Kulusuwaraita 4:1-18
4 Penye aintapatrãoita, pemunya ainta supe puranga yepewasu, nyãse pekuawate periku yuiri peruixawa iwaka kiti.
2 Pembeu Deus yawewarawate, pesaru pepurandu irumu, pemee irumu ixupe purangawaa.
3 Pepurandu yanerese yuiri Deus upirari arama yande arama ukena yambue arama kua nyenga uyumimiwaa Kristu rese, kua nyenga aintaumprezuwaa ixe sesewara.
4 Hambeu arama ae uyukuawa kuaye uputariwaa yawe hambeu.
5 Pewata ukuawawaita yawe aintapiterupi kuaita tiwaita uruyari yaneirumu; yawewarawate pemunya puranga.
6 Pembeu kua nyenga purangawaa yawewarawate, kuaye yamusembikawaa yawe yukira irumu, pekuawa arama maye pesuaxara aintayaweyawe.
Tikiku Unezimu yuiri
7 Tikiku umbeu kuri pesendu seresewara, aete yanemu yagustariwaa, upurakiwaa tiwa ikuere yawe seirumu yaneruixawa rese.
8 Nyãse sesewara hamundu pepiri ae pekuawa arama maye hamunya suuri arama kuri pepia.
9 Asui irumu hamundu kua Unezimu pesuiwara ae, aete yanemu purangawaa yagustariwaa. Aintaumbeu kuri pesendu panye sese kua usasawawaa ike.
Kuekatu
10 Asui Aristarku kua aintaumprezuwaa seirumu umundu penye arama kuekatu, asui Marku yuiri umundu penye arama kuekatu, Barnabe primu ae kua hambeuwaa penye arama sesewara uri rame umaa pepiri pesuanti arama ae.
11 Kuekatu penye arama yuiri kua Jesus aintaumuserukawaa Justu. Anyunte ainta kuaita usirkunsidariwaita uajudariwaita ixe sese kua yaneruixawa Deus umunduwaa upe. Aintate umusuuri ixe turusu.
12 Epafra umundu penye arama kuekatu, kua upurakiwaa Kristu Jesus supe, pesuiwara ae; kirimbawa upurandu perese yawewarawate peiku arama santa, pekuawa arama puranga kuaye Deus uputariwaa yawe.
13 Hambeu sesewara puranga nyãse upuraki turusu peresewara, aintaresewara yuiri kuaita Laudiseiawaraita, Ierapuliwaraita yuiri.
14 Kua umpusangasara yagustariwaa serawaa Luka umundu penye arama kuekatu, Dema yuiri kuekatu penye arama ae.
15 Kuekatu yanemuita supe Laudiseiawaraita, asui Ninfa supe yuiri, asui panye kuaita ingreja supe aramawaita uyumuatiriwaa suka upe kuekatu ainta supe arama.
16 Asui peleri rire kua papera panye penye, pexari aintauleri yuiri ae aintaingreja upe kuaita Laudiseiawaraita, asui yawete yuiri peleri aintapapera.
17 Asui pembeu Arkipu supe upuraki arama puranga, umunya arama kua muraki urikuwaa yaneruixawa rese.
18 Ixe Paulu hampinima kua kuekatu seipu irumu. Haputari pemanduari ixe aintaumprezuwaa. Kuiri Deus purangasawa uiku peirumu.
