Apukalipisi 10:1-11
10 Asui hamaa yepe anju kirimbawa uwiye iwaka sui, nuvẽ upupeka ae, asui kua waimi mirapara uiku iakanga arupi, asui suwa kuaye kurasi yawe ae, asui setisa maye tata sendiwaa yawe.
2 Asui ipu upe upisika yepe livru kuairawaa uyupirariwaa. Asui ipi katusawa irumu upiru parana turusuwaa arupi, asui ipi kanyutu banda irumu upiru iwi rese.
3 Asui usasemu kirimbawa kuaye leão usasemu yawe, asui usasemu irumu tiapuana kuaita seti truvão.
4 Tiapu irumu kuaita seti truvão asui haputari hampinima ae, asui hasendu yepe nyenga iwaka sui umbeu:
—Reyumimi sese kua aintaumbeuwaa kuaita seti truvão, terempinima ae.
5 Asui kua anju hamaawaa upuamu parana arupi iwi rese yuiri usupiri ipu katusawa banda iwate kiti.
6 Asui umbeu nyenga kirimbawa sese kua upakawaa yawewarawate, kua umunyawaa panye iwaka puraita, panye kua mundu puraita yuiri, asui panye parana puraita yuiri:
—Tiarama usaru uikupuku.
7 Maa umunya arama kuri kua Deus uyumimiwaa kuaye umbeu yawe ainta supe arama kuaita ixupe arama utitikawaita, nyã ara upe kuri upeyu itrumbeta kua setisa anju.
8 Asui kua nyenga hasendu iwaka sui upurungita yuiri ixe arama mukuĩsawa, umbeu:
—Resu repisika kua livru uyupirariwaa ipu upe kua anju upuamu parana arupi iwi rese yuiri.
9 Ape hasu ipiri kua anju asui hambeu ixupe arama uxari arama ixe arama kua livru kuairawaa. Asui unyee ixe arama:
—Repisika ae rembau ae, nyãse supiwa irawa kuri ae nemarika upe maa kuri seẽwaa ae neyuru upe kuaye ira yawe.
10 Asui hapisika kua livru kuairawaa ipu sui kua anju asui hambau ae, asui seẽwaa ae maye ira yawe seyuru upe maa hamukuna rame ae irawa ae semarika upe.
11 Asui aintaumbeu ixe arama:
—Rerikutere retitika aintarese siya miraita, siya kuaita upurungitawaita siya nyenga, siya tuixawaita yuiri.
