Apukalipisi 18:1-24
18 Asui yawe rire hamaa yepe anju uwiye iwaka sui, turusu uriku umundusara, asui murutinga umuturi panye kua mundu ipurangasawa irumu.
2 Asui usasemu nyenga kirimbawa irumu, umbeu:
—Uwariana, uwariana Babilunia kua tetama turusuwaa, kuiri demuniwita uikuwaa arama ae, aintauyumimi arama kuaita demuniwita ikiawaita, aintauyumimi arama panye kuaita wira puxuwerawaita.
3 Asui panye kuaita miraita aintauu vinyu kunya warixisawa puxuwerawa irumu, asui panye kuaita tuixawaita kua mundu puraita aintauyumuwarixi irumu, asui kuaita unegusiariwaita riku aintauiku sesewara kua kunya turusuwaa uriku imaa.
4 Asui hasendu yepe nyenga iwaka sui, unyee:
—Peyuiriana isui penye semiraita, yawaite pemunya pepuxuwerasawa yawe kua kunya, yawaite pepurara yawe kua kunya.
5 Nyãse ipuxuwerasawa usikana ate iwaka kiti, asui Deus umanduari ipuxuwerasawa rese.
6 Pexari ixupe arama kuaye umunyawaa yawe penye arama, pepagari ixupe mukuĩsawa kuaita umunyawaita, asui pemunani uu arama mukuĩsawa kirimbawa ipupe kua kupu uxari ipupe peu arama.
7 Yawe uyumanduari puranga sese, uiku rikuwaa ae asui yawete pexari upurara pemusasiyara kuri ae, nyãse uyumbeu: Haiku kunya ruixawa yawe, timaa viuva ixe, tiyuiri hayaxiu kuri.
8 Ape puxuwerawa uri kuri sese yepe ara, panye manusawa, panye yaxiusawa, panye yumãsi yuiri, asui ukai kuri ae tata upe nyãse yaneruixawa Deus kirimbawa umbeu sese.
Ugustariwaita Babilunia aintauyaxiu
9 Asui aintaumaa irumu kuri tatatinga kua tata usapiwaa kua kunya; aintauyaxiu kuri sasiyara kuri panye kuaita tuixawaita kua mundu kiti, kuaita warixiwaita irumu uikuwaita riku yuiri.
10 Asui apekatu aintaupuamu umaa nyãse aintausikie aintaumaa upurara, aintaunyee:
—Puxuwera resasawa, puxuwera resasawa, inde Babilunia tetama turusuwaa, inde tetama kirimbawa maa kutarantu repurara yepe ura.
11 Asui kuaita unegusiariwaita kua mundu upe aintauyaxiu sesewara sasiyara ainta nyãse tikuri awa upiripana iyaraita.
12 Panye uru, panye prata, panye ita sendiwaa, panye perula, panye linyu finuwaa, panye fazenda piranga pixunawaa, panye seda, panye fazenda piranga murutingawaa, panye yuiri mirá sakuenawaa, panye aintaumunyawaita elefanti ranya irumu, panye aintaumunyawaita mirá suiwara sipiwasuwaa, panye brunze, panye feru, panye ita purangawaa.
13 Panye kanela, panye umusee arama timbiu, panye insensu, panye pumada, panye umanuwaita rupiara, panye vinyu, panye azeti, panye trigu putira uwi, panye trigu yuiri, panye vaka, bui yuiri, panye uvelya, panye kavalu, panye karu yuiri, panye riku kurumi, asui panye mira angaita yuiri.
14 Kuxima ukanyemu pesui kua mirá iya pepia uputariwaa, aintaukanyemu panye purangawaa nemaa panye nepurangasawa yuiri ukanyemu, tikuri awa uwasemu mukuĩsawa ainta.
15 Asui kuaita unegusiariwaita irumu rikuwaa arama ainta, aintaupuamu aintaumaa apekatu isui aintausikie resewara aintaumaa upurara, aintauyaxiu sasiyara ainta.
16 Aintaumbeu:
—Puxuwera usasawa, puxuwera usasawa kua tetama turusuwaa, umundeuwaa irupa linyu finuwaa, piranga pixunawaa yuiri, piranga murutingawaa yuiri, umuyariwaa sese uru, ita sendiwaa, asui peruka yuiri.
17 Ape kutara ukanyemu panye iyara, yepe urate. Asui panye kuaita naviu pilutu, panye yuiri kuaita aintauwata parana rupi, panye kuaita marinyeruita, panye aintayuiri kuaita upurakiwaita naviu upe, aintaupuamu aintaumaa apekatu suintu.
18 Asui aintaumaa irumu tatatinga kua tata usapiwaa ae, aintausasemu kirimbawa:
—Maataa tetama turusuwaa ae kuaye kua tetama turusuwaa.
19 Asui aintaumburi iwi puera aintaakanga rese, aintauyaxiu, sasiyara ainta, asui aintausasemu aintaumbeu:
—Puxuwera usasawa, puxuwera usasawa kua tetama turusuwaa rikuwaa aramawaita ainta akiti kuaita urikuwaita aintanaviu usuwaita parana turusuwaa kiti uputari resewara turusu imaa, asui kutara ukanyemu panye, yepe urate.
20 Peyumusuuri penye iwaka penye yuiri penye uruyariwaita, penye yuiri penye Jesus umunduwaita, penye yuiri penye utitikawaita, nyãse Deus uxari upurara sesewara kua umunyawaita penye arama.
Uwari Babilunia anyu aramawaa
21 Asui yepe anju kirimbawa usupiri yepe ita turusuwaa aintaumukuruiwaa rupiara yawe, asui umburi parana turusuwaa kiti asui umbeu:
—Yawete yuiri kuri kirimbawa aintaumburi kua tetama turusuwaa Babilunia, asui tikuri awa uwasemu ae.
22 Asui tikuri yasendu inyenga kuaita aintaumuapuwaita arpa, tiyuiri unyengariwaita, tiyuiri aintaupeyuwaa rupiara, timaa yuiri trumbeta, tiyuiri yawasemu umunyawaita ape, tiyuiri yasendu aintaumukuruiwaa rupiara ape.
23 Timaa kuri turi umuturi ape, asui timaa kuri yasendu ape aintanyenga kuaita nuivu nuiva yuiri, nyãse kuaita neyaraita rikuwaita negusiantita kirimbawa kuera aintauiku kua mundu upe, nyãse kuaita miraita panye reganani ainta nepayesawa irumu.
24 Asui yawasemu sese aintaruwi kuaita utitikawaita uruyariwaita yuiri, asui aintaruwi panye kuaita aintauyukáwaita kua mundu upe.
