Filemum 1:1-25
1 Ixe Paulu aintaumprezu ixe Kristu Jesus resewara, ae yuiri yanemu Timuteu, inde arama inde Filemum yagustariwaa, uajudarisara yande;
2 Ixupe yuiri kua yanerendira Afia, Arkipu yuiri, kua upurarawaa yaneirumu, ainta supe yuiri kuaita ingreja supe aramawaita neruka upe.
3 Haputari Deus purangasawa, itimaaresesawa yuiri uiku peirumu, kua umeewaa yande arama kua yanepaya, yaneruixawa Jesus Kristu yuiri.
Umbeu purangawaa Filemum rese
4 Asui hapurandu irumu Deus hamanduari inde yawewarawate, asui hamee purangawaa Deus supe.
5 Nyãse hasendu neresewara regustari puranga, reruyari yuiri puranga yaneruixawa Jesus, aintayuiri kuaita panye uruyariwaita.
6 Asui hapurandu Deus irumu uxari arama aintaukuawa panye kua purangawaa yanerese yarikuwaa Kristu rese, aintauruyari resewara yepewasu neirumu.
7 Nyãse turusu remusuuri ixe neirumu, inde semu regustari resewara ainta puranga, nyãse neresewara suuri aintapia kuaita uruyariwaita.
Umbeu puranga Unezimu rese
8 Ape hapuderi rame maa hamundu inde Kristu rese remunya arama kua watariwaa,
9 Maa haputari hapurandu gustarisawa resewara, nyãse ixe Paulu tuyuweana ixe, asui prezu ixe Kristu Jesus resewara;
10 Hapurandu inde sesewara kua seraira Unezimu, ipayana ixe Deus rese, prezu pukusawa ixe.
11 Kuxima timaa uajudari inde, maa kuiri uajudari inde, ixe yuiri.
12 Kuiri hamundu uyuiri nepiri, mukuĩsawa, yawesawa urasu ixe irumu.
13 Haputari uiku seirumu uajudari arama ixe nerikuyara prezu ramere ixe, sesewara kua nyenga purangawaa.
14 Timaa nungara haputari hamunya nesui, yawaite hafursari inde remunya arama ixe arama puranga, asui timaa remunya ixe arama puranga nepia suintu.
15 Nyãse hamanduari uikure nesui kutarantu, uyuiri arama uiku neirumu yawewarawate.
16 Uri nepiri timaa inde aramawaa yawe, maa uri puranga piri isui; uri kuaye yanemu yaputariwaa yawe, nyãse yawe hamaa ae; asui inde yuiri kuri remaa ae nemu yawe, nemu yawe yuiri Kristu rese.
17 Ape remaa rame ixe nerumuara yawe, resuanti ae kuaye resuantiwaa yawe ixe.
18 Asui umunya rame inde arama puxi, u udeveri inde arama, haputari remburi ae sekunta upe.
19 Ixe Paulu hampinima kua papera seipu irumu; hapagari kuri ae, maa timaa hambeu inde arama redeveri ixe panye indepawa.
20 Inde semu, haputari hawasemu neirumu kua purangawaa Kristu rese. Haputari remusuuri sepia Kristu rese.
Kuekatu
21 Hakuawate supiwa, reruyari kuri ixe, ape hampinima inde arama hakuawa irumu remunya kuri ixe arama turusu xinga isui kua hapuranduwaa neirumu.
22 Asui haputari yuiri remukaturu serunde hakiri rendawa, nyãse hasaru Deus rese hamaa yuiri nepiri, nyãse turusu pepurandu Deus serese.
23 Kua Epafra, aintaumprezuwaa seirumu Kristu Jesus resewara umundu inde arama kuekatu.
24 Aintaumundu yuiri inde arama kuekatu kuaita uajudariwaita ixe, panye Marku, Aristarku yuiri, Dema yuiri, asui Luka yuiri.
25 Kuiri yaneruixawa Jesus Kristu purangasawa uiku pepia upe.
