Luka 17:1-37
17 Asui Jesus unyee umbuewaita supe:
—Aintaurikute aintauyuganani xingare maa puxuwera kuri usika sese kua apigawa ugananiwaa ainta.
2 Purangate yapukuari iayura upe ita ipusewaa yamburi arama parana tiipiwaa kiti kua uxariwaa umunya puxi yepe aintasuiwara kuaita ipuiwaita.
Muiri viajitaa yaperduari amuita
3 Pemaa pesui. Umunya rame inde arama puxi kua nemu rembeu ixupe ipekadu, sasiyara rame umanduari ipekadu ape reperduari ae neirumu.
4 Asui umunya rame puxi inde arama seti viaji yepe ara upe asui seti viaji uri nepiri umbeu inde arama sasiyara umanduari ipekadu, rerikute reperduari ae neirumu.
5 Asui aintaumbeu ixupe kuaita apustuluita:
—Yaneruixawa rexari yaruyari turusu piri.
6 Asui Yaneruixawa umbeu ainta supe:
—Peruyari rame puranga kuaye mustarda karusu yawe pembeu kuri ixupe kua mirá amurera, resaka resu repuamu parana kiti, asui uruyari kuri penyenga.
7 Mayewaa pesuiwara urikuwaa yepe upurakiwaa ixupe ikupixawa kiti u usaruwaa iuvelya, asui uyuiri irumu kupixawa sui umbeu kuri ixupe kua upurakiwaa, reyuiriana rewapika meza ruaki rembau?
8 Maa umbeu kuri ixupe, remunya hambau arama, asui remukaturu nerupa, asui resaru ixe hambau hauwaa upe, asui serakakuera rembau reu yuiri.
9 Maitaa kuri urikute umbeu ixupe kuekaturete umunya resewara kua umunduwaa umunya?
10 Yawete yuiri penye pemunya rire kua umunduwaa pemunya, pembeu kuri upurakiwaita yande tiwaita maa arama yande, anyunte yamunya kua yarikute yamunya.
Umukaturu dezi lepruzuita
11 Asui usuwaa upe Jeruzalẽ kiti Jesus usu usasawa Samaria pitera rupi Galileya upe yuiri.
12 Asui uwike irumu yepe tetama kiti aintauri suaxara dezi lepruzuita.
13 Asui aintaupuamu apekatu isui aintausasemu aintaumbeu:
—Inde Jesus umbuewaa pirasuawaa remaa yande arama.
14 Asui Jesus umaa irumu ainta, umbeu ainta supe:
—Pesu pemukame saserdutita umaa penye. Asui aintausuwaa upe ikatuana ainta.
15 Asui yepe aintasuiwara umaa irumu ikatuana ae, uyuiri umee arama turusu purangawaa Deus supe.
16 Asui uyawika ate suwa uyenu iwi rese Jesus ipi ruaki, asui umee purangawaa ixupe. Samariawara ae.
17 Asui Jesus upurandu ae:
—Maitaa tideziwaita penye hamukaturuwaita, maa kititaa kuaita amu nuviwaita?
18 Maitaa timaa yepe uyuiri umee purangawaa Deus supe isui kua apekatu suiwara?
19 Asui umbeu ixupe:
—Repuamu resuana nyãse reruyari resewara ikatuana inde.
Deus miraita arama kuri ainta
20 Asui kuaita farizewita aintaupurandu irumu Jesus irumu Deus rangawa rese aintaruixawa arama ae umbeu ainta supe:
—Tiyamaa yaneresa irumu maye yaneruixawa arama kua Deus.
21 Tiyuiri kuri aintaumbeu:
—Pemaa ae ike u pemaa ae mikiti, nyãse peruixawa arama ae pepia upe.
22 Asui umbeu ainta supe kuaita umbuewaita:
—Yepe ara kuri peputari pemaa kua unaseriwaa umaa kua ara, maa tikuri pemaa ae.
23 Asui aintaumbeu kuri penye arama, pemaa ae ike, pemaa ae mikiti. Tepesu ipiri tiyuiri pesu aintarakakuera.
24 Nyãse kua truvão wera umuturiwaa yawe panye iwaka arukanga rupi yawete yuiri kuri uri rame kua unaseriwaa umaa kua ara.
25 Maa senundere uri urikute upurara turusu aintaumburi kuri yuiri ae kuaita miraita kuiriwaraita.
26 Kuaye aintaumunyawaa yawe kuera Nue tempu rame yawete yuiri kuri aintaumunya uri rame kuri kua unaseriwaa umaa kua ara.
27 Kuaita miraita aintaumbau aintauu, aintauyuka aintarimiriku aintauxari kunya apigawa supe, ate Nue uwike batelão upe asui parana uwike asui aintaukanyemu panye.
28 Yawete yuiri aintaumunya Lo tempu rame aintaumbau, aintauu, aintaupiripana, aintauvenderi, aintauyutima, aintaumunya aintaruka arama.
29 Asui nyã ara Lo usemu Suduma sui tata uwari inxufri irumu uyuká ainta panye.
30 Yawete yuiri uri rame kuri kua unaseriwaa umaa kua ara.
31 Asui awa uiku uka arupi ipewawaa rese terexari uwiye uyuka imaa uka sui, yawete yuiri kua uikuwaa kupixawa upe terexari uyuiri.
32 Pemanduari kua Lo rimiriku rese.
33 Kua uputariwaa umukaturu isikuesawa ukanyemu kuri isui ae, maa kua umburiwaa isui isikuesawa uyumukaturu kuri ae.
34 Hambeu penye arama nyã pituna mukuĩ ukiriwaita kama upe uyuka kuri yepe asui uxari yepe.
35 Aintaukitikawaita kuri mukuĩ kunyaita uyuka kuri yepe asui uxari kuri amu.
36 Mukuĩ uikuwaita kuri kupixawa upe uyuka kuri yepe asui uxari kuri yepe.
37 Asui unyee umbuewaita supe:
—Yaneruixawa maa kititaa kuri kua rembeuwaa? Asui usuaxara ainta:
—Aintauyumuatiri kuaita urubuita umanuwaa kuera rese.