Apukalipisi 3:1-22
3 Asui rempinima ixupe kua ingreja anju uikuwaa Sardi kiti:
—Yawe umbeu kua urikuwaa kuaita seti Deus espiritu aintayuiri kuaita seti estrela. Hakuawate kuaita nemuraki, hakuawate inde kuaye upakawaa yawe maa umanuwaa inde.
2 Repaka, asui remukirimbawa kuaita umanu putariwaita, nyãse hawasemu tipurangawaa kuaita remunyawaita seDeus umaa.
3 Ape remanduari kua rerikuwaa kua resenduwaa yuiri, asui reruyari ae, asui sasiyara remanduari nepuxuwerasawa. Ape tirame repaka hayuiri kuri kuaye mundawasu uriwaa yawe, ape kuri tirekuawa maa urataa hayuiri nepiri.
4 Maa rerikure yepeyepe Sardi upewaita tiwaita umukia aintarupa, aintayuiri aintauwata seirumu aintarupa murutingawaa upe nyãse purangawaita ainta.
5 Asui yawete yuiri kua umuseranawaa umundeu kuri irupa murutingawaa, asui timaa kuri hamukanyemu sera livru upakawaa sui, maa kuri hambeu sera resewara sepaya supe ainta supe yuiri kuaita ianjuita.
6 Kua urikuwaa iapisa kuara usendu mayetaa Espiritu umbeu ainta supe kuaita ingreja.
Umpinima ingreja supe Filadelfia kiti
7 Asui rempinima ixupe kua ingreja anju uikuwaa Filadelfia kiti:
—Yawe umbeu kua purangawaa, kua supiwa, kua urikuwaa Davi xavi, kua upirariwaa asui tiawa umusikindawa sakakuera, kua umusikindawa asui tiawa upirari sakakuera:
8 Hakuawate kuaita remunyawaita. Haxari nerunde yepe ukena uyupirari, asui tiawa upuderi umusikindawa ae. Hakuawa pitua inde maa reruyarite senyenga, tiyuiri reyumimi serera rese.
9 Haxari kuri kuaita yepeyepe Yurupari sinaguga upewaita umbeuwaita judeu ainta tipukusawa judeu ainta maa aintauganani, haxari kuri aintauyawika neipi ruaki aintaukuawa arama hagustari inde.
10 Nyãse reruyari puranga senyenga, tinepiaiwa repurara sesewara, ixe yuiri kuri hamukaturu inde isui kua puxuwerawa uriwaa kuri aintarese panye kua mundu upe hasaã arama mayetaa aintaumanduariwaa panye kuaita mundu puraita.
11 Kutara hayuiri. Ape remukaturu santa kua rerikuwaa tiarama kuri awa uyuka nesui kua nekurua.
12 Asui kua umuseranawaa haxari kuri uiku ae seDeus ruka upe, asui tikuri usemu isui, hampinima kuri sese seDeus rera, seDeus retama rera yuiri kua Jeruzalẽ pisasua uwiyewaa iwaka sui uriwaa Deus sui, asui hampinima yuiri sese serera pisasuwaa.
13 Kua urikuwaa iapisa kuara usendu mayetaa Espiritu umbeu ainta supe kuaita ingreja.
Umpinima ingreja supe Laudiseia kiti
14 Asui rempinima ixupe kua ingreja anju uikuwaa Laudiseia kiti:
—Yawe umbeu kua Amem, kua umbeusara tiwa ikuere supiwate, kua uyupiruwaa panye Deus umunyawaita:
15 —Hakuawate kuaita remunyawaita, timaa irusanga inde, tiyuiri saku inde. Haputari maa irusanga inde u saku inde.
16 Ape, nyãse xingantu saku inde, nẽ irusanga inde nẽ yuiri saku inde ape hawena kuri inde seyuru sui.
17 Nyãse rembeu:
—Rikuwaa ixe, turusu hawasemu seyara, timaa nungara haputari. Maa timaa rekuawa sasiyara inde, repurara, pirasua inde, sesaima inde, rupaima inde.
18 Hambeu inde arama repiripana seirumu kua uru aintaumukaturuwaa tata upe rikuwaa arama inde, repiripana nerupa murutingawaa remundeu arama ae reyumimi arama kua uxariwaa retiĩ inde, asui repiripana seirumu sesa pusanga rexari arama neresa upe remaa arama.
19 Hambeu ainta supe aintapekadu hampurarakari yuiri ainta kuaita hagustariwaita. Ape remunya puranga sasiyara remanduari nepuxuwerasawa.
20 Pemaa, hapuamu ukena upe hasenui, asui awa usendu senyenga asui upirari sukena, hawike kuri suka kiti, hambau kuri irumu asui umbau yuiri kuri seirumu.
21 Asui kua umuseranawaa haxari kuri uwapika seruaki hawapikawera upe, kuaye hamuseranawaa yawe asui hawapika sepaya ruaki itrunu upe.
22 Kua urikuwaa iapisa kuara usendu mayetaa Espiritu umbeu ainta supe kuaita ingreja.
