Atu 17:1-34
17 Asui aintausasawa Anfipuli upe Apulunia upe yuiri, asui aintausika Tesalunika kiti, ape kuaita judewita aintauriku yepe sinaguga.
2 Asui Paulu uwike kuaye uwikewaa yawe muiri tetama upe asui uyusuaxara aintairumu Deus nyenga rese.
3 Umbeu ainta supe:
—Asui uxari aintaukuawa urikute upurara urikute usemu yuiri manusawa sui kua Kristu, yawe umbeu ainta supe:
—Kua Jesus hambeuwaa penye arama sese, Kristute ae.
4 Asui umuserana yepeyepe aintasuiwara asui aintauyumuatiri Paulu irumu Sila irumu yuiri, yawete yuiri siya greguita umanduariwaita Deus aintauyumuatiri aintairumu asui siya kunyaita purangawaita yuiri.
5 Asui kuaita judewita aintaumusuaki ainta, asui aintaurasu aintairumu yepeyepe apigawaita puxuwerawaita asui aintaumuatiri kuaita miraita asui aintaumpiaiwa ainta panye tetama upe, asui aintausu Jazum ruka kiti aintauputari aintaurasu ainta ukara kiti miraita runde.
6 Asui tiaintauwasemu ainta asui aintausiki Jazum yepeyepe uruyariwaita yuiri aintaurasu ainta serakuenawaita ipiri, aintaumbeu:
—Kuaita apigawaita umuyereuwaita kua mundu aintausikana yanepiri, asui kua Jazum usuanti ainta.
7 Asui panye kuaita apigawaita aintaumunya puxuwera Sezar supe nyãse aintaumbeu tuixawa kua Jesus.
8 Asui aintapiaiwa kuaita miraita serakuenawaita yuiri aintausendu irumu kua nyenga.
9 Maa aintauyurawa Jazum kuaita yuiri amuita aintaupagari rireana nyã dinyeru aintaupuranduwaa aintairumu.
Aintaumbue Bereya upe
10 Asui kutara nyã pituna kuaita uruyariwaita aintaumundu Paulu Sila yuiri Bereya kiti. Asui aintausika rire akiti aintauwike judewita sinaguga upe.
11 Asui puranga aintaumanduariwaa kuaita Bereyawaraita aintasui kuaita Tesalunikawaraita nyãse suuri aintausuanti kua nyenga, asui muiri ara aintauleri Deus nyenga aintaukuawa arama supiwa kua aintausenduwaa.
12 Ape siya aintapiterupi aintauxari aintapia sese, siya kunyaita gregu purangawaita siya apigawaita yuiri.
13 Maa kuaita judewita Tesalunika upe aintausendu irumu Paulu umbue Deus nyenga ainta supe kuaita Bereya upewaraita aintausu aintapiri aintaumpiaiwa ainta aintaumuapatuka kuaita miraita.
14 Asui kuaita uruyariwaita aintaumundu Paulu usu kutara parana turusuwaa rimbiwa kiti, maa Sila Timuteu yuiri aintauikure aintairumu.
15 Asui kuaita urasuwaita Paulu aintaurasu ae Atena kiti, asui umundu ainta aintaumbeu arama Sila Timuteu supe yuiri aintauri arama ipiri kutara maye aintaupuderi, asui aintauyuiri.
Paulu umbue Atena upe
16 Asui sasiyara Paulu ipia usaruwaa upe aintauri ipiri Atena kiti nyãse umaa teresemu idulu irumu kua tetama.
17 Asui uyupurungita judewita irumu aintasinaguga upe kuaita yuiri tiwaita judeu umanduariwaita Deus aintairumute yuiri kuaita uikuwaita ukara kiti muiri ara.
18 Asui yepeyepe ukuawawaita epikurewita estuikuita yuiri aintauyusuaxara irumu, asui yepeyepe unyee:
—Maataa usikari umbue kua upurungitawaa maya? Amuita aintaumbeu:
—Yakuawa sã umbue apekatuwaraita tupana rese. Yawe ainta unyee nyãse umbue Jesus rese upaka manusawa sui.
