Luka 2:1-52
2 Asui nyã ara aintaruixawa Sezar Augustu umundu aintaupapari muiri aintasiyasawa panye kuaita mundu puraita iyaraita.
2 Yawe aintauyupiri aintaupapari muiri aintasiyasawa, guvernaduru rame Siria upe, kua Kirinu.
3 Asui panye miraita aintausu aintaretama kiti, aintauxari arama aintaupapari ainta.
4 Asui Juze yuiri usemu Nazare sui Galileya upewara usu arama Judeya kiti Belẽ kiti, kua Davi retama, nyãse, Davi rimiariru ae.
5 Uxari arama aintaupapari ae, ximiriku Maria irumu ipuruãwaa ae.
6 Ape pukusawa aintauiku, usika sangawa unaseri arama isui kua imembira.
7 Asui unaseri imembira primeruwaa, asui upupeka ae panu irumu asui uxari uyenu nimbawa umbauwaa riru upe, nyãse, tiaintauwasemu aintaukiri arama uka upe siya resewara miraita.
Anjuita unyengari
8 Asui kuayentu tetama sui kuaita usaruwaita uvelya aintauiku kampu upe, aintausaru uvelyaita pituna rame.
9 Asui yepe yaneruixawa anju uwiye aintapiri, asui yaneruixawa umuturi aintarese kirimbawa, ape aintausikie turusu isui.
10 Asui kua anju umbeu ainta supe:
—Tepesikie nyãse haruri penye arama kuekatu purangawaa suuriwaa ainta supe arama panye kuaita mundu puraita.
11 Nyãse uyi ara unaseri umaa ara, peresewara Davi retama upe yepe umukaturu aramawaa penye, aete kua Kristu yaneruixawa.
12 Pepuderi kuri pekuawa supiwa kua hambeuwaa, nyãse, pewasemu kuri kua taina aintapupekawa panu irumu, uyenu nimbawa umbauwaa riru upe.
13 Asui kutarantu aintauiku irumu kua anju siya anjuita iwaka upewaita aintaumee purangawaa Deus supe, aintaunyee:
14 —Pemee purangawaa Deus supe iwaka kiti, asui pexari timaarese kuaita miraita kua mundu upe, kuaita ugustariwaita.
15 Ape aintausu irumu aintasui iwaka kiti, kuaita anjuita, kuaita usaruwaita uvelya aintauyupurungita aintapawa:
—Yasuana yamaa Belẽ kiti yamaa arama kua usasawawaa akiti, kua yaneruixawa uxariwaa yakuawa.
16 Asui aintausu kutara, ape aintauwasemu Maria Juze yuiri asui kua taina uyenu uiku nimbawa umbauwaa riru upe.
17 Asui aintaumaa irumu ae, aintaumbeu amuita supe, panye aintausenduwaa sesewara kua taina.
18 Asui muiri kuaita usenduwaita aintaumbeuwaa kuaita usaruwaita uvelya aintaakayemu aintausendu.
19 Maa Maria umukaturu ipia upe panye kua aintaumbeuwaa asui umanduari sese.
20 Asui kuaita usaruwaita uvelyaita aintauyuiri aintaumee purangawaa Deus supe aintaumuturusu ae yuiri sesewara panye kua aintaumaawaa aintausenduwaa kuaye anju umbeuwaa yawe ainta supe.
Aintausirkunsidari Jesus
21 Asui uitu ara rire aintauxari irumu aintausirkunsidari ae aintauxari sera arama Jesus kuaye anju umbeuwaa yawe senundere uyupiru imaya marika upe.
Aintaurasu Jesus templu upe
22 Asui ikatuana imaya kuaye Muize umbeuwaa yawe aintaurasu ae Jeruzalẽ kiti aintauxari arama ae yaneruixawa supe,
23 Kuaye yaneruixawa umpinimawaa yawe inyenga upe, perikute pexari ixe arama panye apigawaita primeruwaita unaseri aintamaya sui.
24 Perikute pexari pesapi aramawaita kuaye kua inyenga umbeuwaa yawe mukuĩ rula u mukuĩ pumba.
Simeão umee purangawaa Deus supe
25 Ape yepe apigawa Jeruzalẽ upe sera Simeão, purangawaa kua apigawa yawewarawate umanduari Deus usaru umaa Deus uxari Israelitaita supe kua umbeuwaa, Espiritu Santu uiku irumu.
