Juão 18:1-40
18 Asui Jesus umbeu rire kua inyenga usu umbuewaita irumu igarape ruaxara kiti serawaa Sedrum, asui usu kaa kiti umbuewaita irumu.
2 Asui kua Juda kua umuentregariwaa suanyanaita supe ae ukuawate maa kiti usu nyãse siya viaji usu akiti umbuewaita irumu.
3 Asui Juda urasu kuaita suraraita aintaumunduwaita kuaita saserdutita ruixawaita farizewita yuiri urasu yuiri yepeyepe guardaita, asui usu Jesus uikuwaa akiti, aintaurasu siya turi aintaurasu yuiri aintauyuká aramawaa ipupe.
4 Asui Jesus ukuawana panye kua uriwaa sese usu aintaruaxara unyee ainta supe:
—Awataa pesikari?
5 Asui aintaunyee ixupe:
—Yasikari Jesus kua Nazare suiwara. Asui Jesus unyee ainta supe:
—Ixete kua. Asui kua Juda umuentregariwaa ae aikue aintairumu yuiri ae.
6 Asui Jesus umbeu irumu ainta supe ixete, aintauyuiri aintarakakuera kiti aintauwari iwi kiti.
7 Asui Jesus upurandu yuiri ainta, unyee:
—Awataa pesikari? Asui aintausuaxara ae aintaunyee:
—Yasikari Jesus kua Nazare suiwara.
8 Asui Jesus unyee ainta supe:
—Hambeuwana penye arama ixete, pesikari rame ixe pexari aintausu kuaita apigawaita.
9 Yawe umbeu usasawa arama kua nyenga umbeuwaa, nẽ yepe uyusupari sesui aintasuiwara kuaita rexariwaita ixe arama.
10 Asui Simão Pedru usiki iespada siru sui kua urasuwaa unupa kua saserdutita ruixawa ixupe aramawaa asui umunuka inambi katusawa banda sui, sera Malku kua saserdutita ruixawa ixupe aramawaa.
11 Maa Jesus unyee Pedru supe:
—Remuyuiri neespada siru kiti, maitaa tiserá hau kua kupu sepaya uxariwaa ixe arama.
Aintaupisika aintaupukuari Jesus
12 Asui kuaita suraraita aintakapitãoita yuiri kuaita guardaita yuiri aintaupisika Jesus aintaupukuari ae.
13 Asui aintauyupiru aintaurasu ae Anaa ipiri nyãse Kaifa ratiwa ae kua saserdutita ruixawa nyã akayu upe.
14 Kaifa unyee ainta supe kuaita judewita:
—Purangate yepe apigawa umanu aintaresewara kuaita miraita panye.
Pedru uyumimi Jesus resewara
15 Asui Simão Pedru asui amu yuiri Jesus umbuewaa aintausu Jesus rakakuera. Kua saserdutita ruixawa ukunyeseri kua yepe Jesus umbuewaa uwikewaa sala piterupi Jesus irumu.
16 Maa Pedru upuamu ukara kiti ukena ruaki. Asui kua yepe Jesus umbuewaa kua saserdutita ruixawa ukunyeseriwaa usu ukara kiti upurungita irumu kua kunya usaruwaa ukena asui ururi Pedru uka kiti.
17 Asui kua kunya usaruwaa ukena upurandu Pedru unyee:
—Maitaa tiserá inde aintarumuara kuaita umbuewaita kua apigawa? Asui unyee:
—Umbaa ixe.
18 Asui kuaita upurakiwaita guardaita yuiri aintaumunya tata nyãse irusanga ae, asui aintauyumuaku tata. Asui Pedru uwapika aintapiterupi uyumuaku tata yuiri.
Anaa upurandu Jesus
19 Asui kua saserdutita ruixawa upurandu Jesus aintarese kuaita umbuewaita sese yuiri kua umbuewaa.
20 Asui Jesus unyee ixupe:
—Hambue uyukuawasawa upe kuaita mundu puraita, yawewarawate hambue ainta sinaguga upe templu upe yuiri aintauyumuatiriwaa upe kuaita judewita, timaa nungara hambeu yumimisawa upe.
