Rumawaraita 2:1-29
2 Ape inde apigawa tinerimutara rembeu irumu amu rese, nyãse rembeu puxi neresepawate ipupe kua rembeu amu rese, nyãse remunyate yuiri kua rembeu amu rese.
2 Yakuawate Deus umbeu satambika aintarese kuaita umunyawaita puxi.
3 Inde apigawa rembeuwaa aintarese kuaita umunyawaita aintapuxuwerasawa remunyate yuiri ae, maitaa remanduari reiskapari isui kua Deus umbeuwaa?
4 Maitaa remutenyuntu kua Deus purangasawa turusuwaa, uaguentari neirumu yuiri, ipia purangawaa yuiri? Maitaa tirekuawa Deus purangasawa uputari uxari sasiyara remanduari nepuxuwerasawa?
5 Nyãse santa resewara nepia timaa sasiyara remanduari nepuxuwerasawa remuatiri inde arama ipiaiwasawa kua ara ipiaiwasawa Deus uxariwaa kuri aintaumaa umbeu arama aintapekadu satambika.
6 Nyãse uxari kuri ainta supe aintayaweyawe sikuyara kuaita aintaumunyawaita.
7 Uxari kuri ainta supe arama kua mundu nunkawaa upawa kuaita umunyawaita purangawaa yawewarawate, kuaita uputariwaita ipurangasawa, kuaita uputariwaa aintausikie aintaumaa, kuaita uputariwaita aintapira nunkawaa upawa.
8 Maa ipiaiwasawa irumu umpurarakari ainta kuaita umunyawaita kuaye aintauputariwaa yawe kuaita tiwaita uruyari kua nyenga supiwa nyãse aintauruyari kua puxuwerawa.
9 Asui aintaupurara kuri asui sasiyara turusu yuiri panye kuaita mundu puraita umunyawaita puxuwerawa, aintauyupiru kuaita judewita asui greguita yuiri.
10 Maa kuaita umunyawaita puranga aintauriku kuri purangawaa, aintausikie kuri aintaumaa ainta, tikuri maa rese aintauiku, aintauyupiru kuaita judewita asui kuaita greguita yuiri.
11 Nyãse tiDeus uparawaka umaa kuaita miraita
12 Ape yawete yuiri panye kuaita umunyawaita aintapuxuwerasawa arama tiaintauriku Deus nyenga kuximawara yawentu ainta aintaukanyemu kuri, asui panye kuaita urikuwaita Deus nyenga kuximawara umunyawaita aintapuxuwerasawa anyunte Deus nyenga kuximawara umbeu kuri aintarese.
13 Maa tipuranga Deus umaa kuaita usenduwaita retentu kua Deus nyenga kuximawara, maa kuaita umunyawaita kuaye aintausenduwaa yawe Deus nyenga kuximawara, puranga kuri Deus umaa ainta.
14 Asui kuaita tiwaita judeu tiwaita uriku Deus nyenga kuximawara aintaumunya irumu aintapia sui kuaye Deus uxariwaa yawe Deus nyenga kuximawara aintauxari aintarese kua Deus nyenga kuximawara.
15 Asui aintaumukame yamaa aintapia upe aintaukuawa kua mundusawa, asui aintapia umbeu aintaresewara, asui aintaumanduarisawa umbeu aintaresewara puranga u umbeu aintaresewara puxi.
16 Nyã ara upe kuri Deus umbeu irumu kuri aintaresewara Kristu Jesus irumu panye aintaumpinima aintapia upe kuaita miraita, kuaye umbeu yawe kua nyenga purangawaa hambuewaa.
Judewita umunya puxuwerawa yuiri
17 Ape inde aintaumuseruka judeu, reiku rame Deus nyenga kuximawara rese, asui rembeu reiku puranga Deus irumu.
18 Asui rekuawate mayetaa uputari neirumu, asui puranga remaa panye kua purangawaa, asui aintaumbue inde sese kua Deus nyenga kuximawara.
19 Asui rekuawate indete rerasuwaa kuaita sesaimawaa, asui rekuawate indete aintaturi kuaita uikuwaita pitunawasu upe.
20 Asui indete umbuesara kuaita tiwaita ukuawa, umbuesara kuaita tainaita, asui Deus nyenga kuximawara rese reriku ukuawasawa panye supiwate yuiri.
21 Asui inde, rembuewaa amuita, maitaa tiserá reyumbue indepawate? Asui inde rembeuwaa tiarama yamunda, marantaa remunda?
22 Asui inde rembeuwaa tipuranga yasikari amu kunya yanerimiriku sui, maitaa resikari kunya nerimiriku sui? Asui puxi remaa kuaita idulu, marantaa remunda aintasui aintatemplu upe?
23 Inde rembeuwaa panye puranga Deus nyenga kuximawara rese, maitaa remunya puranga Deus supe remunya resewara kua Deus nyenga kuximawara usaisuwaa yamunya?
24 Kuaye aintaumpinimawaa yawe: Peresewara aintaumuaiwa Deus rera aintapiterupi kuaita tiwaita judeu.
Kuaita judewita supiwa
25 Nyãse remunya rame kuaye Deus nyenga kuximawara uputariwaa yawe puranga kuri inde arama kua sirkunsizão, maa tirame remunya kuaye Deus nyenga kuximawara uputariwaa yawe retentu kua sirkunsizão.
26 Asui aintaumunya rame kuaye Deus nyenga kuximawara uputariwaa yawe kuaita tiwaita usirkunsidariwaita maitaa tiserá yapuderi yamaa ainta kuaye usirkunsidariwaita yawe.
27 Umunya rame ipia sui kuaye Deus nyenga kuximawara uputariwaa yawe kua tiwa usirkunsidari, supiwa kuri umbeu neresewara inde rerikuwaa aintaumpinimawaa inde arama asui kua sirkunsizão yuiri maa tiremunya kuaye Deus nyenga kuximawara uputariwaa yawe.
28 Nyãse timaa judeu supiwa kua urikuwaa anyunte kua yamaawaa, tiyuiri sirkunsizão supiwa kua yamunyawaa anyunte yanerukuera upe.
29 Ape judeu supiwa kua ipia sui judeu ae, asui kua sirkunsizão supiwa kua yanepia upewaa yamanduarisawa upewaa kua tiwa yamunyawantu, kua tiwa apigawa umbeu purangawaa sese maa Deus umbeu purangawaa sese.