26 Asui Espiritu Santu uxari ukuawa tikuri umanu ae senundere umaa kua Kristu yaneruixawa Deus suiwara.
27 Asui kua Espiritu uxari usu templu kiti asui ipaya imaya aintaurasu kua taina Jesus aintaumunya arama ixupe kuaye inyenga kuximawara umunduwaa yawe,
28 Asui Simeão upisika ae iyuwa rese asui umee purangawaa Deus supe, unyee:
29 —Kuiri inde seruixawa rexari kua inde aramawaa usu timaarese kuaye rembeuwaa yawe.
30 Nyãse hamaawana seresa irumu kua remukaturu aramawaa ipupe.
31 Kua remunyawaa aintaumaawana panye kuaita miraita,
32 Kua turi aintaumaa aramawaa kuaita tiwaita judeu umuturi arama aintarese puranga kuaita nemiraita Israelitaita.
33 Asui kua taina ipaya imaya yuiri aintaakayemu aintausendu irumu kua umbeuwaa sese.
34 Asui kua Simeão uabensuari ainta, asui unyee ixupe kua Maria imaya kua kurumi:
—Remaa kua kurumi resewara aintaukanyemu kuri siya asui aintausemu kuri siya Israelitaita suiwara, aintaumbeu kuri turusu puxi sese.
35 Uyukuawa arama kuri panye kua aintaumanduariwaa aintapia upe kuaita siyawaita, asui inde yuiri kuri maye kua espada ukutukawaa yawe nepia kiti.
Ana rese
36 Ape yepe kunya utitikawaa sera Ana, Fanuel rayera ae, Aseru imira ae, waimiana ae, seti akayu uiku kuera imena ambira irumu umendari rire.
37 Viuvana kua kunya, uriku uitenta kuatru akayu, tiuxari templu anyunte umee purangawaa Deus supe muiri ara muiri pituna yuiri uyukuaku uiku upurandu arama Deus irumu.
38 Asui uri nyã ura umee purangawaa Deus supe, upurungita sesewara kua taina ainta supe kuaita Jeruzalẽ upewara panye usaruwaita kua umukaturu aramawaa ainta ipupe.
Jesus uyukiriari Nazare kiti
39 Aintaumbauwaa rire aintaumunya panye yaneruixawa umunduwaa inyenga upe aintauyuiri Galileya kiti aintaretama kiti sera Nazare.
40 Asui kua taina uyukiriari puranga, asui uyumuteresemu ukuawasawa irumu, asui kua Deus grasa uiku sese.
Jesus upita templu upe
41 Asui muiri akayu yaweyawe ipaya imaya aintausu Jeruzalẽ kiti aintaumaa arama festa paskua rame.
42 Asui Jesus urikuana duzi akayu aintausu yuiri kuaye aintaumunyawerawaa yawe akayu yaweyawe aintaumaa arama paskua.
43 Asui paskua rire aintauyuiri irumu kua kurumi Jesus upita Jeruzalẽ upe, maa ipaya imaya tiaintaukuawa sese.
44 Maa aintaumanduari uiku aintapiterupi kuaita amuita uyuiriwaita asui aintausu yepe ara, asui aintauyupiru aintausikari ae aintapiterupi kuaita aintaanamaita aintapiterupi yuiri kuaita aintaukunyeseriwaita.
45 Asui tiaintauwasemu ae asui aintauyuiri Jeruzalẽ kiti aintausikari arama ae.
46 Asui musapiri ara rire aintauwasemu ae templu upe uwapika aintapiterupi kuaita umbuewaita usendu ainta supe upurandu yuiri ainta.
47 Asui panye kuaita usenduwaita ixupe aintaakayemu aintausendu ukuawasawa kua usuaxarawaa yuiri.
48 Asui ipaya imaya umaa ae asui aintaakayemu yuiri aintausendu, asui kua imaya unyee ixupe:
—Sembira, marantaa remunya yawe yande arama? Nepaya ixe yuiri sasiyara yande yasikari inde.
49 Asui usuaxara unyee ainta supe:
—Marantaa pesikari ixe? Maitaa tipekuawa harikute haiku sepaya ruka upe?
50 Ape tiaintaukuawa mayesawataa kua inyenga umbeuwaa ainta supe.
51 Asui usu aintairumu Nazare kiti, asui uruyari ainta puranga. Maa kua imaya umukaturu ipia upe panye kua usasawawaa.
52 Asui Jesus uyukiriari puranga uriku kua ukuawasawa purangawaa, puranga Deus umaa ae miraita yuiri.
