Juão 20:1-31
20 Asui kuemaite mitu rame Maria Madalena usu iwi kuara kiti asui umaa aintaumutirikana isui kua ita.
2 Asui uyuiri uyana Simão Pedru piri, ipiri yuiri kua amu Jesus umbuewaa ugustariwaa, unyee ainta supe:
—Aintauyuka yaneruixawa iwi kuara sui tiyakuawa maa kititaa aintauxari ae.
3 Asui Pedru usemu ukara kiti irumu kua amu umbuewaa, asui aintausu iwi kuara kiti.
4 Asui aintauyana kuaita mukuĩwaita, maa kua amu umbuewaa uyana Pedru runde asui ae usika primeru iwi kuara kiti.
5 Asui uyawika umaa iwi kuara kiti asui umaa kua fazenda, maa tiuwike iwi kuara kiti.
6 Asui Simão Pedru usika sakakuera asui uwike iwi kuara kiti, asui umaa kua fazenda,
7 Asui umaa kua lensu uikuwaa Jesus iakanga rese uiku amu kitiana fazenda sui.
8 Asui kua umbuewaa usikawaa primeru iwi kuara kiti uwike yuiri asui umaa supiwa asui uruyari ae.
9 Nyãse tire aintaukuawa mayesawataa kua Deus nyenga umbeuwaa, urikute upuamu manusawa sui.
10 Asui kuaita umbuewaita aintauyuiri uka kiti.
Maria Madalena umaa Jesus
11 Maa Maria uikure iwi kuara rukena ruaki, uyaxiu uiku. Asui uyaxiu irumu uyawika umaa iwi kuara kiti.
12 Asui umaa mukuĩ anjuita murutingawaa aintarupa, aintauwapika Jesus ipira uikuwaa kuera akiti, yepe uwapika iakanga sui amu uwapika ipi banda sui.
13 Asui aintaupurandu ae:
—Kunya marantaa reyaxiu? Asui usuaxara ainta, unyee:
—Aintaurasu seruixawa tihakuawa maa kititaa aintauxari ae.
14 Asui umbeu irumu yawe uyereu umaa Jesus upuamu, maa tiukuawa Jesus ae.
15 Asui Jesus unyee ixupe:
—Kunya marantaa reyaxiu? Awataa resikari? Asui umaite usaruwaa iwi kuara ae, unyee ixupe:
—Hasikari seruixawa, rerasu rame ae rembeu hasendu mametaa rexari ae harasu arama kuri ae.
16 Asui Jesus unyee ixupe:
—Maria. Asui uyereu unyee ixupe ebrewita nyenga rupi, rabuni, yawesawa umbuesara ae.
17 Asui Jesus unyee ixupe:
—Terepisika ixe, nyãse tire hasu sepaya ipiri, maa resu seanamaita ipiri rembeu ainta supe arama, hasu sepaya ipiri pepaya ipiri yuiri, hasu seDeus ipiri peDeus ipiri yuiri.
18 Asui Maria Madalena usu umbeu ainta supe kuaita umbuewaita:
—Hamaawana yaneruixawa! Asui umbeu ainta supe arama panye umbeuwaa ixupe.
Umbuewaita umaa ae
19 Asui karuka rame mitu rame aintausikindawa irumu panye ukena mame aintauyumuatiriwaa kuaita umbuewaita nyãse aintausikie judewita sui, asui Jesus uri upuamu aintapiterupi, unyee ainta supe:
—Timaarese peiku.
20 Umbeu irumu ainta supe kua inyenga umukame aintaumaa ipu iarukanga yuiri. Asui suuri kuaita umbuewaita nyãse aintaumaawana aintaruixawa.
21 Asui Jesus unyee yuiri ainta supe:
—Timaarese peiku. Kuaye sepaya umunduwaa yawe ixe yawete yuiri hamundu penye.
22 Asui umbeu rire kua inyenga upeyu aintarese unyee ainta supe:
—Pereseberi kua Espiritu Santu pepia upe.
23 Awa kuri peperduari isui ipekadu usasawa kuri isui ae, tirame peperduari ipekadu uiku kuri sese ipekadu.
Tume tiuruyari
24 Asui kua Tume aintauserukawaa Didimu yepe aintasuiwara kuaita duziwaita tiyamaa aintairumu ae Jesus uri irumu aintapiri.
25 Asui kuaita amuita umbuewaita aintaunyee ixupe:
—Yamaawana yaneruixawa. Maa usuaxara ainta, unyee ainta supe:
—Tirame hamaa pregu rapee ipu rese, tirame haxari sededu ape, tirame haxari yuiri seipu iarukanga upe tikuri haruyari.
Umaa mukuĩsawa umbuewaita ipiri
26 Asui uitu dia rire umbuewaita aintauyumuatiri yuiri uka upe, Tume aintairumu, aintausikindawa santa panye ukena, asui Jesus uri upuamu aintapiterupi unyee ainta supe arama:
—Timaarese peiku.
27 Asui unyee Tume supe:
—Remaa seipu, rexari nededu ape asui rexari yuiri neipu searukanga upe, tereiku tiwa uruyari yawe maa reruyari puranga.
28 Asui Tume usuaxara ae unyee:
—Seruixawa, seDeus.
29 Asui Jesus unyee ixupe:
—Maitaa reruyari remaa resewara ixe? Suuri kuri kuaita uruyariwaita tipukusaware aintaumaa ixe.
Marantaa Juão umpinima kua nyenga
30 Jesus umunya siya xinga milagrita umbuewaita umaa arama tiwaita hampinima kua papera upe.
31 Maa kuaita hampinimawaita hampinima ainta peruyari arama Kristu kua Jesus, Deus raira ae, periku arama kuri mundu tiwa upawa peruyari resewara sera rese.
