Galasiawaraita 2:1-21
2 Asui katurzi akayu rire hasu yuiri Jeruzalẽ kiti Barnabe irumu asui Titu yuiri usu yaneirumu.
2 Deus umundu hasu akiti, asui hambeu ainta supe kuaita serakuenawaita kua nyenga purangawaa hambuewaa aintapiterupi kuaita tiwaita judewita, yawaite aintaumanduari retentu kua hambuewaa.
3 Maa timaa aintauputari aintausirkunsidari kua Titu serumuara nyãse greguwaa ae.
4 Kuaye aintauputari kuaita uruyariwaita gananisawa uwikewaita uyumimisawa aintaupukuari arama yande nyenga kuximawara upe, nyãse Kristu Jesus uyurawa yande isui.
5 Tiyasendu ainta supe arama nẽ kuaira, nyãse yaputari kua nyenga supiwa uiku santa pepiterupi.
6 Asui kuaita umanduariwaita serakuenawaita ainta, timaa arama aintaumbue ixe, timaa arama ixe arama awataa ainta, nyãse timaa Deus uparawaka umaa miraita, yawe hanyee aintarese kuaita umanduariwaita serakuenawaita ainta.
7 Maa aintaumaa irumu harikute hambue kua nyenga purangawaa ainta supe kuaita mundu puraita tiwaita usirkunsidariwaita, asui Pedru urikute umbue kuaita usirkunsidariwaita.
8 Nyãse kua upurakiwaa kirimbawa Pedru ipia upe umbue arama kuaita usirkunsidariwaita, upuraki yuiri sepia upe hambue arama kuaita tiwaita judewita.
9 Asui aintaumaa irumu Deus uxari ixe arama ipurangasawa, Tiagu supe yuiri, Sefa supe yuiri, Juão supe yuiri kuaita uikuwaita santa aintairumu, asui aintaupisika seipu rese Barnabe ipu yuiri aintaumukame yepewasu yande, asui aintauxari yasu yambue kuaita tiwaita judewita, asui ainta aintausu aintaumbue kuaita uyusirkunsidariwaita.
10 Asui yepewasu aintauputari yamanduari kuaita pirasuawaita, asui suuri hamanduari ainta.
Puranga Deus umaa yande yaruyari resewara
11 Asui Sefa usika irumu Antiukia kiti hapuamu suaxara nyãse timaa umunya puranga.
12 Nyãse umbau tiwaita judewita irumu senundere aintauri kuaita yepeyepe aintasuiwara kuaita Tiagu sumuaraita, maa aintausika irumu uyuiri aintasui nyãse usikie aintasui kuaita usirkunsidariwaita.
13 Asui kuaita amuita judewita mukuĩ aintaumanduarisawa irumu, asui ae yuiri kua Barnabe mukuĩ umanduarisawa aintayawe.
14 Maa hamaa irumu timaa aintauiku satambika sese kua nyenga supiwa umbeuwaa kua nyenga purangawaa, asui hambeu Sefa supe aintaumaawaa upe panye:
—Inde judeu, reiku rame aintayawe kuaita tiwaita judewita, timaa aintayawe kuaita judewita. Ape maitaa repuderi remundu kuaita tiwaita judewita aintauiku arama kuaye aintayawe kuaita judewita?
15 Judewita isui yasemu yamaa kua ara, timaa tiwaita judewita puxuwerawaita yande.
16 Maa yakuawate timaa purangawaa yawe Deus umaa kuaita apigawaita aintaumunya resewara kua Deus nyenga kuximawara umbeuwaa, maa yaxari resewara yanepia Kristu Jesus rese. Yande yuiri yaxariana yanepia Kristu Jesus rese purangawaa yawe umaa yande yaruyari resewara Kristu; timaa yamunya resewara Deus nyenga kuximawara umbeuwaa, nyãse tiawa puranga yawe Deus umaa ae umunya resewara kua Deus nyenga kuximawara umbeuwaa.
17 Asui yaputari irumu puranga Deus umaa yande Kristu resewara, anyunte yayumukame puxuwerawaita yande. Maitaa Kristu umunya ipekadu yaneirumu? Umbaa, tiumunya.
18 Maa hasupiri rame yuiri kua hamburiwaa kuera anyunte hayumukame puxuwerawa ixe.
19 Nyãse umanuwaa ixe isui kua Deus nyenga kuximawara irumu kua Deus nyenga kuximawara hapaka arama ixe Deus supe arama. Kuxima hamanu ixe Kristu irumu kurusa rese.
20 Ape timaa upakawaa ixe maa upakawaa Kristu sepira upe, asui hapaka ramere ixe sepira upe upaka ixe haxari resewara sepia Deus raira rese kua uyuxari seresewara simutara.
21 Timaa hamutenyuntu Deus purangasawa. Nyãse puranga rame yande Deus umaa Deus nyenga kuximawara resewara ape maa retentu maa umanu kua Kristu.
