Rumawaraita 11:1-36
11 Ape hapurandu:
—Maitaa Deus uxari kuaita imiraita? Umbaa, nyãse ixe yuiri israelita ixe, Abraão rimiariru ixe, Benjamĩ tribu suiwara ixe.
2 Umbaa Deus uxari kuaita imiraita ukuawa sese aintausemu runde aintaumaa ara. Maitaa timaa pekuawa maye aintaumpinima umbeu Elia rese mayetaa umbeu puxi Deus supe aintarese kuaita israelitaita:
3 Seruixawa, aintauyuká kuaita remunduwaita utitikawaita, aintaumuaiwa aintausapiwaa rendawa upe inde arama, asui yepenyu haiku kuiri asui aintauputari aintauyuká ixe.
4 Maa maitaa Deus usuaxara ae? Hamukaturu ixe arama seti mili apigawa tiwaita uyurinipia ixupe kua Baal.
5 Yawete yuiri kuiri, aikuete kuaita aintapitera suiwaraita uparawakawaita ipurangasawa irumu.
6 Umukaturu rame ipurangasawa irumu, ape timaa umukaturu yanemuraki resewara yawaite timaa purangawaa kua ipurangasawa.
7 Ape maitaa kuri yambeu. Tiaintauwasemu kua aintauputariwaa kuaita israelitaita, maa aintauwasemu ae kuaita uparawakawaita, maa kuaita amuita santawaa aintapia.
8 Yawe aintaumpinima: Deus uxari ainta supe aintaumanduarisawa tenyuntuwara, uxari ainta supe aintaresa tiarama aintaumaa, uxari ainta supe aintaapisa tiarama aintausendu ate kuiri.
9 Asui Davi umbeu: Uxari aintafesta umuyusana ainta, aintauwari arama tiipi kiti aintaupurara arama aintapuxuwerasawa resewara.
10 Uxari pitunawasu aintaresa tiarama aintaumaa, asui uxari aintauyawika yawewarawate.
Tikuri Deus uxari israelitaita yawewarawate
11 Asui hapurandu:
—Maitaa aintautuka aintaipi aintauwari arama? Umbaa. Maa aintapuxuwerasawa resewara salvasão usika aintapiri kuaita tiwaita judeu uxari arama israelitaita umuasi ainta.
12 Ape aintauriku rame purangawaa kuaita mundu puraita aintaumunya resewara aintapuxuwerasawa kuaita israelitaita, aintauriku rame purangawaa kuaita tiwaita judeu aintauyawi resewara kuaita israelitaita, ape kuri turusu piri kuri purangawaa aintauriku aintauruyari irumu kuri mukuĩsawa.
13 Kuiri hambeu penye arama penye tiwaita judeu. Nyãse umbuesara tiwaita judeu ixe, ape haputari hambeu puranga sese kua hambuewaa.
14 Haxari arama semuita judewita umuasi hapuderi arama maa hayurawa yepeyepe aintasuiwara.
15 Upuderi rame umukaturu kuaita mundu puraita umburi resewara kuaita israelitaita, ape kuri mukuĩsawa irumu usuanti ainta, upaka kuri ainta manusawa sui.
16 Puranga rame kua aintaukitikawaa aintauyupiruwaa asui puranga kuri yuiri panye, puranga mirá rapu puranga yuiri sakangaita.
17 Umpena rame yepeyepe sakanga isui kua uxari arama inde mirá ulivera puxuwera aintarendawa upe kuaita sakanga purangawaita resiki arama mirá ulivera purangawaa yukise,
18 Terembeu purangawaa nerese aintasui kuaita sakangaita, ape rembeu rame puranga nerese haxari rekuawa timaa inde kua upitasuka kua mirá rapu, maa mirá rapu kua upitasukawaa inde.
19 Maitaa kuri rembeu:
—Umpena yepeyepe sakanga isui uxari arama ixe sendawa kuera upe.
20 Ẽẽ, tiresewara aintauruyari umpena ainta, maa kirimbawa inde reruyari resewara. Kuiri terembeu puranga neresewara maa resikie isui.
21 Nyãse tirame Deus umukaturu kuaita sakangaita purangawaita, timaa yuiri kuri umukaturu inde.
22 Kuiri remanduarire Deus purangasawa rese, maye yuiri kirimbawa umbeu pekadu rese, kirimbawa umbeu aintapekadu kuaita uwariwaita isui maa puranga umaa inde reiku rame santa sese, tirame reiku sese umunuka yuiri kuri inde isui.
23 Aintayuiri umuyari mukuĩsawa sese tirame aintauiku tiresewara aintauruyari sese, nyãse Deus upuderi mukuĩsawa umuyari ainta sese ikirimbawasawa irumu.
24 Umunuka rame inde mirá ulivera puxuwerawa sui umuyari arama inde mirá ulivera purangawaa rese, yawete yuiri kuri iwasuimawaa ixupe arama umuyari arama mirá ulivera purangawaa rese kuaita sakanga.
Pirasua kuri Deus umaa panye
25 Semuita haputari pekuawa kua uyumimiwaa yawaite pemanduari puranga penye amuita sui, nyãse santare aintapia kuaita israelitaita ate aintauxari aintapia sese panye kuaita uparawakawaita tiwaita judeu.
26 Ape yawe kuri umukaturu panye kuaita israelitaita kuaye aintaumpinimawaa yawe kuxima: Uri kuri sião sui kua uyurawawaa ainta, umburi kuri Jaku sui panye ipuxuwerasawa.
27 Aete kua hambeuwaa ainta supe hamburi irumu kuri aintasui aintapekadu.
28 Sesewara penye, aintaumuruanyana kua nyenga purangawaa. Maa Deus uparawaka resewara ainta, ugustari ainta aintaresewara kuaita aintaramunyaita.
29 Nyãse umbaa Deus upuderi umuyuiri kuaita uxariwaita ainta supe arama, tiyuiri upuderi umburi kuaita uparawakawaita.
30 Nyãse yawe timaa peruyari Deus kuxima, maa kuiri pirasua umaa penye tiresewara aintauruyari.
31 Yawete yuiri kuiri tiwaita uruyari ainta, pirasua resewara umaa penye, pirasua umaa aintayuiri.
32 Nyãse Deus umprezu ainta panye aintapuxuwerasawa upe pirasua arama umaa ainta panye.
Puranga Deus ukuawasawa
33 Turusu urikuwaa panye maa kua Deus, yawete yuiri umanduarisawa, yawete yuiri ukuawasawa. Tiyapuderi yakuawa panye umunyawaita yande arama, tiyuiri yapuderi yakuawa panye umunyawaa rupiara.
34 Ape, awataa ukuawa yaneruixawa umanduarisawa rese? Awataa umbue ae?
35 Awataa uxari Deus supe umuyuiri arama ixupe ae?
36 Nyãse Deus suiwarapawa panye maantu, umunyawaitate ainta panye, iyara arama ixupe aramawaita panye. Yamee ixupe purangawaa yawewarawate. Amem.
