Juão 13:1-38
13 Asui festa paskua runde Jesus ukuawa usikana sangawa uyuiri arama kua mundu sui ipaya piri, kuaye ugustariwaa yawe kuaita iyaraita yawete yuiri ugustari ainta ate anyu aramawaa ara upe.
2 Asui aintaumbau irumu Yurupari uwikeana ipia upe kua Juda Iskariute kua Simão raira usikari arama uentregari Jesus,
3 Jesus ukuawana ipaya uxariana panye maa ipu upe ukuawate uri Deus sui asui uyuiri arama Deus ipiri.
4 Asui Jesus upuamu meza sui asui umusaka isui ipupekawa asui upukuari yepe tualya ikuwa upe.
5 Asui uyusena basia upe asui uyupiru umuyasuka aintaipi kuaita umbuewaita asui umutikanga ainta tualya irumu kua upukuariwaa ikuwa upe.
6 Asui uri Simão Pedru ipiri, asui Pedru unyee ixupe:
—Seruixawa, maitaa remuyasuka seipi.
7 Asui Jesus unyee ixupe:
—Tirekuawa mayesawataa kuiri kua hamunyawaa maa arire kuri rekuawa.
8 Asui Pedru unyee ixupe:
—Nunka kuri remuyasuka seipi. Asui Jesus unyee ixupe:
—Tirame hamuyasuka neipi tikuri maa reriku seirumu.
9 Asui Simão Pedru unyee ixupe:
—Seruixawa, tiseipinyu remuyasuka maa remuyasuka seipu seakanga yuiri.
10 Asui Jesus unyee ixupe:
—Awa uyasukana tiana uputari umuyasuka anyunte umuyasuka ipi nyãse ikiaimawaa panye ipira. Ikiaimawaita penye maa timuiri penye.
11 Nyãse ukuawate awataa kua umuentregari aramawaa ae, sesewara umbeu timaa ikiaimawaita muiri penye.
Uxari maitaa yamanduari arama
12 Asui umuyasuka rire aintaipi umundeu yuiri ipupekawa, uwapika yuiri aintairumu meza ruaki unyee ainta supe:
—Maitaa pekuawate mayesawataa kua hamunyawaa penye arama?
13 Peseruka ixe, inde rembuewaa yande, inde yaneruixawa, supiwa peseruka ixe nyãse ixete ae.
14 Ape hamuyasuka rame peipi ixe peruixawa ixe umbuesara penye yawete yuiri perikute pemuyasuka perumuaraita ipi.
15 Nyãse hamukameana pemaa puranga pemunya arama kuri kuaye hamunyawaa yawe.
16 Supiwa hambeu penye arama:
—Umbaa suixawa iara kiti piriwaa kua upurakiwaa ixupe, tiyuiri iara kiti piriwaa kua umunduwaa isui kua umunduwaa ae.
17 Pekuawa rame mayesawataa kua hambeuwaa suuri kuri penye pemunya rame ae.
18 Tihambeu peresewara panye, maa hakunyeseri kuaita haparawakawaita, maa hambeu ae aintaumunya arama kuaye Deus nyenga umbeuwaa yawe, kua umbauwaa seirumu pão upuamu seruaxara upiru arama ixe.
19 Kuiri hambeu penye arama yawewaa senundere usasawa peruyari arama kuri ixete ae mairame kuri pemaa usasawa.
20 Supiwa hambeu penye arama:
—Awa ureseberi kua hamunduwaa ureseberi kuri ixe, asui awa ureseberi ixe ureseberi yuiri kua umunduwaa ixe.
Umuyukuawa kua uentregariwaa ae
21 Asui Jesus umbeu rire kua inyenga sasiyara ipia asui unyee:
—Supiwa hambeu penye arama yepe pesuiwara uentregari kuri ixe seruanyanaita supe.
22 Asui kuaita umbuewaita aintauyumaa nyãse tiaintaukuawa awa resetaa umbeuwaa.
23 Asui kuayentu uwapika Jesus ruaki yepe umbuewaa kua ugustariwaa.
24 Asui Simão Pedru umukataka iakanga unyee ixupe:
—Repurandu yasendu awa resetaa umbeu.
25 Asui kua umbuewaa uwapika kuayentu Jesus ruaki upurandu ae:
—Seruixawa, awataa ae?
26 Asui Jesus usuaxara ae, unyee:
—Aete kua hameewaa ixupe pão hamururuwaa. Asui umururu rire kua pão umee ixupe ae kua Juda taira kua Simão Iskariute.
27 Asui arire kua pão Yurupari uwike ipia upe. Asui Jesus unyee ixupe:
—Kutara remunya kua reputariwaa remunya.
28 Maa tiawa aintasuiwara kuaita uwapikawaita meza ruaki ukuawa mayesawataa kua umbeuwaa.
29 Amuita umanduari Jesus uputari umbeu Juda supe, resu repiripana kua watariwaa festa rupiara u umundu umee arama pirasuawaita supe arama, nyãse aete usarusara aintadinyeru.
30 Asui upisika rire kua pão usu uka sui.
31 Asui Juda usemu rire uka sui Jesus unyee ainta supe:
—Kuiriana aintaumee purangawaa sesewara kua unaseriwaa umaa kua mundu asui sesewara yuiri aintaumee purangawaa Deus supe.
32 Aintaumee rame purangawaa Deus supe sesewara ape kuri Deus uxari aintaumee purangawaa sesewarapawate, kuiri kuri umunya ae.
33 Setainaita, kutarantuana haiku peirumu. Maye hambeuwaa ainta supe arama kuaita judewita yawete yuiri hambeu penye arama kuiri, pesikari kuri ixe maa tikuri pepuderi pesu hasuwaa akiti.
34 Haxari penye arama yepe nyenga pisasuwaa, peyugustari arama kuri. Kuaye hagustariwaa yawe penye yawete yuiri peyugustari kuri.
35 Peyugustari rame puranga aintaukuawa kuri panye kuaita miraita hambuewaita penye.
Pedru uyumimi kuri Jesus resewara
36 Asui Simão Pedru unyee ixupe:
—Seruixawa, maa kititaa resu? Asui Jesus usuaxara ae:
—Tirepuderi resu serakakuera hasuwaa akiti kuiri, maa arire kuri resu kuri serakakuera.
37 Asui Pedru unyee ixupe:
—Seruixawa, marantaa tihapuderi hasu nerakakuera kuiri? Maa hamanu kuri neresewara.
38 Asui Jesus usuaxara ae unyee:
—Maitaa kuri remanu seresewara? Supiwa hambeu inde arama, musapiri viaji kuri reyumimi seresewara senundere galu unyengari.
