Luka 20:1-47
20 Asui yepe ara umbuewaa upe uiku ainta, umbeu irumu miraita supe kua nyenga purangawaa templu upe, aintauri ipiri kuaita saserdutita ruixawaita umpinimawaita yuiri tuyuweita irumu.
2 Aintaunyee ixupe:
—Rembeu yasendu awa ukuawasawa irumu remunya panye remunyawaita, awataa uxari inde arama rekuawasawa?
3 Asui usuaxara ainta:
—Ixe yuiri hapurandu penye pembeu hasendu,
4 Maa suiwarataa Juão batizmu iwaka suiwara u apigawaita suiwara?
5 Asui aintauyupurungita aintapawa, aintaunyee:
—Yambeu rame iwaka suiwara ae, ape maa umbeu yande arama; marantaa tiperuyari ae?
6 Yambeu rame apigawa suiwara ae aintauyuká maa yande ita irumu kuaita miraita, nyãse, aintaumanduari utitikawaa kua Juão.
7 Asui aintausuaxara ae aintaunyee:
—Tiyakuawa maa suiwarataa ae.
8 Asui Jesus unyee ainta supe:
—Ixe yuiri tihambeu penye arama awa ukuawasawa irumu hamunya kua hamunyawaa.
Upurakiwaita puxuwerawaita
9 Asui uyupiru umbeu ainta supe yepe nyenga umbuewaa rupiara ainta, unyee:
—Yepe apigawa uyutima ikupixawa upe, asui uxari ae ainta supe kuaita upurakiwaita aintausaru arama ae, asui usu aintasui apekatu kiti uiku aramare aintasui uikupuku.
10 Asui sangawa upe umundu yepe upurakiwaa aintapiri kuaita usaruwaita ikupixawa aintaumee arama ixupe iya, maa kuaita usaruwaita aintaunupa ae arire aintaumundu uyuiri yawentu.
11 Asui umundu yuiri yepe upurakiwaa, maa aintaunupa yuiri ae asui aintaukasuari rire ae aintaumundu uyuiri yawentu.
12 Asui musapirisawa umundu yuiri yepe, asui aintaumperewa yuiri ae asui aintaumburi ae kupixawa sui.
13 Asui umbeu kua kupixawa iyara, maataa kuri hamunya? Hamundu kuri aintapiri seraira hagustariwaa, hakuawa ae kuri aintaurespetari.
14 Asui aintaumaa irumu ae kuaita usaruwaita kupixawa aintauyupurungita aintapawa, aete kua upisika aramawaa imaa yasu yayuká ae yaneyara arama kuri panye imaa.
15 Asui aintaumburi ae kupixawa sui, asui aintauyuká ae. Maitaa kuri umunya ainta supe kua kupixawa iyara?
16 Uri kuri umukanyemu kuaita usaruwaita asui uxari kuri ikupixawa amuita supe, asui aintausendu irumu ae aintaunyee:
—Tiyaputari yawe.
17 Maa Jesus umaa ainta supe umbeu:
—Mayesawataa kua aintaumpinimawaa kuxima? Kua ita aintaumburiwaa kuaita umunyawaita uka, sesete aintaumunya santa kua uka.
18 Asui kua uwariwaa sese kua ita upepena kuri, maa kua ita uwariwaa sese umukurui kuri ae.
Impustu rese
19 Asui nyã urate aintauputari aintaupisika ae kuaita saserdutita ruixawaita maa aintausikie miraita sui, nyãse aintaukuawa umbeu kua inyenga aintarese.
20 Asui aintausaru aintaumaa ae, asui aintaumundu ipiri yepeyepe uputariwaita aintauxari Jesus umanduari purangawaita ainta aintaupisika arama ae inyenga irumu aintaupuderi arama aintauentregari ae serakuenawaa supe guvernaduru supe yuiri.
21 Asui unyee umbuewaita supe:
—Inde umbuewaa, yakuawate supiwa rembeu rembue yuiri tireparawaka remaa kuaita miraita, maa rembue Deus rapee rese supiwa.
