita aintaimuita, Abraão rimiariruita yuiri.
6 Maa kua apigawa tiwa uriku samunyaita aintairumu upisika Abraão sui dizimu, asui uabensuari ae kua urikuwaa kua Deus umbeuwaa.
7 Yakuawate kua puranga piriwaa uabensuari ae kua puxuwera piriwaa isui.
8 Ike kua mundu upe kuaita apigawaita ukanyemuwaita kuri aintauyuka dizimu, maa ike yepe uyuka ae, aintaumbeuwaa sese upakate ae.
9 Yapuderi yambeu Levi rese kua uyukawaa dizimu, ae yuiri uxari dizimu samunya resewara kua Abraão.
10 Nyãse tire unaseri umaa kua mundu Melkizedeki usuanti rame samunya Abraão.
Yawewarawate upurandu yanerese
11 Aintaupuderi rame puranga ainta saserduti resewara aintarese kuaita Levi rimiariruita, nyãse arame aintaurikuana kua Deus nyenga kuximawara, ape marantaa maa upuamu amu saserduti iyawe kua Melkizedeki timaa iyawe kua Arão.
12 Nyãse aintautrukari rame saserduti aintaurikute aintautrukari yuiri kua mundusawa.
13 Nyãse kua aintaumbeuwaa sese kua nyenga, amu kiti imirasawa, tire yepe aintasuiwara kuaita upurakiwaita usapiwaa rendawa rese.
14 Yakuawate Juda mira suiwara kua yaneruixawa, tikuera Muize uxari saserdutita kuaita Juda suiwaraita.
15 Asui puranga piri yapuderi yakuawa, upuamu rame amu saserduti iyawe kua Melkizedeki;
16 Uxari ae saserduti irumu kua kirimbawasawa upakawaa tiwa upawa, timaa irumu kua Deus nyenga kuximawara mundu pura.
17 Nyãse yawe umbeu sesewara: Saserduti inde yawewarawate kuaye Melkizedeki yawe.
18 Asui umbawa kua Deus nyenga kuximawara umunduwaa, nyãse pitua ae, tenyuntu ae.
19 Nyãse kua Deus nyenga kuximawara nẽ yepe viaji umukaturu maantu. Asui uxari yande arama amu yasaru aramawaa yamaa puranga piriwaa, asui ipupe yamusuaki Deus.
Yepenyu Kristu upurandu yanerese
20 Nyãse saserduti ae Deus umbeu resewara nyenga kirimbawawaa, maa kuaita saserdutita timaa saserduti ainta, umbeu resewara nyenga kirimbawa.
21 Maa umbeu nyenga kirimbawawaa irumu ixupe, yawe unyee: Yaneruixawa umbeu kuera nyenga kirimbawa, asui tikuri utrukari umanduarisawa, saserduti inde yawewarawate.
22 Asui Jesus kua uxariwaa santa kua nyenga puranga piriwaa.
23 Siya kuera kuaita saserdutita, nyãse timaa manusawa uxari saserdutita ainta yawewarawate.
24 Maa kua Jesus saserduti ae, yawewarawate, nyãse tiwa upawa ae.
25 Ape sesewara yuiri upuderi umukaturu yepe viaji panye kuaita uriwaita Deus ipiri Kristu irumu, asui upakate ae yawewarawate upurandu arama aintarese.
26 Nyãse yaputari yepe saserdutita ruixawa iyawewaa, purangawaa, tiwa uriku ipuxuwerasawa sese, uriku umanduarisawa ikiaimawaa, uyumutirika aepawate puxuwerawaita sui, kua uikuwaa iwate piri panye iwaka sui.
27 Timaa resewara umunya aintayawe kuaita amuita saserdutita ruixawaita, uyuká arama nimbawa ara yaweyawe ipekadu resewara, aintapekadu resewara yuiri kuaita miraita; nyãse umunyana ae anyu aramawaa uyuxari rame aepawate pekadu resewara.
28 Nyãse kua Deus nyenga kuximawara uxari saserdutita ruixawaita kuaita apigawaita pituawaita, maa kua nyenga kirimbawawaa uriwaa Deus nyenga kuximawara rakuera uxari saserduti Taira kua uxariwaa puranga ae yawewarawate.
