Luka 23:1-56
23 Asui aintaupuamu panye kuaita uyatiriwaita asui aintaurasu Jesus Pilatu ipiri.
2 Asui aintauyupiru aintaumbeu puxi sese, aintaunyee:
—Yawasemu kua apigawa umunya puxi yaneretama upe, usaisu aintaupagari impustu Sezar supe, asui umbeu Kristu ae, aintaruixawa ae.
3 Asui Pilatu upurandu ae:
—Maitaa judewita ruixawa inde? Asui Jesus usuaxara:
—Indete rembeu yawe.
4 Asui Pilatu umbeu ainta supe kuaita saserdutita ruixawaita ainta supe kuaita miraita siyawaita yuiri:
—Timaa hawasemu ipuxuwerasawa sese kua apigawa.
5 Asui kirimbawa xinga aintaumbeu:
—Uxari aintaumaramunya putari kuaita miraita, umbue ainta panye Judeya upe panye Galileya upe yuiri panye ike yuiri.
6 Asui Pilatu usendu irumu aintaumbeuwaa upurandu ainta:
—Maitaa Galileya suiwara ae?
7 Asui usendu irumu Erudi retama suiwara ae umundu ipiri ae, nyãse, Erudi uiku Jeruzalẽ upe nyã ara.
Erudi ukasuari Jesus
8 Asui Erudi umaa irumu Jesus suuri ipia nyãse kuxima uputari umaa ae nyãse usendu aintaumbeu sesewara, asui uputari yuiri umaa umunya milagri.
9 Asui siya upurandu ae, maa Jesus tiusuaxara ae.
10 Asui kuaita saserdutita ruixawaita kuaita umpinimawaita yuiri uikuwaita akiti kirimbawa aintaumbeu sese.
11 Asui tenyuntu Erudi umaa ixupe panye kuaita suraraita yuiri, ape aintaukasuari sese, asui aintaumundeu sese yepe ipupekawa purangawaa, asui umuyuiri Pilatu supe ae.
12 Asui nyã arate puranga yuiri aintauyumaa, nyãse, puxi aintauyumaa kuera Erudi Pilatu irumu.
Umaa mukuĩsawa Pilatu piri
13 Asui Pilatu umuatiri panye kuaita saserdutita ruixawaita panye serakuenawaita yuiri panye miraita yuiri,
14 asui unyee ainta supe:
—Pexariana ixe arama kua apigawa kua pembeuwaa uxari aintaumaramunya putari kuaita miraita, asui hapurandu ae puranga maa timaa hawasemu sese kua puxi pembeuwaa.
15 Timaa yuiri Erudi uwasemu puxi sese nyãse umuyuiri yande arama ae. Ape yakuawate timaa nungara umunya puxi yayuká arama ae.
16 Ape hampurarakari kuri ae asui hayurawa kuri ae.
17 Asui urikute uyurawa ainta supe yepe prezu aintaumunya pukusawa festa.
18 Maa panye kuaita miraita aintausasemu:
—Remburi kua apigawa, reyurawa yande arama nyã Baraba.
19 Kuxima prezu ae nyãse uxari aintauyunupa kuaita miraita tetama upe asui uyuká resewara yuiri mira.
20 Asui Pilatu umbeu yuiri mukuĩsawa nyãse uputari uyurawa kua Jesus.
21 Maa kirimbawa piri aintausasemu:
—Renupa uyari kurusa rese, renupa uyari kurusa rese.
22 Asui musapirisawa upurandu ainta:
—Maataa umunya penye arama puxuwera? Tihawasemu sese puxuwerasawa hayuká arama maa ae, ape hampurarakari rire kuri ae hayurawa kuri ae.
23 Asui aintausasemu yuiri kirimbawa aintauputari uxari aintaunupa uyari kurusa rese. Asui aintaumuserana ae aintausasemu resewara kirimbawa.
24 Asui Pilatu umunya kuaye aintauputariwaa yawe.
25 Asui uyurawa ainta supe kua uxariwaa aintauyunupa kuaita miraita, kua uyukáwaa yuiri miraita, kuaye aintaupuranduwaa yawe, maa uxari ainta supe arama kua Jesus aintaumunya arama ixupe kuaye aintauputariwaa yawe.
Simão urasu Jesus kurusa
26 Asui aintaurasu irumu ae aintawafursari yepe apigawa Sireni suiwara sera Simão uyuiri irumu kampu sui, asui aintauxari usupiri Jesus kurusa sakakuera.
