Kulusuwaraita 2:1-23
2 Haputari pekuawa turusu hapurandu perese penye aintayuiri kuaita uikuwaita Laudiseia upe, panye yuiri kuaita tiwaitare umaa seruwa.
2 Suuri arama kuri aintapia, yepewasu arama kuri aintauiku gustarisawa rese, aintauriku arama panye ukuawasawa aintaukuawa arama puranga kua nyenga Deus uxariwaa Kristu rese.
3 Uyumimi sese panye kua ukuawasawa puranga.
4 Yawe hambeu penye arama tiarama awa uganani penye umanduarisawa gananisawa irumu.
5 Haiku rame apekatu pesui sepira upe haiku peirumu sepia irumu, suuri hamaa satambika peiku, santa yuiri peruyari Kristu.
Uputari aintauyukiriari puranga
6 Ape kuaye pesuantiwaa yawe yaneruixawa Kristu Jesus, yawete yuiri pewata irumu.
7 Sapu arama penye sese, peyukiriari arama puranga sese, peiku arama santa sese kua peruyariwaa, kuaye yambuewaa yawe penye sese, ape pemee ixupe arama purangawaa yawewarawate.
Ukuawawaita uganani
8 Pemaa pesui tiarama awa upisika penye nyenga ukuawasawa irumu, nyenga ipuraimawaa irumu yuiri, kuaye apigawaita nyenga yawe, kuaye kua mundu uxariwaa yawe aintaumunya Kristu sui.
9 Nyãse panye Deus ukuawasawa uiku Kristu ipira upe.
10 Asui penye yuiri teresemu penye Kristu irumu, aete aintaakanga panye tuixawaita, panye kirimbawawaita yuiri.
11 Sese yuiri peyusirkunsidari irumu kua tiwa yamunya yaneipu irumu, pemusaka resewara pesui pepira puxuwerasawa, aete Kristu sirkunsizão ae.
12 Asui aintauyutima penye batizmu upe Jesus Kristu irumu, irumu yuiri pepuamu pexari resewara pepia Deus kirimbawasawa rese, usupiriwaa ipupe Kristu umanuwaita pitera sui.
13 Asui penye yuiri umanuwaita kuera pepuxuwerasawa upe, tiresewara peyusirkunsidari pepira upe uxari upaka penye irumu, asui umburi yanesui panye yanepuxuwerasawa.
14 Asui utiari yanesui panye kua yadeveriwaa ixupe umunyawaa yande arama puxi, asui uyuka yanesui panye ae, umukanyemu ae kurusa rese.
15 Asui umuserana panye demuniwita ruixawaita, panye kirimbawawaita yuiri, asui umutenyuntu ainta aintaumaawaa upe panye, umuserana ainta kurusa rese.
Kristu yaneakanga
16 Tepexari aintaumbeu puxi perese timbiu resewara uuwaa arama resewara yuiri, u pemanduari resewara kua mundu, yasi pisasua yuiri, sauru yuiri.
17 Nyãse anyunte sangawa kuera ae kua uriwaa kuerana, maa Kristu yara kua ipira.
18 Tepexari aintaumunya penye arama puxi aintauyumukuaira resewara penye arama retentuwaa, tiyuiri aintaumunya resewara kultu anjuita supe arama aintaumanduari resewara aintakerupi, nyãse aintauyumpurakari tenyuntuwara irumu aintaumanduarisawa puxuwerawa irumu.
19 Nyãse timaa aintauiku yaneakanga Kristu rese, kua uyupuiwaa panye ipira uyukiriari arama yepewasute panye kuaita saikaita uyumuapirisawa upe, uyukiriari arama puranga kuaye Deus uxariwaa yawe uyukiriari.
Yaxari yanesui yanekustumi
20 Pemanu rameana penye Kristu irumu kua mundu sui, marantaa peikure kua mundu yaraita yawe? Marantaa peruyarire aintaumbeuwaa?
21 Aintaumbeu: Terepisika neipu irumu kua, tepesaã nyã, tepeyuaki nyã.
22 Kuaye aintaumbeu aintarese kuaita ukanyemuwaita kua mundu upe, kuaye aintaumbeu apigawa nyenga irumu, apigawa umanduarisawa irumu yuiri.
23 Kuaita aintaumunyawaita aintauxari yamanduari ukuawawaita ainta, aintauxari yamanduari puranga aintaumanduari Deus, aintauyumukuaira aintaumpurarakari aintapira, maa retentuwaa ae, anyunte uxari aintaumusuuri aintapira.