19 Ape aintaupisika ae asui aintaurasu ae aintauyumuatiriwerawaa upe serawaa Areupagu, asui aintaunyee ixupe:
—Maitaa rexari yakuawa maataa kua nyenga pisasuwaa kua rembuewaa?
20 Nyãse reruri yande arama nyenga tiwa yakuawa yaputariwaa maa yakuawa mayesawa kua rembeuwaa.
21 Nyãse kuaita Atena upewaraita aintayuiri kuaita uriwaita apekatu sui uikuwaita akiti anyunte aintaugustari aintaumbeu nyenga pisasuwaa rese, aintaugustari yuiri aintausendu nyenga pisasuwaa.
22 Asui Paulu upuamu aintauyumuatiriwerawaa piterupi umbeu ainta supe:
—Penye apigawaita Atenawaraita, hakuawa kirimbawa pemanduari kuaita petupanaita.
23 Asui hawatawaa upe hamaa peretama upe hamaa kuaita pemanduari aramawaita petupanaita, asui hamaa yuiri yepe idulu rendawa pempinimawaa sese: Ixupe kua tupana tiwa yakunyeseri. Asui kuiri hambeu penye arama sese nyã pemanduariwaa tiwa pekunyeseri.
24 Kua Deus umunyawaa kua mundu panye kuaita mundu puraita yuiri iwaka ruixawa ae kua mundu ruixawa yuiri ae, timaa uiku uka (templu) upe aintaumunyawaa aintaipu irumu kuaita apigawaita.
25 Timaa nungara watari ixupe yapuderi arama maa yawajudari ae yaneipu irumu, nyãse aete uxari yapaka muiri yande uxari yande arama yasiki arama yaneanga uxari yande arama panye maa.
26 Asui yepe sui umunya panye kuaita miraita aintauiku arama panye mundu upe asui uxari ainta supe aintarangawa aintaretama arama yuiri.
27 Aintausikari arama Deus aintausaru arama aintauwasemu ae aintaumanduarisawa irumu. Maa timaa apekatu uiku yanesui.
28 Nyãse ae uxari yapaka yande uxari yanepira kirimbawasawa, uxari yaiku kua mundu upe kuaye aintaumbeuwaa yawe yuiri kuaita pesuiwaraita umpinimawaita aintaunyee:
—Nyãse yande yuiri isuiwaraitate yande panye.
29 Ape Deus suiwaraitate yande timaa yapuderi yamanduari yepewasute ae uru irumu u prata irumu u ita irumu kuaita aintaumunyawaita aintaipu irumu kuaita apigawaita kuaye aintaumanduarisawa uputariwaa yawe.
30 Timaa Deus umanduari aintaumunyawaita puxuwerawa tiramere aintaukuawa, maa kuiri umundu panye kuaita apigawaita kua mundu upe sasiyara arama aintaumanduari aintapekadu.
31 Nyãse uxari sangawa yepe ara umbeu arama aintaresewara panye kuaita mundu puraita, uxari kuri yepe apigawa purangawaa umbeu aintarese, asui uxari panye apigawaita ukuawa supiwa ae usupiri resewara ae manusawa sui.
Amuita ukasuari, amuita aintauruyari
32 Asui aintausendu irumu umbeu yayuiri yapaka manusawa sui yepeyepe ukasuari ae, maa kuaita amuita aintaumbeu:
—Amu viaji yaputari yasendu inde arama yawewaa rese.
33 Asui Paulu uyuiri aintapitera sui.
34 Maa yepeyepe apigawaita aintauyumuatiri ipiri asui aintauruyari inyenga, yepe aintasuiwara serawaa Diuniziu aete yepe Areupagu ruixawa, asui yepe kunya yuiri serawaa Damari asui amuita yuiri.