22 Maitaa purangate yamee Sezar supe kua impustu uputariwaa yaneirumu?
23 Maa Jesus ukuawa aintauputari aintausaã ae, umbeu ainta supe:
24 —Pemukame hamaa yepe dinyeru. Maa rangawataa kua uyariwaa dinyeru rese, awa rerataa kua uyariwaa sese? Aintaumbeu ixupe:
—Sezar iyara. Asui unyee ainta supe:
25 —Ape pemee Sezar supe Sezar iyara, asui pemee Deus supe Deus iyara.
26 Asui tiaintaupuderi aintaupisika ae inyenga irumu miraita umaawaa upe, asui aintaakayemu aintausendu ixupe, asui aintaukiriri.
Sadusewita rese
27 Asui aintauri ipiri yepeyepe sadusewita kuaita umbeuwaita tiyapaka manusawa sui.
28 Aintaupurandu ae:
—Inde umbuewaa, kuxima Muize umpinima yande arama yepe inyenga, umanu rame yepe apigawa tiuriku taira, imu uyuka yuiri ximiriku arama kua viuva umukiriari taira imu ambira supe.
29 Seti aintasiyasawa yepe apigawa rairaita, asui aintaimu uyuka ximiriku arama asui umanu ae tiuriku taira.
30 Asui yawete yuiri imu, asui imute yuiri, asui aintayaweyawe aintauyuka aintarimiriku ae.
31 Asui yawepawa aintaumanu kuaita setiwaita tiaintauriku aintaraira.
32 Asui anyu arama umanu yuiri kua kunya.
33 Asui aintaupaka rame kuri manusawa sui awa rimirikutaa kuri ae? Nyãse, aintarimiriku kuera ae kuaita setiwaita.
34 Asui Jesus umbeu ainta supe:
—Kuaita mundu puraita aintauyuka aintarimiriku, kunyaita aintauriku aintamena yuiri.
35 Maa kuaita purangawaita umaawaita kuri nyã amu mundu, kuaita upakawaita manusawa sui, tikuri aintauriku aintarimiriku tiyuiri aintauriku aintamena.
36 Ape tikuri aintaupuderi aintaumanu, nyãse yepewasu kuri ainta anjuita irumu, Deus rairaita ainta, nyãse upakawaa rairaita ainta.
37 Kuaita miraita aintaupaka kuri manusawa sui maye Muize umpinimawaa upe maye kuera Deus upurungitawaa ixupe mirá sui, asui umbeu:
—Abraão Deus ae, Izaki Deus ae, Jaku Deus yuiri ae.
38 Tiumanuwaita Deus ae kua Deus, maa ainta Deus ae kuaita upakawaita, nyãse upakawaita ainta panye ixupe.
39 Asui yepeyepe umpinimawaita unyee ixupe:
—Inde umbuewaa, puranga resuaxara ainta supe.
40 Asui arirewara tiaintaupuderi aintaupurandu ae.
Davi rimiariru kua Kristu
41 Maa Jesus upurandu ainta:
—Maitaa aintaupuderi aintaumbeu Davi rimiariru kua Kristu?
42 Nyãse Davi umbeu livru upe serawaa Salmu, yaneruixawa umbeu seruixawa supe, rewapikare sekatusawa sui,
43 Ate mairame kuri hamburi neruanyanaita neipi banku arama.
44 Davite umbeu kuera suixawa ae, ape maitaa maa ximiarirute ae?
Umbeu umpinimawaita supe
45 Asui umbeu ainta supe kuaita umbuewaita aintausenduwaa upe panye kuaita miraita.
46 Pemaa pesui kuaita umpinimawaita ugustariwaita uwata aintasaya ipukuwaa irumu ukara kiti miraita umukuema arama ainta, aintaugustari aintauwapika banku purangawaa rese aintasinaguga upe, aintaugustari yuiri aintauwapika serakuenawaita banku rese aintaumbauwaa upe.
47 Asui aintauganani aintaupisika aintaruka aintasui kuaita viuvaita asui aintaumunya urasão uikupuku tiarama uyukuawa aintarese, aintate aintaupurara kuri turusu piri sikuyara kua aintaumunyawaa.