Aintaurasu ae Kauvariu kiti
27 Asui aintauri sakakuera siya miraita kunyaita yuiri aintaunupa aintaputia upe sasiyara resewara ainta Jesus rese.
28 Maa Jesus uyereu umbeu ainta supe:
—Tepeyaxiu serese, penye Jeruzalẽ rayeraita, maa peyaxiu peresepawate pemembiraita rese yuiri,
29 Nyãse, amu ara kuri aintaumbeu kuri, suuri kuri kuaita tiwaita uriku imembira kuaita tiwaita umukiriari imembira kuaita yuiri kuri tiwaita uriku imembira aintauxari arama aintauu aintakambi.
30 Asui aintaumbeu kuri iwitera supe:
—Rewari yanerese, aintaumbeu kuri iwi iwatewaa supe reyumimi yande.
31 Aintaumunya rame yawe sikue ramere kua mirá, maitaa maa aintaumunya tikanga rameana kuri ae?
32 Asui aintaurasu mukuĩ puxuwerawaita aintauyuká arama irumu ainta.
Aintaunupa Jesus uyari kurusa rese
33 Asui aintausika rire yepe tendawa kiti sera Kauvariu aintaunupa uyari kurusa rese kuaita yuiri puxuwerawaita yepe aintauxari Jesus katusawa sui yepe kanyutu banda sui.
34 Maa Jesus umbeu:
—Inde sepaya reperduari ainta neirumu nyãse timaa aintaukuawa maataa aintaumunya. Asui aintauyuka surti aintauyupartiri arama irupa rese.
35 Asui kuaita miraita aintaupuamu suaki aintaumaa. Kuaita yuiri serakuenawaita aintaukasuari sese, aintaunyee:
—Umukaturu amuita kuiri pexari uyumukaturu aepawate Kristu rame ae kua Deus uparawakawaa.
36 Asui kuaita suraraita yuiri aintaukasuari sese, asui aintauri aintaururi ixupe vinagri uu arama, asui aintaunyee:
37 —Judewita ruixawa rame inde reyumukaturu indepawate.
38 Asui aintaumuyari iarupi aintaumpinimawaa maa resewarataa aintauyuká ae, yawe aintaumpinima, aete judewita ruixawa ae.
Mukuĩ puxuwerawaita
39 Asui yepe puxuwerawa aintaumuyariwaa kurusa rese umbeu puxi sese unyee:
—Maitaa umbaa sã Kristu inde? Ape reyumukaturu indepawate yande yuiri.
40 Asui kua amu aintaumuyariwaa unyee ixupe:
—Maitaa tiserá resikie Deus sui, nyãse repurara reiku iyawe?
41 Maa yande yapurara yamunya resewara puxuwera, maa kua apigawa timaa nungara umunya puxuwera.
42 Asui unyee Jesus supe:
—Remanduari ixe aintaruixawa rame kuri inde.
43 Asui Jesus unyee ixupe:
—Supiwa hambeu inde arama uyi ara reiku seirumu paraizu kiti.
Umanu Jesus
44 Asui kuaji yandara rame kurasi pitunawasu kua kurasi, asui pitunawasu ae ate tres ura rame.
45 Asui kua panu aintaumuyariwaa templu rukena upe usuruka iwate sui piterupi simutara ate supita kiti.
46 Asui Jesus usasemu kirimbawa unyee:
—Inde sepaya haxari neipu upe seanga. Asui umbeu rire yawe umanu.
47 Asui kua suraraita kapitão umaa irumu kua umaawaa asui umee purangawaa Deus supe unyee:
—Supiwa purangawaa kua apigawa.
48 Asui panye kuaita miraita uyumuatiriwaita aintaumaa arama, aintaumaa irumu kua aintaumaawaa aintauyuiri isui, sasiyara ainta aintaunupa aintaputia.
49 Asui panye kuaita Jesus ukunyeseriwaita kunyaita yuiri uriwaita irumu Galileya sui aintaupuamu aintaumaa apekatu suintu.
Juze uyutima Jesus ipira
50 Asui yepe serakuenawaa purangawaa tiwa umunya puxuwera sera Juze.
51 Timaa uajudari ainta amuita serakuenawaita kua aintaumunyawaa, Arimateia suiwara ae judewita retama, aete yuiri usaru miraita ruixawa arama kua Deus.
52 Usu Pilatu ipiri upurandu irumu Jesus ipira.
53 Asui umuye ipira kurusa sui, asui upupeka ae panu murutingawaa irumu, asui uxari ae aintaupikuĩwaa ita kuara upe tire yamaa amu ipira kuera ape.
54 Asui nyã ara aintauyumukaturu aintausaru arama festa sauru rundere.
55 Asui kuaita kunyaita uriwaita Jesus irumu Galileya sui aintausu irumu aintaumaa kua aintaupikuĩwaa ita kuara aintaumaa yuiri mayetaa uxari ipira kuera.
56 Asui aintauyuiri aintaumukaturu arama sakuenawaa pumada yuiri. Asui sauru rame aintaupitu maye Deus nyenga umbeuwaa yawe.
