Rumawaraita 14:1-23
14 Peajudari kua pituawaa uruyari, maa tepeyusuaxara irumu penyenga irumu.
2 Yepe umanduari upuderi umbau panye maa, maa kua pituawaa uruyari umbau anyunte mitima.
3 Asui kua umbauwaa panye maa tipuranga puxi umaa ixupe kua tiwa umbau, asui kua tiwa umbau panye tipuranga umbeu puxi sese kua umbauwaa panye nyãse Deus usuanti ae.
4 Awataa inde rembeu arama puxi amu ixupe aramawaa rese? Suixawa umaate ae, u upuamu ixupe santa u uwari. Upuamu kuri santa nyãse yaneruixawa upuderi uxari upuamu.
5 Yepe umanduari puranga xinga yepe ara amu isui, asui amu umanduari yepewasu muiri ara. Yarikute yakuawa mayetaa yamanduarisawa yaneyaweyawe yanepia upe.
6 Kua umanduariwaa puranga yepe ara umanduari ae yaneruixawa resewara. Asui kua umbauwaa umbaute ae yaneruixawa resewara nyãse umee purangawaa Deus supe, asui kua tiwa umbau tiumbau ae yaneruixawa resewara, ae yuiri umee purangawaa Deus supe.
7 Nyãse tiawa yanesuiwara upaka ae ixupe aramapawate, tiyuiri awa yanesuiwara umanu ae ixupe aramapawate.
8 Nyãse yapaka rame yande yapaka yande yaneruixawa supe, asui yamanu rame yande yamanu yande yaneruixawa supe. Yapaka ramere yande u yamanu rameana yande yaneruixawa supe aramate yande.
9 Nyãse yawewaa resewara umanu Kristu asui upakate ae mukuĩsawa, aintaruixawa arama ae kuaita umanuwaita kuaita upakawaita yuiri.
10 Marantaa rembeu puxi nemu rese? Marantaa yuiri puxi remaa nemu? Nyãse yapuamu kuri yepewasu muiri yande Deus umaa umbeu arama yanerese.
11 Yawe aintaumpinima: Yaneruixawa umbeu; kuaye hapaka yawe ixe yawete yuiri kuri aintaurikute aintaumunya benditu ixe arama panye ainta, asui aintaapeku irumu kuri aintaurikute aintaumee Deus supe purangawaa panye ainta.
12 Yawete yuiri kuri yarikute yambeu yaneresewara yaneyaweyawe Deus supe.
Uyurawawaita gustarisawa yuiri
13 Ape yarikute tiyapurungita puxi amuita rese yande, asui perikute pepitu pexari pemu uwari.
14 Hakuawate seruixawa Jesus uxari yuiri hakuawa tiyamaa kua tiwa yapuderi yambau, maa ixupe kua tiumbau puxuwerawa ae.
15 Remusasiyara rame nemu irumu kua rembauwaa tiregustari ae. Teremunya kua rembauwaa uxari umburi kua nemu nyãse sesewara umanu Kristu.
16 Ape tepexari aintaumbeu puxuwera kua pemanduariwaa purangawaa.
17 Nyãse kua yaneruixawa Deus umunduwaa upe timaa timbiu ae tiyuiri yau ae, maa purangawaa ae, uxari timaarese penye, uxari suuri penye irumu kua Espiritu Santu.
18 Kua upurakiwaa Kristu supe kuaye umusuuri Deus asui puranga yuiri aintaumaa ae kuaita apigawaita.
19 Ape yarikute yaputari yamunya puranga tiarama maa rese yaiku yandepawa yayukiriari arama yuiri yepewasu yande.
20 Teremuaiwa kua Deus muraki timbiu resewara. Nyãse supiwa purangawaa panye maantu, maa puxuwerate ixupe kua apigawa umbau umuaiwawaa irumu.
21 Purangate tirembau sukuera tiyuiri reu vinyu u remunya kua uxariwaa nemu uwari.
22 Reruyari rame, reruyari puranga nepia upe Deus umaa. Suuri kuri kua tiwa umanduari puxi sesepawa sesewara kua uruyariwaa.
23 Maa umbau rame ae kua mukuĩwaa umanduarisawa tiumukaturu ae, nyãse timaa umunya kuaye uruyariwaa yawe ipia upe, pekadu panye kuaita tiwaita yamunya Deus rese.
