Luka 13:1-35
13 Apete yepeyepe nyã tempu aintaumbeu Jesus supe aintarese kuaita Galileya suiwaraita Pilatu uyukáwaita aintausapiwaa upe nimbawa Deus supe.
2 Maa umbeu ainta supe:
—Maitaa pemanduari aintaumunya turusu piri aintapekadu arama aintasui kuaita amuita Galileya upewaita nyãse aintaupurara yawewaa?
3 Umbaa, asui hambeu penye arama, tirame sasiyara pemanduari pepekadu rese pekanyemu kuri kuaye aintayawe.
4 Maitaa pemanduari puxuwera piri kuaita dezuitu apigawaita ture uwariwaa aintarese aintasui panye kuaita amuita Jeruzalẽ upewaita?
5 Umbaa, asui hambeu penye arama, tirame sasiyara pemanduari pepekadu rese pekanyemu kuri maye aintayawe.
Figera iyaimawaa
6 Asui Jesus umbeu ainta supe yepe inyenga umbuewaa rupiara ainta, unyee:
—Yepe apigawa uyutima yepe figera ikupixawa upe, asui uri usikari iya maa timaa uwasemu.
7 Asui umbeu kupixawa usarusara supe, musapiri akayu hasikari iya maa timaa hawasemu remunuka ae, marantaa yaxari umuapatuka retentu kua iwi?
8 Asui usuaxara ixupe, seruixawa, rexarire ae yepe akayu hapikuĩ arama supita hamburi arama iwi ukaiwaa pisasuwaa supita upe.
9 Asui iya rame ae yepe akayu upe purangate, tirame iya ae asui repuderi rexari aintaumunuka ae.
Umukaturu yepe kunya mãsiwerawaa
10 Asui Jesus umbue ainta yepe sinaguga upe sauru rame.
11 Apete yepe kunya demuniu uxariwaa imãsi dezuitu akayu anyunte uyawika uwata tiupuderi upuamu satambika ipira.
12 Asui Jesus umaa irumu ae, umbeu ixupe:
—Kunya, hayurawa inde nemãsisawa sui.
13 Asui uxari ipu sese asui aramete uyumusatambika ipira asui umee purangawaa Deus supe.
14 Asui kua usaruwaa sinaguga ipiaiwa ae umaa irumu Jesus umukaturu imãsiwaita sauru rame, asui umbeu ainta supe kuaita miraita:
—Aikuete seis ara yapuraki arama peyuiri pexari umukaturu penye seis ara upe, maa tepeyuiri sauru rame.
15 Asui yaneruixawa umbeu ixupe:
—Penye retentuwaita, maitaa timaa peyurawa perimbawa tapira jumentu yuiri sauru rame perasu arama ae uu ii.
16 Marantaa tiyapuderi yayurawa kua kunya Abraão rimiariru sauru ara rame, nyãse dezuitu akayu Yurupari umprezuwaa ae?
17 Asui umbeu irumu kua inyenga aintauyumutiĩ kuaita suanyanaita panye. Maa panye kuaita miraita suuri aintaumaa kua purangawaa Jesus umunyawaa.
Nyenga mustarda karusu rese
18 Asui umbeu:
—Maa yawetaa kuaita Deus imiraita? Maa yawetaa haseruka ainta?
19 Iyawe ainta yepe mitima mustarda karusu yawe yepe apigawa uyutimawaa ikupixawa upe, asui uyukiriari kuaye mirá yawe, asui kuaita wirá mirita aintauri aintaumunya aintaruka sakanga rese.
Nyenga maniaka saiwaa rese
20 Asui umbeu xinga:
—Maa yawetaa haseruka kuaita Deus imiraita?
21 Iyawe ainta kua maniaka saiwaa upisikawaa yepe kunya asui umunani ae ukitikawaa irumu ate sai arama ae panye.
Ukena kuairawaa
22 Asui Jesus usasawa aintaretama turusuwaa kuairawaa yuiri umbue ainta, usuwaa upe Jeruzalẽ kiti.
23 Asui yepe upurandu ae:
—Seruixawa, maitaa muiriira kuaita uyumukaturuwaita?
24 Asui umbeu ainta supe:
—Pesikari kirimbawa pewike arama ukena kuairawaa rupi, nyãse hambeu penye arama siya kuri usikari uwike maa timaa kuri aintaupuderi.
25 Upuamu rire kua uka iyara usikindawa arama ukena, asui penye pepuamu ukara kiti peyupiru kuri pesenui, pembeu ixupe:
—Yaneruixawa repirari yande arama ukena. Asui usuaxara kuri penye arama:
—Tihakuawa maa suiwarataa penye.
26 Asui pembeu kuri ixupe:
—Yambau yau yuiri neirumu, asui rembue yande yanerendawa upe.
27 Maa umbeu kuri penye arama:
—Tihakuawa maa suiwaraita penye pesuana sesui panye penye umunyawaita puxuwera.
28 Ape kuri peyaxiu pesuu peranya pemaa irumu kuri Abraão Izaki yuiri Jaku yuiri panye kuaita utitikawaita yuiri maa penye aintaumburi kuri penye.
29 Siya kuri aintauri kurasi usemuwaa sui uwikewaa sui yuiri panye mundu iarukanga asui yuiri aintauwapika kuri meza ruaki Deus imiraita irumu.
30 Maa siya kuaita aintarakakuerawaita aintarundewaraita kuri ainta, asui kuaita aintarundewaraita aintarakakuerawara kuri ainta.
Sasiyara Jesus Jeruzalẽ rese
31 Asui nyã ura aintauri yepeyepe farizewita aintaumbeu ixupe:
—Purangate reyuiri yanesui, resuana yanesui nyãse Erudi uputari uyuká inde.
32 Maa usuaxara ainta:
—Pesu pembeu ixupe nyã yawarate hamburi kuri demuniu uyi ara wirande yuiri hamukaturu kuri mãsiweraita asui musapiri ara rire hambauwaa kuri.
33 Maa harikute hawata uyi ara wirande yuiri amu wirande yuiri nyãse tiyapuderi yaxari yepe utitikawaa umanu Jeruzalẽ sui.
34 Inde Jeruzalẽ, inde Jeruzalẽ, inde uyukáwaa kuaita utitikawaita, inde uyukáwaa itaita upe kuaita hamunduwaita nepiri, siya viaji haputari hamuatiri nerairaita kuaye sapukaya umuatiriwaa yawe imembira ipepu wirupi maa timaa peputari.
35 Ape iyaraima kuri peruka panye. Supiwa hambeu penye arama, tikuri pemaa ixe ate pembeu rame kuri, suuriwaa kuri kua uriwaa yaneruixawa Deus rera rese.