Apukalipisi 5:1-14
5 Asui hamaa ipu katusawa upe yepe livru kua uikuwaa itrunu upe, asui aintaumpinimawaa panye mukuĩ ruaxara yuiri asui aintausikindawa ae santa seti selu irumu.
2 Asui hamaa yepe anju kirimbawa, asui usasemu kirimbawa:
—Awataa upuderi upirari kua livru? Awataa upuderi uyurawa isui kua selu?
3 Asui tiawa upuderi upirari ae iwaka kiti, tiyuiri kua mundu kiti, tiyuiri iwi wira kiti, tiyuiri awa upuderi umaa ixupe kua livru.
4 Asui hayaxiu turusu nyãse tiawa aintauwasemu upuderi arama maa upirari kua livru, tiyuiri awa upuderi umaa ixupe.
5 Maa yepe aintasuiwara kuaita serakuenawaita umbeu ixe arama:
—Tereyaxiu, nyãse kua leão Judá suiwara, kua Davi rapu, umuserana upuderi arama upirari kua livru panye selu yuiri.
6 Asui trunu ruaki aintapiterupi kuaita kuatru upakawaita, aintapiterupi yuiri kuaita serakuenawaita hamaa upuamu yepe kurderu kuaye aintauyukáwaa yawe, uriku seti iaka, uriku yuiri seti sesa, aete ainta kuaita seti Deus espirituita umunduwaita panye kua mundu kiti.
7 Asui uri ipiri kua uwapikawaa trunu upe asui upisika ipu katusawa sui kua livru.
8 Asui upisika irumu kua livru kuaita kuatru upakawaita aintayuiri kuaita vinti kuatru serakuenawaita aintauyawika senunde sui kua kurderu, asui aintayaweyawe aintauriku yepe arpa asui yepe siru uru suiwara teresemu ainta insensu irumu, aete ainta kua aintaupuranduwaa Deus kuaita uruyariwaita.
9 Asui aintaunyengari yepe kansão pisasua, aintaumbeu:
—Purangawaa inde, repuderi repisika kua livru repirari iselu yuiri, nyãse aintauyuká inde asui neruwi irumu repiripana kuaita apigawaita Deus supe, aintasuiwara panye aintamirasawa, aintasuiwara panye nyenga aintaupurungitawaa kua mundu kiti, aintasuiwara yuiri panye miraita kua mundu upe,
10 Asui rexari ainta yaneruixawa Deus umunduwaa upe, asui rexari Deus saserdutita ainta, asui tuixawa kuri ainta kua mundu upe.
11 Asui hamaa hasendu yuiri trunu ruaki aintaruaki yuiri kuaita upakawaita kuaita serakuenawaita yuiri aintaumbeu kuaita siyawaita anjuita, siya ainta tiawa upuderi upapari muiritaa aintasiyasawa.
12 Aintaumbeu nyenga tiapuwaa irumu:
—Purangawaa kua kurderu kua aintauyukáwaa, yamee ixupe panye umundusawa, panye rikusawa, panye ukuawasawa yuiri, panye kirimbawasawa yuiri, panye purangawaa yuiri.
13 Asui hasendu panye umunyawaita iwaka upewaita, mundu upewaita yuiri, panye iwi wira upewaita yuiri, panye parana turusuwaa upewaita yuiri aintaumbeu:
—Yamee ixupe panye purangawaa panye respeitu, panye purangasawa, panye kirimbawasawa yuiri ixupe kua uwapikawaa trunu upe, ixupe yuiri kua kurderu, yawewarawate.
14 Asui kuaita kuatru upakawaita aintausuaxara:
—Amem; asui aintayuiri kuaita serakuenawaita aintauyawika senunde sui asui aintaumee ixupe purangawaa.
