Luka 16:1-31
16 Asui umbeu yuiri umbuewaita supe:
—Yepe apigawa rikuwaa uriku yepe impregadu usaruwaa imaa, asui aintaumbeu puxuwera sese umburi ipatrão iyara.
2 Asui umundu aintausenui ipiri ae, umbeu ixupe:
—Maataa kua hasenduwaa nerese? Remunya kunta kuiri remukame hamaa mayetaa remunyawaita nyãse kuiri tirepuderi resaru semaa.
3 Asui kua usaruwaa imaa uyumanduari aepawate uyumbeu:
—Maataa kuri hamunya nyãse tiana sepatrão uxari hasaru imaa? Tihapuderi hapikuĩ iwi tiyuiri hapuderi hapurandu hambau arama yawaite hayumutiĩ.
4 Kuiri hakuawana maitaa kuri hamunya aintausuanti arama ixe aintaruka upe sepatrão umbeu rireana tihapuderi hasaru imaa.
5 Asui usenui kuaita udeveriwaita ipatrão supe umbeu ixupe kua primeruwaa:
—Muiritaa redeveri sepatrão supe?
6 Usuaxara ae:
—Hadeveri sem lata azeti. Asui umbeu:
—Repisika nekunta kutara rempinima sinkuenta.
7 Asui upurandu amu:
—Muiritaa redeveri? Ape umbeu:
—Sem lata trigu. Asui umbeu ixupe:
—Repisika nekunta rempinima uitenta.
8 Asui ipatrão umbeu nyenga purangawaa sese kua usaruwaa puxuwera nyãse umunya puranga ukuawawaa yawe. Nyãse kuaita mundu rairaita ukuawawaita ainta aintasui kuaita turi rairaita.
9 Asui hambeu penye arama:
—Pesikari penye arama peanamaita arama pemunya resewara ainta supe puranga pedinyeru ugananiwaa irumu ape kuri watari rame penye arama ae aintausuanti kuri penye aintaruka upe yawewarawate.
10 Kua umunyawaa puranga uriku rame kuaira umunya kuri yuiri puranga uriku rame turusu, kua ugananiwaa uriku rame kuaira uganani yuiri kuri uriku rame turusu.
11 Ape peganani rame irumu kua pedinyeru ugananiwaa, awataa kuri uputari uxari pemaa arama supiwa?
12 Ape tirame pemunya puranga amuita imaa irumu, awataa kuri uxari penye arama peyara arama?
13 Nẽ awa upuderi upuraki mukuĩ patrão supe, nyãse puxi umaa amu supe asui ugustari kua amu, u uruyari amu inyenga asui tiuruyari kua amu inyenga. Tipepuderi pepuraki Deus supe pepuraki pukusawa pedinyeru arama.
Umbeu farizewita supe
14 Asui kuaita farizewita ugustariwaita aintadinyeru aintausendu irumu panye kua inyenga aintaukasuari ae.
15 Maa Jesus umbeu ainta supe:
—Penyete pemunya puranga apigawaita umaa arama penye, maa Deus ukuawate pepia upe, nyãse kua aintausupiriwaa aintaumaa arama kuaita apigawaita puxuwerawa yawe Deus umaa ae.
16 Aintauruyari Muize umpinimawaa utitikawaita nyenga yuiri ate Juão tempu rame, asui arire aintaumbue ainta supe kua nyenga purangawaa imiraita arama ainta kua Deus, asui panye kuaita miraita aintausikari aintauwike arama.
17 Iwasuima xinga usasawa panye iwaka panye kua mundu yuiri isui ukanyemu yepe letra Muize umpinimawaa sui.
Tepexari perimiriku
18 Awa umuyuiri rame ximiriku umendari arama amu kunya irumu warixiwaa ae, asui warixiwaa yuiri nyã umendariwaa irumu kua kunya imena uxariwaa.
Lazaru rese
19 Asui umbeu yuiri ainta supe:
—Yepe apigawa rikuwaa umundeu fazenda pirangawaa purangawaa asui muiri ara umbau turusu purangawaa.
20 Asui ukara kiti uyenu yepe pirasuawaa urikuwaa iperewa sera Lazaru.
21 Asui usikari umbau kuaita umukukuiwaita kua rikuwaa meza sui, asui aintauri kuaita yawara aintausereu iperewa.
22 Asui umanu kua pirasuawaa asui kuaita anjuita aintaurasu ae Abraão putia ruaki, asui umanu yuiri kua rikuwaa asui aintaumburi ae iwi kuara upe.
23 Asui upurarawaa upe uiku infernu upe kua rikuwaa kuera usupiri iakanga umaa apekatu kiti Lazaru uwapika Abraão putia ruaki.
24 Asui usasemu unyee:
—Inde seramunya Abraão pirasuawaa remaa ixe arama remundu Lazaru uri umuyapumi idedu rakapira ii upe umururu arama seapeku, nyãse, turusu hapurara haiku ike tata upe.
25 Maa Abraão umbeu ixupe:
—Inde seraira, remanduari panye kua purangawaa rerikuwaa repaka ramere inde, yawete yuiri kua Lazaru uriku kuera panye puxuwera maa kuiri ae uyumusuuri, asui inde repurara.
26 Asui Deus uxari yanepiterupi tiipiwaa tiarama aintaupuderi usasawa nepiri kuaita uputariwaita usu akiti, tiarama yuiri aintaupuderi aintauri yanepiri kuaita uikuwaita ape.
27 Asui unyee:
—Inde seramunya, hapurandu inde remundu arama ae sepaya ruka kiti.
28 Nyãse hariku sinku semuita umbeu arama ainta supe tiarama aintauri aintaupurara ike.
29 Maa Abraão umbeu:
—Aintaurikute Muize umpinimawaa utitikawaita yuiri, rexari aintausendu ainta supe.
30 Maa umbeu:
—Tiyawe, inde seramunya Abraão, uri rame maa aintapiri yepe aintasuiwara kuaita umanuwaita aintautrukari maa aintapia.
31 Asui Abraão usuaxara ae:
—Tirame aintauruyari Muize nyenga aintanyenga yuiri kuaita utitikawaita tiyuiri aintauruyari usemu rame maa yepe manusawa sui.