Apukalipisi 20:1-15
20 Asui hamaa yepe anju uwiye iwaka sui, uriku ipu upe ixavi kua tiipiwaa, asui yepe kurenti yuiri.
2 Asui upisika kua dragão, kua buya kuximawara, aete kua Yurupari, satanas yuiri, asui umprezu ae mili akayu.
3 Asui umburi ae tiipiwaa kiti, asui umusikindawa santa selu irumu tiarama mukuĩsawa uganani kuaita miraita ate mili akayu upawa. Asui arirewara aintaurikute aintauyurawa ae kutarantu.
4 Asui hamaa yuiri yepeyepe trunu, asui aintauwapika aintatrunu upe kuaita umbeuwaita kuri aintarese amuita. Asui hamaa kuaita aintaumunukawaita aintasui aintaakanga aintaumbeu resewara testemunyu Jesus rese, Deus nyenga rese yuiri, panye kuaita tiwaita aintaumee purangawaa ixupe kua suu, tiyuiri sangawa supe, kuaita tiwaita uriku suu rangawa aintaruwa rese tiyuiri aintaipu rese yuiri; asui aintaupakawaita ainta Kristu irumu, asui tuixawa ainta Kristu irumu mili akayu.
5 Asui kuaita amuita umanuwaita timaa aintaupaka ate mili akayu upawa. Aete Deus uyupiru umbaka ainta.
6 Suuri kuri purangawaa yuiri kuaita upakawaita Deus uyupiruwaa umbaka ainta, umbaa kuri aintaumanu mukuĩsawa ainta, maa saserdutita kuri ainta Deus supe Kristu supe yuiri, asui tuixawaita kuri aintairumu mili akayu.
Uyurawa Yurupari kutarantu
7 Asui mili akayu upawa rire kuri aintauyurawa kuri kua Yurupari isui kua kadeya.
8 Asui usemu uganani panye kuaita miraita, panye kua mundu kiti panye Gugi, Magugi yuiri umuatiri kuri ainta kera runde. Aintasiyasawa kuaye praya yawe parana turusuwaa upe.
9 Asui aintauri panye mundu kiti, asui aintausu aintauiku aintaumuyatimana aintaretama kuaita uruyariwaita kua tetama ugustariwaa, maa tata uwari iwaka sui usapi ainta panye.
10 Asui kua Yurupari ugananiwaa ainta aintaumburi ae tata lagu kiti ukaiwaa enxufre irumu uiku ape kua suu kua utitikawaa gananiwera yuiri, akiti kuri aintaupurara muiri ara pituna yuiri yawewarawate.
Deus umbeuwaa aintarese
11 Asui hamaa yepe trunu murutingawaa turusuwaa asui kua uwapikawaa trunu upe, aintauyawawa isui panye mundu iwaka yuiri; asui timaa kiti aintauwasemu aintauikuwaa rendawa.
12 Asui hamaa kuaita umanuwaita panye ipuwasuwaita panye ipuiwaita aintaupuamu trunu runde kiti. Asui upirari livruita. Asui upirari amu livru yuiri, kua livru upakawaa. Asui umbeu aintarese kuaita umanuwaita kuaye aintaumunyawaita yawe, kuaye umpinima yawe livruita upe.
13 Asui parana turusuwaa umusemu kuaita umanuwaita paraname. Asui manusawa, infernu yuiri aintaumusemu umanuwaita. Asui umbeu aintarese aintayaweyawe aintaumunyawaa yawe.
14 Asui umburi manusawa, infernu yuiri tata lagu kiti. Mukuĩsawa manusawa aete kua tata lagu.
15 Tirame uwasemu aintarera livru upakawaa upe anyunte umburi ainta tata lagu kiti.
