Ebrewita 9:1-28
9 Asui kua uyupiruwaa kuera umbeu uxari aintaumanduari Deus, uxari yuiri aintaumunya suka arama kua mundu upe.
2 Asui aintaumunya Deus ruka, asui aintaumunya yepe sala turusuwaa, serawaa purangawaa, uikuwaa ape kua turi uikuwaa rendawa, asui yepe meza yuiri uyenu rendawa kua pão.
3 Asui senunde kiti kua veu, uiku yepe sala kua Deus ruka serawaa puranga purangawaa.
4 Apete kua aintausapiwaa rendawa uru suiwara aintausapi arama insensu, asui kua kaxa Deus umbeuwaa uikuwaa rendawa aintapupekawa uru irumu, asui kaxa upe yepe siru uru suiwara ipura serawaa mana, asui kaxa upe yuiri kua Arão mirai umpisasuawaa, asui kaxa upe yuiri kuaita itaita Deus umpinima sese kua nyenga umbeuwaa.
5 Asui kaxa tampa iarupi kuaita kerubim aintausuanti kua aintauyusenawaa nimbawa ruwi, aintausaruwaa ipupe pirasua arama Deus umaa ainta kuaita miraita. Kuiri timaa yapuderi yambeu penye arama aintarese aintayaweyawe.
6 Asui aintaumunya rire panye kua, panye kuaita saserdutita aintauwike yawewarawate Deus ruka purangawaa upe, aintaumunya arama aintamuraki purangawaa.
7 Maa yepe viajinyu kua saserdutita ruixawa uwike akayu yaweyawe ipupe kua sala puranga purangawaa, asui urasu irumu nimbawa ruwi uxari arama Deus supe ae, ipuxuwerasawa resewara, aintapuxuwerasawa resewara yuiri kuaita miraita, aintaumunyawaa tipukusaware aintaukuawa ainta.
8 Asui irumute kua Espiritu Santu uxari aintaukuawa tire aintarapee uyupirari aintauwike arama ipupe kua sala puranga purangawaa, aikue pukusaware kua sala purangawaa.
9 Kua yawesawa kua mundu kuiriwara. Asui kua yawewaa uxari yakuawa aintauxari Deus supe uferta, nimbawa aintausapiwaita yuiri, maa timaa aintaupuderi aintaumukaturu aintaumanduarisawa kuaita umanduariwaita ae.
10 Nyãse anyunte aintaumbeu timbiu rese, uu aramawaa rese yuiri, aintaumbeu yuiri maitaa yamuyasuka yanepira, kua nyenga anyunte umbeu mayetaa yanepira rese, asui usasawa kuri kua umbeuwaa utrukari rameana kuri ae.
Yepe viajite upurara yaneresewara
11 Maa Kristu uri rame kuera kuaye saserdutita ruixawa yawe sese kua purangawaa umunyawaa ipupe kua Deus ruka turusupiriwaa, puranga piriwaa, kua tiwa yamunya yaneipu irumu, tiwa kua mundu pura ae.
12 Asui uwike ipupe kua sala puranga purangawaa anyu aramawaa, timaa urasu irumu nimbawa ruwi, maa suwi irumu pawate uyurawa arama yande anyu aramawaa.
13 Aintaumukaturu rame maa kuaita puxuwerawaita aintauyusena resewara aintarese nimbawa ruwi, aintaumukukui resewara yuiri aintarese nimbawa sinza kuera;
14 Puranga piri kuri suwi kua Kristu, kua uyuxariwaa simutara Deus supe ikiaimawaa yawe Espiritu irumu, umuyasuka kuri yamanduarisawa isui kuaita uxariwaa umanu yande, yapuraki arama ixupe kua Deus upakawaa.
15 Ape aete kua umusasawa kua umbeuwaa pisasua aintauriku arama kuri kua uxariwaa ainta supe tiwa upawa kua umbeuwaa, nyãse umanu yepe uyurawa arama ainta aintapuxuwerasawa sui kua aintaumunyawaa umbeuwaa kuximawara rese.
16 Aikue rame yepe umbeuwaa timaa arama ae tiramere yakuawa supiwa umanu ae.
17 Nyãse anyunte kirimbawana umbeuwaa kuera umanu rire ae, nyãse timaa arama ae upaka ramere kua umbeuwaa ae.
18 Ape kua uyupiruwaa umbeu tikuerare santa ae senundere aintaumburi tuwi;
19 Asui Muize umbeu rire panye kua Deus umbeuwaa ainta supe kuaita miraita panye, asui upisika nimbawa ruwi ii irumu, upisika yuiri uvelya rawa pirangawaa, asui upisika yuiri isupu, asui uyusena livru rese panye miraita rese yuiri.
20 Asui unyee: Kua tuwi aete uxariwaa santa kua Deus umbeuwaa penye arama.
21 Asui yawete yuiri uyusena tuwi panye Deus ruka rese, aintarese yuiri panye kuaita siruita ipupe aintaupuraki Deus supe.
22 Nyãse Deus nyenga kuximawara rese kuaji panye maantu aintaumukaturu tuwi irumu, asui tirame aintaumburi tuwi, tiyuiri umburi aintasui aintapuxuwerasawa.
Tiwa upawa Kristu umunyawaa
23 Ape aintaurikute aintaumukaturu ainta yawewaa irumu kuaita iwaka upewaraita rangawa, maa kuaita iwaka upewaraita puranga aintairumu kua puranga piriwaa aintasui.
24 Maa timaa Kristu uwike Deus ruka upe kua aintaumunyawaa aintaipu irumu, maa uwike iwaka kiti uiku arama yaneresewara Deus runde kiti.
25 Timaa uwike uxari arama maa aepawate siya viaji, aintayawe kuaita saserdutita ruixawa uwike muiri akayu ipupe kua sala puranga purangawaa tuwi irumu tiwa iyara;
26 Nyãse kuaye rame maa ae, ape maa urikute upurara siya viaji uyupirungawa suiwara. Maa kuiri uri yepe viajite sangawa upe, umburi arama aintapekadu uyuxari resewara aepawate.
27 Asui yawete aintaurikute aintaumanu arama ainta yepe viajite kuaita apigawa, asui arirewara umbeu aintapekadu.
28 Yawete yuiri kua Kristu uxari rire aepawate yepe viaji anyu aramawaa umburi arama aintapekadu kuaita siyawaita, uri kuri mukuĩsawa timaa umburi arama aintapekadu, maa umukaturu arama ainta kuaita usaruwaita ae umukaturu arama ainta.
