Galasiawaraita 3:1-29
3 Penye Galasiawaraita tiwaita pekuawa. Awataa uganani penye? Penye hamukame pemaa Jesus Kristu kua aintaumuyariwaa kurusa rese.
2 Yepenyu haputari hakuawa peirumu. Maitaa periku kua Espiritu pemunya resewara Deus nyenga kuximawara umbeuwaa? U tiserá periku ae peruyari resewara kua nyenga purangawaa?
3 Maitaa tiwaita ukuawa penye? Peyupiru puranga penye Espiritu irumu, maitaa kuiri peputari peyumukaturu pekuawasawa irumu.
4 Maitaa tenyuntuwara resewara pepurara turusu, tenyuntuwara rame ae.
5 Asui kua uxariwaa penye arama kua Espiritu, kua umunyawaa tiwaita yamunya pepiterupi, maitaa umunya ae umunya resewara Deus nyenga kuximawara umbeuwaa u yambue resewara kua yaruyariwaa?
Abraão uruyari puranga
6 Yawete yuiri Abraão, uxari ipia Deus rese ape purangawaa Deus umaa ae.
7 Ape pepuderi pekuawa Abraão rairaita kuaita uruyariwaita.
8 Deus nyenga umbeu Deus kuri umaa purangawaa yawe kuaita tiwaita judewita aintauxari resewara aintapia sese, asui umbeu kuera Abraão supe kua nyenga purangawaa: “Neresewara kuri hawabensuari panye kuaita miraita.”
9 Ape irumu kua uruyariwaa Abraão uabensuari kuri panye kuaita uxariwaita aintapia sese.
10 Puxuwera kuri panye kuaita uxariwaita aintapia sese kua aintaumunyawaa Deus nyenga kuximawara rese, nyãse aintaumpinima: “Puxi kuri panye kuaita tiwaita uiku santa sese panye kua aintaumpinimawaa livru upe Deus nyenga kuximawara rese, umunya arama ainta.”
11 Ape yakuawa tiawa puranga Deus umaa ae Deus nyenga kuximawara resewara, nyãse yawe aintaumpinima: “Upakate kuri kua purangawaa Deus umaa ae uxari resewara ipia sese.”
12 Timaa uruyarisawa resewara kua Deus nyenga kuximawara, maa aintaumpinima ae: “Upakate kuri Deus nyenga kuximawara resewara kua umunyawaa panye umbeuwaa.”
13 Kuxima Kristu uyurawana yande isui kua puxuwerawa Deus nyenga kuximawara umbeuwaa puxuwerawa yawe arama yaneresewara ae, nyãse kuxima aintaumpinima: “Puxuwerawa panye aintaumuyariwaa uyari mirá rese.”
14 Kristu Jesus uabensuari arama kuaita tiwaita judewita kuaye uabensuari yawe kua Abraão, asui yaruyari resewara yariku kua Espiritu umbeuwaa.
Deus umbeuwaa uiku santa
15 Kuiri hambeu penye arama apigawa ukuawasawa irumu, penye semuita, tiawa umutenyuntu amu nyenga umbeu rireana ae tiyuiri umbeu sesewara.
16 Kua Deus umbeuwaa Abraão supe arama, ximiariru supe arama yuiri. Timaa umbeu ximiariruita supe arama siyawaita, maa yepenyu: “Nerimiariru supe arama, aete kua Kristu.”
17 Yawesawa kua hambeu, kua Deus nyenga kuximawara uriwaa kuatrusentu trinta akayu Deus umbeuwaa rire, timaa upuderi umutenyuntu ae tenyuntuwara arama kua umbeuwaa.
18 Yariku rame purangawaa Deus irumu Deus nyenga kuximawara resewara ape timaa yariku ae umbeuwaa resewara, maa yariku purangawaa irumu sesewara kua Deus umbeuwaa Abraão supe prezenti yawe.
19 Ape marantaa kua Deus nyenga kuximawara? Uxari ainta supe arama ae aintapuxuwerasawa uiku arama aintarese ate uri irumu kua urikuwaa kua umbeuwaa, kuaye aintauxariwaa kuaita anjuita irumu kua umusasawa inyenga.
20 Siya kuaita umusasawa inyenga, maa yepenyute kua Deus.
21 Maitaa Deus nyenga kuximawara umuruanyana Deus nyenga? Umbaa. Uxari rame yande arama amu inyenga uxari yapaka yande, ape purangawaa yawe umaa yande supiwa Deus nyenga kuximawara resewara.
22 Maa Deus nyenga uxari yakuawa puxuwerawaita muiri yande aintauriku arama umbeuwaa aintauxari resewara aintapia Jesus Kristu rese kuaita uruyariwaita.
Deus nyenga kuximawara umbue yande
23 Kuxima yaiku santa Deus nyenga kuximawara rese senundere uruyarisawa uri, senundere kua uruyarisawa umukamewaa kuri yamaa.
24 Ape Deus nyenga kuximawara umbue yande ate uri rame kua Kristu purangawaita umaa yande yaxari resewara yanepia sese.
25 Maa uri rireana kua uruyarisawa tiana Deus nyenga kuximawara umbue yande.
26 Nyãse Deus rairaita penye panye pexari resewara pepia Kristu Jesus rese.
27 Nyãse muiri penye peyubatizari Kristu rese pemuwikeana Kristu upe.
28 Ape tiyamaa judeu, nẽ gregu yuiri, nẽ apigawa supe aramawaa, nẽ yamaa yepe tiwa apigawa supe aramawaa, tiyuiri yamaa apigawa, nẽ kunya, nyãse yepewasu arama penye panye Kristu Jesus rese.
29 Asui Kristu supe aramawaita penye, Abraão rimiariruita penye yuiri, asui penye arama yuiri kua umbeuwaa.
