Luka 7:1-50
7 Asui umbawa rire panye kua inyenga umbeuwaa ainta supe kuaita miraita uwike Kafarnaum kiti.
2 Ape imãsi yepe suraraita kapitão ikriadu ugustariwaa.
3 Asui usendu Jesus resewara umundu yepeyepe tuyuweita aintasuiwara kuaita judewita aintausu arama aintaupurandu Jesus uri arama umukaturu arama ikriadu.
4 Asui aintausikana Jesus ipiri aintaupurandu ae sasisawa rupite aintaumbeu:
—Purangawaa kua apigawa remunya arama ixupe arama ae.
5 Nyãse ugustari yanemiraita asui umunya yuiri yande arama yanesinaguga.
6 Asui Jesus usu aintairumu. Asui kuayentuana suka sui ainta, kua kapitão umundu sumuaraita aintaumbeu arama ixupe:
—Seruixawa, tereyuiri sepiri nyãse timaa purangawaa ixe rewike arama seruka kiti.
7 Sesewara timaa hayuiri nepiri nyãse timaa purangawaa ixe. Maa rembeu yepe nenyenga asui purangana kuri kua sekriadu.
8 Nyãse ixe yuiri harikute haruyari seruixawaita inyenga, asui ixe yuiri hamundu sesuraraita, asui hambeu yepe supe, resu, asui usu, asui hambeu rame amu supe, reyuiri, asui uri, asui hambeu rame sekriadu supe, remunya kua asui umunya ae.
9 Asui iakayemu Jesus usendu irumu inyenga uyereu ainta kiti kuaita miraita siyawaita uriwaita sakakuera umbeu ainta supe:
—Supiwa hambeu penye arama, tire hawasemu yepe aintasuiwara kuaita Israelitaita uruyariwaa kuaye iyawe.
10 Asui aintauyuiri uka kiti kuaita umunduwaita asui aintauwasemu purangana kua ikriadu.
Umbaka yepe taina manusawa sui
11 Asui yepe ara rire Jesus usu yepe tetama kiti serawaa Naim, asui aintausu irumu kuaita umbuewaita miraita siyawaita yuiri.
12 Asui aintaumusuaki kua tetama rukena aintaumaa aintaururi yepe umanuwaa aintaumburi arama ae, imembira kua viuva yepenyuwanate, asui siya miraita tetama suiwaraita aintausu
13 Asui yaneruixawa pirasua umaa ixupe umbeu ixupe:
—Tereyaxiu.
14 Asui uri aintapiri asui upisika kua umanuwaa kaixão asui aintaupita aintaupuamu kuaita urasuwaita ae, umbeu ixupe:
—Kurumiwasu, hambeu inde arama, repuamu.
15 Asui kua umanuwaa kuera uwapika asui uyupiru upurungita asui Jesus urasu ae imaya ipiri.
16 Asui aintausikie panye kuaita miraita, asui aintaumee Deus supe purangawaa aintaunyee:
—Yepe utitikawaa kirimbawawaa upuamu yanepiterupi, Deus uri umaa imiraita ipiri.
17 Asui sesewara usika aintapiri panye tetama kiti Judeya upe.
Juão umundu aintaupurandu Jesus
18 Asui Juão umbuewaita aintaumbeu ixupe Jesus umunyawaita resewara yuiri, asui Juão usenui ipiri mukuĩ umbuewaita.
19 Asui umundu aintausu yaneruixawa ipiri aintaupurandu arama ae, maitaa indete kua uriwaa u yarikute yasaru amu uri arama?
20 Asui aintausika irumu ipiri aintaumbeu ixupe:
—Juão Batista umundu yande yapurandu arama inde, maitaa indete kua uriwaa u yarikute yasaru amu uri arama?
21 Asui aramete Jesus umukaturu siya imãsiwaita, asui kuaita yuiri urikuwaita demuniu, asui uxariana aintaumaa siya kuaita sesaimawaita.
22 Asui Jesus usuaxara ainta, umbeu:
—Pesuana pembeu Juão supe kua pemaawaa pesenduwaa yuiri, aintaurikuana aintaresa kuaita sesaimawaita, aintauwatana kuaita alejaduita, ikiaima kuaita lepruzuita, aintausenduana kuaita iapisaimawaita, aintaupuamu kuaita umanuwaita, asui kuaita pirasuawaita aintausenduana kua inyenga purangawaa.
