Apukalipisi 12:1-17
12 Asui hamaa yepe sangawa iwaka kiti, aete yepe kunya umundeu sese kua kurasi, asui ipi wira kiti kua yasi, asui iakanga rese yepe kurua duzi estrela irumu.
2 Hamaa ipuruã ae, usasemu sasi irumu nyãse upurara unaseri arama isui imembira.
3 Asui hamaa amu sangawa iwaka kiti, hamaa yepe dragão turusuwaa pirangawaa ae, uriku seti iakanga asui dezi iakaita, asui uriku seti kurua.
4 Asui suwaya irumu usiki musapirisawa parti aintasuiwara kuaita estrelaita uikuwaita iwaka upe, asui umburi ainta kua mundu kiti. Asui kua dragão uiku senunde kiti kua kunya unaseri imembira isui umbau arama ae unaseri irumu ae.
5 Asui unaseri imembira asui apigawa ae aintaruixawa arama kuri ae kuaita miraita panye ibatuna feru suiwara irumu, asui aintausupiri imembira Deus trunu kiti.
6 Asui kua kunya uyawawa kampu kiti, akiti Deus umukaturu senunde uiku arama aintauyupui ae akiti mili duzentu sesenta ara.
Aintaumuserana kua dragão
7 Asui aintaumunya kera iwaka kiti. Kua Migel umunya kera suaxara kua dragão aintairumu kuaita ianjuita, asui kua dragão umunya kera aintairumu kuaita ianjuita yuiri.
8 Maa aintaumuserana ainta, asui tiaintauriku aintauiku aramawaa iwaka kiti.
9 Asui aintaumburi kua dragão turusuwaa, buya kuximawara ae serawaa Yurupari, satanas yuiri, aete kua ugananiwaa panye kuaita mundu puraita; aintaumburi ae kua mundu kiti aintairumu kuaita ianjuita.
10 Asui hasendu yepe nyenga tiapu iwaka sui, umbeu:
—Kuiri usikana salvasão, asui ikirimbawasawa yuiri, yaneruixawa Deus umunduwaa upe, usikana sangawa Kristu umundu arama ainta, nyãse aintaumburi kua umbeuwaa aintarese puxi kuaita yaneanamaita muiri ara pituna yuiri uiku yaneDeus runde kiti.
11 Asui aintaumuserana ae sesewara kua kurderu ruwi, sesewara yuiri kua testemunyu aintaumbeuwaa, asui tiaintauyugustari aintapawa ate manusawa usika aintarese.
12 Ape kuri peyumusuuri penye iwaka penye yuiri iwaka upewaita.
Dragão umuruanyana kua kunya
13 Asui kua dragão umaa irumu aintaumburi ae kua mundu kiti, anyunte umuruanyana kua kunya unaseriwaa imembira apigawa ae.
14 Asui aintauxari ixupe arama ipepu arama kua kunya kua wirawasu turusuwaa ipepu uwewe arama buya sui setama kiti kampu aintauyupui arama ae akiti musapiri akayu meiu yuiri.
15 Asui kua buya utumuna ii iyuru sui kuaye parana yawe sakakuera kua kunya, uputari parana uyuka arama ae.
16 Maa kua iwi uajudari kua kunya, nyãse kua iwi upirari iyuru umukuna kua ii utumunawaa iyuru sui kua dragão.
17 Asui kua dragão ipiaiwa ae suaxara kua kunya, asui usu umunya kera aintaruaxara kuaita ximiariruita kuaita uruyariwaita Deus umbeuwaa kuaita umbeuwaita testemunyu Jesus rese. Asui usu upuamu parana turusuwaa praya rese.
