Luka 3:1-38
3 Urikuana kinzi akayu aintaruixawa ae kua Tiberiu Sezar, guvernaduru rame uiku Judeya upe kua Punsiu Pilatu, asui Erudi aintaruixawa panye Galileya upe, asui imu Filipe aintaruixawa ae panye Itureia upe panye Trakunite upe yuiri, asui Lizania aintaruixawa ae Abilenẽ upe.
2 Asui saserdutita ruixawa ramere kuaita Anaa Kaifa yuiri, Deus nyenga uri ipiri kua Juão Zakaria raira kampu upe.
3 Asui uwata panye parana Jurdão ruaki umbue ainta sese kua batizmu sasiyara arama aintaumanduari aintapekadu Deus umburi arama aintasui aintapekadu.
4 Kuaye umpinimawaa yawe ilivru upe kua utitikawa Izaia:
—Yawe usasemu kampu upe, pemukaturu yaneruixawa rapee, pemusatambika sapee.
5 Uyumuteresemu kuri panye tiipiwaa upe, asui yepewasu kuri panye iwitera panye iwatewaa yuiri, asui panye pee yaparawaa umusatambika kuri ae.
6 Asui panye miraita umaa kuri kua Deus umukaturu aramawaa ipupe.
7 Asui umbeu ainta supe kuaita miraita siyawaita uriwaita ipiri ubatizari arama ainta, unyee:
—Penye buya rairaita! Awataa umundu peyawawaa isui kua ipiaiwasawa uriwaa kuri?
8 Kuiri perikute periku peiya purangawaa yakuawa arama sasiyara pemanduari pepekadu, tepembeu penye aramapawa Abraão kua yanepaya, nyãse hambeu penye arama Deus upuderi umuyereu kuaita itaita Abraão supe arama ximiariruita arama.
9 Kuiriana imaxadu umunuka kua mirá rapu, ape panye kua mirá tiwa uxari iya purangawaa umunuka ae umburi arama ae tata kiti.
10 Asui kuaita miraita siyawaita unyee umbuewaita supe:
—Maataa kuri yarikute yamunya?
11 Asui usuaxara ainta:
—Kua urikuwaa mukuĩ ipupekawa urikute uxari yepe ixupe kua tiwa uriku, asui kua urikuwaa umbauwaa arama urikute umunya yawete yuiri.
12 Asui kuaita publikanuita yuiri aintausu aintauxari ubatizari ainta aintaupurandu aintausendu:
—Inde umbuesarawaa, maataa kuri yarikute yamunya?
13 Asui Juão usuaxara ainta:
—Tepeyuka miraita sui dinyeru isui kua guvernu uxariwaa peyuka.
14 Asui kuaita suraraita yuiri aintaupurandu:
—Yandetaa maataa kuri yamunya? Asui umbeu ainta supe:
—Tepemunya puxuwera amuita supe, tepeganani amuita resewara, maa perikute peiku suuri irumu kua peganyariwaa.
Juão umbeu Kristu resewara
15 Asui aintausaru irumu aintaumaa panye kuaita miraita aintaumanduari aintapia upe sese kua Juão yakuawa será aete Kristu.
16 Asui Juão umbeu ainta supe panye:
—Habatizari penye ii irumu maa uri kuri yepe kirimbawa piriwaa sesui, ixe tipurangawaa hapuderi arama hayurawa isapatu ipi sui, aete kuri ubatizari penye Espiritu Santu irumu tata irumu yuiri.
17 Ipu upe kua utiari aramawaa ainta, utiari arama panye trigu sui sawa umuatiri arama suka kiti panye kua trigu, maa usapi kuri sawa tata nunkawaa upe uweu.
18 Ape yawe siya nyenga kirimbawa irumu umbue kuaita miraita kua inyenga purangawaa.
19 Maa Erudi kua aintaruixawa kirimbawa Juão umbeu ixupe ipuxuwerasawa umunyawaa irumu kua Erudia imu rimiriku, umbeu yuiri ixupe panye kua umunyawaa puxi kua Erudi.
20 Umunya xinga ipuxuwerasawa umprezu resewara Juão.
Ubatizari Jesus
21 Asui ubatizari rire panye kuaita miraita ubatizari rire yuiri Jesus upuamure upurandu Deus uyupirari kua iwaka.
22 Asui kua Espiritu Santu uwiye sese kuaye pumba yawe asui usendu yepe nyenga iwaka sui, unyeewaa:
—Indete seraira haputariwaa, remusuuri ixe.
Samunyaita rera
23 Jesus urikuana trinta akayu uyupiru irumu umbue. Aintaumanduari Juze raira ae, Eli rimiariru.
24 Eli Matã raira ae, Matã Levi raira ae, Levi Melki raira ae, aete Janai raira, Janai Juze raira ae.
25 Juze Matatia raira ae, Matatia Amus raira ae, Amus Naum raira ae, aete Esli raira ae, Esli Nagai raira ae.
26 Nagai Maate raira ae, Maate Matatia raira ae, Matatia Semei raira ae, aete Juze raira ae, Juze Judá raira ae.
27 Judá Juanã raira ae, Juanã Resaa raira ae, Resaa Zurubabel raira ae, aete Salatiel raira ae, Salatiel Neri raira ae.
28 Neri Melki raira ae, Melki Adi raira ae, Adi Kusã raira ae, aete Elmadã raira ae, Elmadã Eri raira ae.
29 Eri Juzue raira ae, Juzue Eliezer raira ae, Eliezer Juri raira ae, aete Matã raira ae, Matã Levi raira ae.
30 Levi Simeão raira ae, Simeão Judá raira ae, Judá Juze raira ae, aete Junã raira ae, Junã Eliaki raira ae.
31 Eliaki Melea raira ae, Melea Menaa raira ae, Menaa Matata raira ae, aete Natã raira ae, Natã Davi raira ae.
32 Davi Jese raira ae, Jese Ubedi raira ae, Ubedi Buazi raira ae, aete Salaa raira ae, Salaa Naasumi raira ae.
33 Naasumi Aminadabi raira ae, Aminadabi Adimi raira ae, Adimi Arni raira ae, Arni Esrumi raira ae, aete Periz raira ae, Periz Judá raira ae.
34 Judá Jaku raira ae, Jaku Izaki raira ae, Izaki Abraão raira ae, aete Teraa raira ae, Teraa Nakuru raira ae.
35 Nakuru Seruki raira ae, Seruki Ragau raira ae, Ragau Faleke raira ae, aete Eber raira ae, Eber Salaa raira ae,
36 Salaa Kainã raira ae, Kainã Arfaxade raira ae, Arfaxade Semi raira ae, aete Nue raira ae, Nue Lameki raira ae.
37 Lameki Matuzalẽ raira ae, Matuzalẽ Enuki raira ae, Enuki Jaredi raira ae, aete Maleleel raira ae, Maleleel Kainã raira ae.
38 Kainã Enu raira ae, Enu Seti raira ae, aete Adão raira ae, Adão Deus raira ae.
