Luka 18:1-43
18 Asui Jesus umbeu ainta supe yepe inyenga umbue aramawaa ipupe ainta aintaukuawa arama aintaurikute aintaupurandu Deus irumu yawewarawate tiarama aintakuere aintaupurandu.
2 Ape unyee:
—Yepe tetama upe yepe serakuenawaa tiusikie Deus sui tiyuiri urespetari amu apigawaita.
3 Apete yepe viuva kua tetama upe, yawewarawate usu ipiri upurandu umbeu:
—Reajudari ixe isui nyã umuruanyanawaa ixe.
4 Asui uyupirungawa upe tiuputari usendu ixupe maa arirewara uyumbeu ixupepawa:
—Tihasikie Deus sui tiyuiri harespetari apigawaita,
5 Maa uri kua viuva umuapatuka ixe ape hawajudari kuri ae yawaite uri umuapatuka ixe yawewarawate.
6 Asui yaneruixawa umbeu:
—Pemanduari sese kua umbeuwaa kua serakuenawaa puxuwerawa.
7 Maitaa tiserá Deus uajudari kuaita uparawakawaita upuranduwaita irumu ara rame pituna rame yuiri? Maitaa usaru uikupuku uajudari arama ainta?
8 Hambeu penye arama, kutara kuri uajudari ainta. Ape maitaa kuri uwasemu aintauruyari puranga kuaita mundu puraita uri rame kuri kua unaseriwaa umaa kua ara?
Farizeu publikanu yuiri
9 Asui umbeu ainta supe yepe inyenga umbue aramawaa ipupe ainta kuaita umanduariwaita purangawaita ainta asui puxi aintaumaa amuita rese.
10 Mukuĩ apigawaita aintausu templu kiti aintaupurandu arama Deus, yepe farizeu yepe publikanu.
11 Asui kua farizeu upuamu upurandu Deus irumu ixupe aramantu, yawe unyee:
—Inde Deus hamee inde arama purangawaa nyãse tihamunya aintaumunyawaa yawe kuaita amu apigawaita mundawasuita, ugananiwaita, uxariwaita aintarimiriku, tiyuiri hamunya kuaye umunyawaa yawe kua publikanu.
12 Ixe hayukuaku mukuĩ viaji yepe semana upe, asui hamee dizimu panye haganyariwaa suiwara.
13 Asui kua publikanu upuamu apekatu tiumaa iwate kiti nẽ kuaira, asui unupa iputia upe asui umbeu:
—Inde Deus pirasuawaa remaa ixe puxuwerawa.
14 Hambeu penye arama:
—Kua publikanu uyuiri suka kiti tiana uriku ipekadu maa kua farizeu tiyawe, nyãse kua uputariwaa aintaara kiti piriwaa ae aintawira kiti kuri ae, maa kua uputariwaa aintawira kiti ae aintaara kiti kuri ae.
Uabensuari tainaita
15 Asui aintaurasu ixupe tainaita uxari arama ipu aintarese, asui kuaita umbuewaita aintaumaa irumu aintausaisu aintauri.
16 Maa Jesus usenui ainta ipiri unyee:
—Pexari aintauri sepiri kuaita tainaita tepesaisu ainta nyãse imiraita arama ainta kua Deus.
17 Supiwa hambeu penye arama, awa tiusikari Deus imira arama ae kuaye taina usikariwaa yawe tikuri imira arama ae.
Yepe rikuwaa
18 Asui yepe serakuenawaa upurandu ae:
—Inde umbuesarawaa purangawaa, maataa kuri hamunya hariku arama mundu nunkawaa upawa?
19 Asui Jesus usuaxara:
—Marantaa reseruka purangawaa ixe? Tiyamaa yepe purangawaa Deus sui.
20 Rekuawate kua Deus umunduwaa, teresikari amu kunya nerimiriku sui, tereyuká mira, teremunda, terembeu marandua reganani amuita rese, rerespetari nepaya nemaya yuiri.
21 Asui usuaxara:
—Hamunyapawate ae panye setaina suiwara.
22 Asui Jesus usendu irumu inyenga unyee:
—Watari nerunde yepe, resu revenderi panye nemaa asui remee sikuyara ainta supe kuaita pirasuawaita, ape kuri reriku purangawaa iwaka kiti, asui reyuiri serakakuera.
23 Asui usendu irumu kua inyenga sasiyara ipia nyãse rikuwaa ae turusu.
Yanemaa yawaitewaa
24 Asui Jesus umaa irumu sasiyara kua rikuwaa umbeu:
—Iwasu xinga aintausikari aintaruixawa arama kua Deus kuaita rikuwaita.
25 Iwasuima xinga kamelu uwike awi resa kuara rupi isui yepe rikuwaa usikari suixawa arama kua Deus.
26 Asui kuaita usenduwaita aintaunyee:
—Yawe rame awataa kuri upuderi uyumukaturu?
27 Asui umbeu ainta supe:
—Deus upuderi umunya kua tiwa apigawaita upuderi umunya.
28 Asui Pedru unyee:
—Remaa yande, yaxariana yaneruka yasu arama nerakakuera.
29 Asui Jesus usuaxara ainta:
—Supiwa hambeu penye arama, panye kuaita uxariwaita aintaruka, aintarimiriku, aintaimuita, aintapayaita, aintarairaita, Deus imiraita resewara,
30 Aintauwasemu kuri turusu piri kuiri kua mundu upe asui aintauriku kuri kua mundu nunkawaa upawa.
Jesus umbeu umanu kuri
31 Asui urasu irumu kuaita duziwaita umbeu ainta supe:
—Kuiri yasu Jeruzalẽ kiti, asui akiti kuri aintaumunya ixupe kua unaseriwaa umaa kua ara panye kua aintaumpinimawaa sese kuaita utitikawaita.
32 Aintauxari kuri ae ainta supe kuaita tiwaita judeu, aintaukasuari kuri ae, aintaumunya kuri panye puxuwerawa ixupe, aintautumuna kuri sese,
33 Asui aintausurari rire kuri ae aintauyuká kuri ae, maa uyuiri kuri upaka musapiri ara rire.
34 Maa tiaintaukuawa mayesawataa kua umbeuwaa nyãse uyusikindawa aintasui panye kua nyenga umbeuwaa, sesewara tiaintaukuawa mayesawataa ae.
Umukaturu sesaimawaa Jeriku upe
35 Asui aintauriwaa upe kuayentu Jeriku sui yepe sesaimawaa uwapika pee rimbiwa upe upurandu miraita irumu esmula.
36 Usendu irumu aintausasawa kuaita miraita siyawaita upurandu:
—Awataa nyã?
37 Asui aintaumbeu ixupe:
—Jesus nyã usasawawaa Nazare suiwara.
38 Asui usasemu:
—Inde Jesus Davi rimiariru pirasuawaa remaa ixe arama.
39 Asui kuaita miraita usuwaita aintarunde kiti aintaumukiriri ae, maa usasemu kirimbawa piri:
—Inde Davi rimiariru pirasuawaa remaa ixe arama.
40 Asui Jesus usika upuamu asui umundu aintaururi ipiri ae, asui usika rire upurandu ae:
41 —Maataa reputari hamunya inde arama? Asui usuaxara:
—Seruixawa rexari hamaa mukuĩsawa.
42 Asui Jesus umbeu ixupe arama:
—Haxari neresa umaa, reruyari resewara ikatuana inde.
43 Asui aramete umaawana, asui usu sakakuera umee purangawaa Deus supe. Panye kuaita miraita yuiri aintaumaa irumu ae aintaumee purangawaa Deus supe.