21 Marantaa repurandu ixe? Repurandu resendu kuaita usenduwaita ixe sese kua hambeuwaa, aintaukuawate sese kua hambeuwaa.
22 Umbeu irumu kua inyenga yepe guarda apewara unupa Jesus ipu irumu, unyee:
—Maitaa yawe renyee ixupe arama kua saserdutita ruixawa?
23 Asui Jesus usuaxara ae, unyee:
—Hambeu rame puxi rembeu ixe arama, hambeu rame supiwa marantaa renupa ixe?
24 Asui Anaa umundu ae aintaupukuari pukusaware ae Kaifa ipiri amu saserdutita ruixawa.
Pedru uyumimi yuiri Jesus resewara mukuĩ viaji
25 Apete Simão Pedru uiku uyumuaku tata. Asui aintaunyee ixupe:
—Maitaa indete aintasuiwara kuaita umbuewaita? Asui uyumimi sesewara unyee:
—Umbaa ixe.
26 Asui yepe saserdutita ruixawa ixupe aramawaa ianama kua Pedru umunukawaa inambi upurandu ae, unyee:
—Umbaa será indete hamaawaa irumu kaa kiti?
27 Asui Pedru uyumimi yuiri sesewara, asui aramete galu unyengari.
Jesus upuamu Pilatu runde sui
28 Asui arire aintaurasu Jesus Kaifa ruka sui Pilatu ruka kiti sera preturiu. Kuemana ainta. Maa tiaintauwike preturiu kiti yawaite aintaumuaiwa aintamanduarisawa, nyãse aintauyumukaturu aintaumbau arama paskua.
29 Asui Pilatu usemu aintaruaxara uka sui upurungita arama aintairumu unyee:
—Maataa pepurungita puxi sese kua apigawa?
30 Asui aintaunyee ixupe arama:
—Tirame maa puxuwerawa ae timaa yaruri inde arama ae.
31 Asui Pilatu unyee ainta supe:
—Pepisika ae penyepawate pembeu ipuxuwerasawa maye Muize nyenga umbeuwaa yawe. Asui kuaita judewita aintaunyee ixupe:
—Tiyapuderi yayuká yepe pesua.
32 Yawe aintaunyee, aintaumunya arama kuaye Jesus umbeuwaa yawe umbeu irumu ainta supe mayetaa kuri umanu arama ae.
Pilatu upurandu Jesus
33 Asui Pilatu uwike yuiri preturiu kiti asui usenui Jesus ipiri unyee ixupe arama:
—Maitaa judewita ruixawa inde?
34 Asui Jesus usuaxara ae, unyee:
—Maitaa nerimutara repurandu u amuita umbeu inde arama seresewara?
35 Asui Pilatu unyee:
—Umbaa judeu ixe. Kuaita nemiraita kuaita saserdutita ruixawaita yuiri aintauentregari inde ixe arama. Maataa remunyawaa?
36 Asui Jesus usuaxara ae unyee:
—Timaa aintaruixawa ixe kua mundu upe, aintaruixawa rame maa ixe ike kua mundu upe semiraita aintaumaramunya tiarama aintauentregari ixe judewita supe arama. Timaa aintaruixawa mundu pura ixe.
37 Asui Pilatu upurandu ixupe:
—Supiwa aintaruixawa inde? Asui Jesus usuaxara ae unyee:
—Indete rembeu aintaruixawa ixe, sesewara hanaseri, sesewara yuiri hayuiri kua mundu kiti hambeu arama sesewara kua supiwa. Panye kuaita supiwaita aintausendu senyenga.
38 Asui Pilatu upurandu ae:
—Maataa kua supiwa? Unyee rire yawe usemu ukara kiti aintapiri kuaita judewita, asui unyee ainta supe:
—Tihawasemu puxuwerasawa sese.
39 Aikue pekustumi hayurawa arama penye arama yepe apigawa paskua rame; maitaa peputari hayurawa penye arama kua judewita ruixawa?
40 Asui aintausasemu yuiri ixupe, aintaunyee:
—Tiyaputari ae maa yaputari Baraba. Mundawasu kua Baraba.
