Apukalipisi 2:1-29
2 Asui rempinima ixupe kua ingreja anju Efezu kiti:
—Yawe umbeu kua upisikawaa ipu katusawa upe kuaita seti estrela, kua uwatawaa aintapiterupi kuaita seti turi uwapikawaa rendawa uru suiwara.
2 Hakuawa aintarese kuaita remunyawaita, nemuraki yuiri, hakuawa yuiri maye tinepiaiwa repurara, tirepuderi reaguentari aintairumu kuaita apigawaita puxuwerawaita, asui resaã rekuawa kuaita umbeuwaita Jesus umunduwaita ainta maa umbaa umunduwaita ainta, asui rekuawate gananiweraita ainta.
3 Hakuawate tinepiaiwa repurara, asui reaguentari serera rese, asui timaa nekuere inde.
4 Maa yepe nyenga hambeu nerese:
—Timaa regustari ixe kuiri kuaye regustariwaa yawe ixe kuxima reyupiru.
5 Ape remanduari kuiri kua rewariwaa isui, asui sasiyara remanduari nepuxuwerasawa asui remunya kuaye reyupiru remunya. Tirame yawe remunya hayuiri kuri nepiri hayuka neturi uwapikawaa rendawa sendawa sui, tirame sasiyara remanduari nepuxuwerasawa.
6 Maa yepe reriku purangawaa, puxi remaa aintaumunyawaita kuaita nikulaitaita, ixe yuiri puxi hamaa ainta.
7 Kua urikuwaa iapisa kuara usendu mayetaa Espiritu umbeu ainta supe kuaita ingrejaita. Kua umuseranawaa haxari kuri umbau iya kua mirá upakawaa upuamu Deus paraizu upe.
Umpinima ingreja supe Esmirna kiti
8 Asui kuiri rempinima ixupe kua ingreja uikuwaa Esmirna kiti:
—Yawe umbeu kua uyupirungawa kua anyu aramawaa yuiri, kua umanuwaa kuera asui uyuiri upaka ae.
9 Hakuawate maye repurara, hakuawate yuiri pirasua inde, maa riku inde, hakuawate yuiri mayetaa aintaumbeu puxi nerese kuaita umbeuwaita judewita aintamaa timaa judewita ainta, anyunte Yurupari sinaguga ainta.
10 Teresikie sesewara kua repurarawaa kuri. Kua Yurupari kuri umburi yepeyepe pesuiwara kadeya kiti uputari usaã penye pexari arama kua peruyariwaa, asui pepurara kuri akiti dezi ara; kuiri reiku santa ate remanu inde, ape kuri haxari inde arama kua kurua upakawaa.
11 Kua urikuwaa iapisa kuara usendu mayetaa Espiritu umbeu ainta supe kuaita ingrejaita. Kua umuseranawaa tikuri upurara mukuĩsawa manusawa.
Umpinima ingreja supe Pergamu kiti
12 Asui kuiri rempinima ixupe kua ingreja anju uikuwaa Pergamu kiti:
—Yawe umbeu kua urikuwaa espada mukuĩ ruaxara saimbewaa.
13 Hakuawate reiku Yurupari uikuwaa upe, hakuawa reiku santa serera rese, timaa reyumimi sese kua reruyariwaa, tiyuiri reyumimi seresewara aintauyuká rame nepiterupi kua tiwa ikuere umbeu serese serawaa Antipa, Yurupari uikuwaa rendawa upe.
14 Maa aikuete yepeyepe puxuwera nerese, nyãse rerikute yepeyepe neruaki aintaumbue Balaão nyenga rese, kua umbue Balaki umuyusana kuaita israelitaita aintaumbau arama sukuera aintauxariwaa idulu supe aintaumunya arama yuiri puxuwera aintapira irumu.
15 Aikuete yuiri neruaki kuaita yepeyepe aintaugustari kua aintaumbuewaa kuaita nikulaitaita.
16 Kuiri sasiyara remanduari nepuxuwerasawa. Tirame sasiyara remanduari nepuxuwerasawa ape kuri hayuiri nepiri hamunya kera aintaruaxara irumu kua espada usemuwaa seyuru sui.
17 Kua urikuwaa iapisa kuara usendu mayetaa Espiritu umbeu ainta supe kuaita ingrejaita, asui ixupe kua umuseranawaa haxari kuri kua timbiu uyumimiwaa, haxari yuiri kuri ixupe yepe ita kuairawaa murutingawaa, apete kuri yepe sera pisasua sese kua ita kuairawaa, tiwa awa ukuawa kua sera anyunte kua urikuwaa kua ita kuairawaa ukuawa ae.
Umpinima ingreja supe Tiatira kiti
18 Asui rempinima ixupe kua ingreja anju uikuwaa Tiatira kiti:
—Yawe umbeu kua Deus raira kua urikuwaa sesa kuaye tata yawe, asui ipi kuaye brunze sendiwaa yawe:
19 —Hakuawate kuaita remunyawaita, hakuawate regustari puranga, reruyari puranga yuiri, repuraki puranga yuiri, hakuawate yuiri tinepiaiwa repurara, asui hakuawate repuraki turusu piri isui reyupiruwaa.
20 Maa hakuawa nerese yepe puxuwerawa, nyãse rexari timaarese kua kunya serawaa Jezabel, kua umbeuwaa utitikawaa ae, asui umbue ainta aintaumunya arama puxi, maa uganani yuiri ainta kuaita seyaraita aintaumunya arama tenyuntu aintapira irumu, aintaumbau arama yuiri sukuera aintauxariwaa idulu supe.
21 Hasaruana sasiyara umanduari ipekadu, maa timaa uputari sasiyara umanduari ipuxuwerasawa.
22 Remaa, haxari kuri imãsi ae, asui kuaita umunyawaita aintapuxuwerasawa irumu, haxari kuri aintaupurara turusu tirame sasiyara aintaumanduari kua puxuwerawa uxariwaa aintaumunya.
23 Hayuká kuri kuaita imembiraita, asuiwana kuri panye kuaita ingreja aintaukuawa kuri ixete kua ukuawa panye aintaumanduarisawa aintapia upe yuiri, asui haxari kuri peyaweyawe sikuyara kua pemunyawaa.
24 Kuiri hambeu penye arama penye amuita Tiatira upewaita, penye tiwaita peiku inyenga rese, tiyuiri pekuawa kuaita aintaumbeuwaa Yurupari tiipisawa. Tikuri haxari pepurara mukuĩsawa.
25 Maa haputari anyunte pemukaturu santa kua perikuwaa ate hayuiri yuiri mukuĩsawa.
26 Kua umuseranawaa haxari kuri umundu kuaita miraita kua umunyawaa semuraki ate upawa.
27 Asui umundu kuri ainta ibatuna feru suiwara irumu, umukurui kuri ainta kuaye yamukuruiwaa yawe kamuti.
28 Kuaye sepaya uxariwaa yawe yuiri ixe arama, yawete yuiri kuri haxari penye arama kua estrela kuemaitewara.
29 Kua urikuwaa iapisa kuara usendu mayetaa kua Espiritu umbeu ainta supe kuaita ingreja.
