Rumawaraita 15:1-33
15 Yande kirimbawawaa yaruyari yarikute yawaguentari aintairumu kuaita pituawaita uruyari, maa timaa yayumusuuri arama yande pawantu.
2 Ape yarikute yaneyaweyawe yamusuuri yanemu puranga arama uiku uyukiriari arama.
3 Nyãse timaa yuiri Kristu uyumusuuri aepawa, maa kuaye aintaumpinimawaa yawe: Aintapuxuwerasawa kuaita umuruanyanawaita inde uwari serese.
4 Nyãse panye kua aintaumpinimawaa aintaumpinima ae yayumbue aramawaa ipupe, ape yaiku resewara santa suuri resewara yuiri yande irumu kua aintaumpinimawaa yariku arama kuri kua yasaruwaa.
5 Haputari maa kua Deus urikuwaa pasiensia kua umusuuriwaa yuiri uxari yepewasu pemanduari kuaye Kristu Jesus uxariwaa yawe.
6 Yepewasu arama penye pepia irumu peyuru irumu yuiri pemee purangawaa Deus supe ipaya kua yaneruixawa Jesus Kristu.
7 Ape pesuanti amuita kuaye Kristu usuantiwaa yawe yande yamee arama purangawaa Deus supe.
8 Ape hambeu penye arama usirkunsidariwaita ixupe aramawaa kua Kristu uxari arama aintaukuawa supiwa Deus, aintaukuawa arama supiwa umbeuwaa ainta supe kuaita yaneramunyaita.
9 Aintaumee arama purangawaa Deus supe kuaita tiwaita judeu nyãse pirasua umaa ainta supe, kuaye aintaumpinimawaa yawe: Ape hamee kuri purangawaa inde arama aintapiterupi kuaita tiwaita judeu, hanyengari kuri purangawaa nerera supe.
10 Aintaumpinima yuiri: Peyumusuuri penye tiwaita judeu aintairumu kuaita imiraita.
11 Aintaumpinima yuiri: Pemee purangawaa Yaneruixawa supe muiri penye tiwaita judeu, pemee ixupe purangawaa panye penye miraita.
12 Izaia umbeu yuiri: Uri kuri kua Jese rapu, upuamu kuri aintaruixawa arama ae kuaita tiwaita judeu, irumute kuri aintausaru aintaumaa mundu nunkawaa upawa kuaita tiwaita judeu.
13 Haputari maa kua Deus usaruwaa umaa umuteresemu penye suuriwaa irumu timaaresesawa irumu yuiri peruyari resewara ae, periku arama kuri turusu pesaruwaa ikirimbawasawa irumu kua Espiritu Santu.
Marantaa Paulu umpinima
14 Asui, semuita, ixepawate hakuawa perese teresemu penye purangawaa irumu, teresemu penye ukuawasawa irumu, pekuawate pembue amuita.
15 Maa hampinima penye arama yepeyepe nyenga kirimbawa piri pemanduari arama aintarese, sesewara kua purangasawa uxariwaa ixe arama kua Deus.
16 Upurakisara arama ixe ixupe kua Kristu Jesus aintapiterupi kuaita tiwaita judeu sese kua Deus nyenga purangawaa, suuri arama kuri usuanti ainta aintauxariwaita ixupe kuaita tiwaita judeu Espiritu Santu umukaturu rire ainta.
17 Ape sese kua Kristu Jesus hapuderi hambeu purangawaa sese kua semuraki Deus supe.
18 Anyunte hapuderi hambeu purangawaa sese kua Kristu umunyawaa senyenga irumu hamunyawaita irumu yuiri haxari arama aintauruyari kuaita tiwaita judeu.
19 Asui Espiritu Santu kirimbawasawa irumu hamunya milagri, asui hamunya yuiri kua tiwaita yapuderi yamunya yanekirimbawasawa irumu, asui yuiri hambue ainta panye kua nyenga purangawaa Kristu rese, panye Jeruzalẽ upe panye aintarendawa yaweyawe ate Iliriku kiti.
20 Ape kirimbawa haputari hambue kua nyenga purangawaa tiwa upere aintaumbue ainta supe Kristu rese tiarama hambue sese kua aintaumbuewaa.
21 Maa kuaye aintaumpinimawaa yawe: Aintaumaa kuri kuaita tiwaitare aintaukuawa sese, aintaukuawa kuri sese kuaita tiwaitare usendu sesewara.
Umbeu sesewara
22 Yawewaa resewara tihapuderi hasu hamaa pepiri.
23 Maa kuiri timaa kiti hambue ike. Nyãse siya viaji haputari hamaa pepiri.
24 Hamanduari hamaa kuri penye hasuwaa upe Espanya kiti, asui penye kuri pemundu ixe akiti hayumusuuri rire peirumu kutarantu.
25 Maa kuiri hasure Jeruzalẽ kiti hawajudari arama kuaita uruyariwaita.
26 Nyãse kuaita Maseduniawaraita Akaiawaraita yuiri suuri aintaumuatiri aintamaa ainta supe kuaita pirasuawaita aintapiterupi kuaita uruyariwaita Jeruzalẽ upe.
27 Suuri aintaumunya ae nyãse aintaudeveri ainta supe, aintauriku rame purangawaa Espiritu rese kuaita tiwaita judeu aintairumu kuaita judewita, ape aintaurikute aintawajudari yuiri ainta kua mundu yara irumu.
28 Asui hamee rireana ainta supe kua aintaumuatiriwaa ainta supe, ape hamaa kuri pepiri hasuwaa upe Espanya kiti.
29 Nyãse hakuawa hamaa irumu pepiri Kristu kuri uabensuari ixe turusu.
Uputari aintaupurandu Deus irumu sese
30 Kuiri hapurandu penye semuita sesewara kua yaneruixawa Jesus Kristu, sesewara yuiri kua Espiritu gustarisawa pepurandu kirimbawa Deus irumu ixe yuiri hapurandu serese,
31 Umukaturu arama ixe aintasui kuaita tiwaita uruyariwaita Judeya upe, suuri arama ainta uruyariwaita usuanti kua semuraki Jeruzalẽ kiti.
32 Ape, Deus uputari rame hayuiri pepiri suuri hapitu peirumu puranga.
33 Haputari Deus uiku peirumu panye penye, kua uxariwaa timaarese penye. Amem.
