Rumawaraita 9:1-33
9 Hambeu supiwa Kristu rese, timaa haganani, sepia umbeu yuiri hariku Espiritu Santu irumu.
2 Turusu sasiyara ixe yawewarawate hapurara sepia upe.
3 Haputari hayuperderi ixe Kristu sui aintaresewara kuaita semuita hagustari resewara ainta, kuaita semuita seanamaita ainta.
4 Israelitaita ainta, Deus umbeu ainta supe uxariwaita tairaita ainta, aintayara yuiri kua purangasawa, aintayara yuiri kua umbeuwaa, aintayara yuiri kua mundusawa, aintayara yuiri kua muraki Deus supe, aintayara yuiri kuaita Deus umbeuwaita.
5 Aintayaraita kuaita aintaramunyaita, asui aintasuiwara unaseri umaa ara kua Kristu, kua aintaara kiti piriwaa aintasui panye, Deus purangawaa yawewarawate, amem.
Supiwa Deus umbeuwaa
6 Tiyapuderi yambeu ugananiwaa kua Deus nyenga, nyãse timaa israelitaita supiwa panye kuaita israelitaita.
7 Maa tiAbraão rairaita ainta panye ximiariruita resewara ainta, maa unyee: Nerimiariruita kuri kuaita usemu Izaki sui.
8 Ape timaa Deus rairaita kuaita unaseriwaa umaa kua mundu aintapira upe, maa ximiariruita kuaita unaseriwaa irumu kua umbeuwaa.
9 Yawe Deus umbeu kuxima: Asuiwana hayuiri kuri, asuiwana kuri urikuana imembira kua Sara.
10 Maa tisa maa anyu uriku, maa kua Rebeka yuiri uriku imembira yepe apigawa irumu kua yanepaya Izaki.
11 Asui tire aintaunaseri aintaumaa kua ara kuaita kurapa tiramere aintaumunya purangawaa tiramere aintaumunya puxuwerawa, asui Deus uputari uxari aintaukuawa uputari ainta senundere aintaunaseri aintaumaa kua ara, tiuputari ainta aintaupuraki resewara ixupe maa uputari ainta, uputari resewara.
12 Deus umbeuwana ixupe: Kua imu tainasawa umundu kuri kua imu tuyuwewaa.
13 Yawe aintaumpinima: Hagustari hamaa kua Jaku, maa puxi hamaa kua Ezau.
Purangawaa kua Deus
14 Ape maitaa kuri yambeu? Maitaa puxuwerawa Deus umunya? Umbaa.
15 Nyãse umbeu Muize supe: Hawajudari kuri awa haputari hawajudari, pirasua kuri hamaa awa haputari pirasua hamaa.
16 Ape pirasua umaa yande timaa yaputari resewara yamunya puranga u yamunya resewara puranga, maa Deus uputarisawa pirasua umaa yande.
17 Nyãse Deus umbeu Farao supe: Sesewara haxari tuixawa arama inde hamukame arama aintaumaa hakuawasawa nerese, aintaupurungita arama serera rese panye mundu upe.
18 Ape pirasua umaa awa uputari, asui umusanta ipia awa supe uputari.
Yaneruixawa Deus kirimbawawaa
19 Ape rembeu kuri ixe arama:
—Marantaa umbeure puxi yanerese? Awataa upuderi uputariwaa yawe suaxara?
20 Asui awataa inde, inde apigawa remuseranawaa Deus irumu? Maitaa kua umunyawaa upuderi umbeu ixupe kua umunyawaa ae:
—Marantaa remunya ixe yawe?
21 Maitaa kua umunyawaa siru tiserá upuderi umunya yepe puranga, asui amu puxuwerawa irumu kua tuyuka?
22 Asui maitaa kuri yambeu? Deus uputari resewara umukame yamaa ipiaiwasawa upuderisawa yuiri usaru uikupuku aintairumu kuaita ipiaiwaita umunyawaita aintaukanyemu arama.
23 Uxari arama yakuawa maitaa kua ipurangasawa umukaturuwaa aintarunde kuaita pirasua umaa ainta supe senundere aintaunaseri aintaumaa kua ara.
24 Aete yande kuaita usenuiwaita, tiaintanyu aintapitera sui kuaita judewita maa aintasuiwara yuiri kuaita tiwaita judeu.
25 Kuaye umbeuwaa yawe kua Uzeia rupi: Hasenui kuri semiraita arama kuaita tiwaita kuera semiraita; hagustari kuri kua kunya tiwa kuera hagustari.
26 Ape umbeu ainta supe:
—Umbaa semiraita penye. Ape umbeu kuri yuiri ainta supe:
—Tairaita kuri penye kua Deus upakawaa.
27 Maa Izaia umbeu aintarese kuaita israelitaita: Siyawaita kuaita Israel rairaita, siya ainta kuaye praya siyasawa yawe parana turusuwaa rimbiwa upewaa, maa muiriira kuaita ueskapari aintasuiwara.
28 Nyãse kirimbawa kutara kuri Deus umunya kua mundu puraita supe arama kuaye umbeuwaa yawe.
29 Maye Izaia umbeuwaa yawe: Tirame maa Yaneruixawa kua aintaruixawa kuaita siyawaita uxari maa yande arama yanerimiariruita kuxima maa yapawa kuaye Suduma Gumura yuiri.
Tiaintauruyari putari kuaita judewita
30 Ape maitaa maa yambeu? Kuaita tiwaita judeu tiwaita uputari puranga ainta, purangawaa Deus umaa ainta aintauruyari resewara ae.
31 Maa kuaita israelitaita uputariwaita purangawaa Deus umaa ainta aintaumunya resewara maye Deus nyenga kuximawara umbeuwaa, tiaintaupuderi.
32 Marantaa? Tiaintauputari puranga ainta aintauruyari resewara ae maa aintaupuraki resewara. Asui aintautuka aintaipi aintauwari sese kua ita uxariwaa aintauwari.
33 Kuaye aintaumpinimawaa yawe: Haxari Sião upe yepe ita uxariwaa kuri aintauwari, kua ita uxari kuri aintauwari, asui kua uxariwaa ipia sese tikuri utiĩwaa ae.
