Luka 15:1-32
15 Asui aintaumusuaki Jesus panye kuaita publikanuita panye pekaduruita yuiri.
2 Asui aintauyupurungita kuaita farizewita kuaita umpinimawaita yuiri aintaunyee:
—Kua apigawa usuanti kuaita pekaduruita asui umbau aintairumu.
Uvelya uyusupariwaa
3 Asui Jesus umbeu ainta supe kua inyenga umbuewaa rupiara ainta,
4 Mayewataa apigawa pesuiwara urikuwaa sem uvelya asui uyusupari rame yepe aintasuiwara, maitaa tiuxari kuaita amuita nuventa nuvi iyaraimawaa upe usu arama usikari nyã uyusupariwaa ate uwasemu ae?
5 Asui uwasemu rame ae usupiri ae, suuri ipia turusu.
6 Asui uyuiri suka kiti umuatiri ianamaita sumuaraita yuiri umbeu ainta supe:
—Peyumusuuri seirumu nyãse hawasemuana seuvelya uyusupariwaa.
7 Hambeu penye arama:
—Yawete yuiri suuri piri kuri kuaita iwaka upewaita sesewara yepe pekaduru sasiyarawaa umanduari ipekadu aintasui kuaita nuventa nuvi purangawaita tiwaita sasiyara aintaumanduari aintapekadu.
Prata ukanyemuwaa
8 Mayewataa kua kunya urikuwaa dezi prata ukanyemu rame yepe aintasuiwara, tiserá umundeka ituri, asui upiri suka usikari arama ae ate uwasemu ae.
9 Asui uwasemu rire ae umuatiri panye iamuita sumuaraita yuiri umbeu:
—Peyumusuuri seirumu nyãse hawasemuana kua prata ukanyemuwaa.
10 Yawete yuiri, hambeu penye arama:
—Suuri kuri Deus anjuita sesewara yepe pekaduru sasiyarawaa umanduari ipekadu.
Taira uxariwaa ipaya
11 Asui umbeu:
—Yepe apigawa uriku mukuĩ taira.
12 Asui kua taira tainawaa umbeu ipaya supe:
—Sepaya, rexari ixe arama seyara arama nemaa suiwara. Asui upartiri ainta supe ae.
13 Asui nẽre siya ara rire imu tainawaa umuatiri panye imaa usu arama yepe tetama kiti apekatu, akiti umburi panye imaa ipuxuwerasawa rese.
14 Asui umburi rire panye imaa aintaupurara yumãsi panye nyã tetama upe, asui uyupiru yuiri upurara ae.
15 Asui usu uiku irumu yepe apigawa apewara, asui umundu ae kampu kiti usaru arama tayasu.
16 Asui suuri yepe umanduari umbau arama tayasu rimbiu maa tiawa uxari ixupe arama.
17 Asui ukuawana umanduari ixupe umbeu ixupe aramate:
—Muiri kuaita upurakiwaita sepaya supe aintauriku turusu pão usikasawa panye ainta supe, maa ixe hapurara haiku ike yumãsi.
18 Hapuamu kuri hasu sepaya ipiri asui hambeu kuri ixupe, hamunya puxi Deus supe inde arama yuiri.
19 Kuiri tipuranga ixe reseruka arama neraira ixe, kuiri remaa ixe aintayawe kuaita upurakiwaita inde arama.
20 Asui upuamu usu ipaya ipiri, asui usu apekatu xingare ipaya umaa ae, asui pirasuawaa umaa ixupe asui uyana suaxara uyumana ae ubejari ae.
21 Asui taira unyee ixupe:
—Sepaya, hamunya puxi Deus supe inde arama yuiri, tipuranga reseruka neraira ixe.
22 Maa ipaya umbeu ainta supe kuaita upurakiwaita:
—Peruri kutara rupa purangawaa pemundeu ixupe, asui pexari anelu idedu rese, asui peruri sapatu pemundeu ipi rese.
23 Asui peruri nyã vaka miri ikirawaa peyuká ae, asui yambau arama ae asui yayumusuuri arama.
24 Nyãse kua seraira umanuwaa kuera ae kuiri upakana ae, kuxima uyusupari ae kuiri yawasemuana ae. Asui aintauyupiru aintauyumusuuri.
25 Asui kua imu tuyuwesawa uikure kupixawa kiti asui uyuiri irumu kuayentuana uka sui usendu aintaunyengari aintaupurasi yuiri.
26 Asui usenui yepe upurakiwaa upurandu ae, maataa aintaumunya uiku.
27 Asui umbeu ixupe:
—Nemu uyuiriana asui nepaya uxari aintauyuká kua vaka miri ikirawaa nyãse taira uyuiriana purangate usuanti ae.
28 Asui ipiaiwa ae, asui tiuputari uwike aintairumu, asui ipaya usemu ipiri upurandu ae uwike arama.
29 Maa usuaxara ipaya siya akayu hapuraki inde arama nẽ yepe viaji tihasuaxara nenyenga, maa nẽ yepe viaji rexari ixe arama yepe kabritu hambau arama hayumusuuri arama seanamaita irumu.
30 Maa uyuiri rame kua neraira umburiwaa nemaa aintarese kuaita kunyaita warixiwaita anyunte rexari aintauyuká kua vaka miri ikirawaa.
31 Asui umbeu ixupe:
—Seraira, seirumute inde yawewarawate, neyarate panye maa semaa.
32 Ape yarikute yayumusuuri turusu nyãse kua nemu umanuwaa kuera ae asui upakana ae, uyusupariwaa kuera ae asui yawasemuana ae.