23 Suuri kuri kua tiwa umanduari puxuwera serese.
Jesus umbeu Juão resewara
24 Asui aintauyuiri rire isui kuaita Juão umbuewaita Jesus umbeu miraita Juão resewara, unyee:
—Marantaa pesu pemaa kampu kiti? Maitaa pesu pemaa iwitu upeyu uwiwa rese?
25 Maataa pesu pemaa? Maitaa pesu pemaa yepe apigawa urikuwaa irupa purangawaa? Kuaita urikuwaita irupa purangawaa kuaita uikuwaita purangawaate aintauiku tuixawa ruka upe.
26 Asui maataa pesu pemaa? Maitaa pesu pemaa yepe utitikawaa? Aete, hambeu penye arama:
—Puranga piriwaa utitikawaa sui ae.
27 Aete kua aintaumpinimawaa sese kuxima, ikete hamundu yepe umbeusara nerunde umukaturu arama nerapee nerunde.
28 Supiwa hambeu penye arama aintasuiwara kuaita unaseriwaita umaa kua ara timaa yamaa amu iara kiti xingawaa kua Juão sui, maa puranga piri kua aintawira kitiwaa kuaita iwaka ruixawa imiraita.
29 Asui panye kuaita usenduwaita ae kuaita yuiri kuaita publikanuita aintaumbeu purangawaa kua Deus nyãse aintauxariana Juão ubatizari ainta ibatizmu irumu.
30 Maa kuaita farizewita kuaita ukuawawaita kua Deus inyenga kuximawara yuiri aintaumburi aintasui kua Deus inyenga ainta supe aramawaa tiresewara aintauxari Juão ubatizari ainta.
31 Awa yawetaa haseruka kuaita apigawaita kuiriwaraita? Awa yawetaa ainta?
32 Tainaita yawe ainta uwapikawaita ukara kiti aintausenui aintarumuaraita, yamuapu penye arama pepurasi arama maa tipepurasi, yambeu penye arama nyenga sasiyarawaa maa timaa peyaxiu.
33 Nyãse Juão Batista uri timaa umbau pão tiyuiri uu vinyu, asui pembeu, uriku demuniu ipia upe.
34 Asui uri kua unaseriwaa umaa kua ara umbau uu yuiri, asui pembeu, pemaa yepe umbauwaa turusu uuwaa yuiri vinyu, uajudari kuaita publikanuita pekaduruita yuiri.
35 Maa kua ukuawasawa yakuawa purangawaa ae tairaita irumu.
Uyusena sakuenawaa ipi rese
36 Asui yepe farizeu usenui ae umbau arama irumu asui Jesus uwike farizeu ruka kiti uwapika meza ruaki.
37 Ape yepe kunya uriwaa tetamawara pekaduruwaa ukuawa irumu Jesus uwapika meza ruaki farizeu ruka upe ururi sakuenawaa siru upe alabastru suiwara.
38 Asui uiku kuayentu sakuera sui ipi ruaki, uyaxiu umururu ipi sesa yukise irumu asui umutikanga ae iawa irumu asui ubejari ipi asui uyusena ipi rese nyã sakuenawaa ae.
39 Asui umaa irumu ae kua farizeu usenuiwaa Jesus umbau irumu unyee ipia upe:
—Utitikawaa rame maa kua apigawa ukuawa maa mayewataa kua kunya upisikawaa ae nyãse pekaduru ae.
40 Asui Jesus usuaxara ixupe kua farizeu umbeu ixupe:
—Simão, haputari hambeu inde arama yepe nyenga. Asui usuaxara, rembeu inde umbuesarawaa.
41 Mukuĩ apigawa udeveriwaa ixupe yepe upuruwaa ainta supe dinyeru, yepe udeveri ixupe kinyentu dinyeru asui yepe udeveri sinkuenta dinyeru.
42 Tiresewara aintaupuderi aintaupagari ae umukanyemu aintasui aintakunta kuaita mukuĩ. Kuiri awataa aintasuiwara ugustari ae turusu xinga?
43 Asui Simão usuaxara:
—Hamanduari kua umukanyemuwaa isui turusu. Asui Jesus unyee ixupe:
—Supiwa rembeuwaa.
44 Asui uyereu umaa kua kunya rese asui unyee Simão supe:
—Maitaa remaa kua kunya, hawike neruka upe asui tirexari ixe arama ii hamuyasuka arama seipi, maa kua kunya umururu seipi sesa yukise irumu asui umutikanga iawa irumu ainta.
45 Tirebejari ixe maa kua kunya tiikuere ubejari seipi hawike rire neruka upe.
46 Timaa reyusena seakanga rese azeti maa kua kunya uyusena seipi rese kua sakuenawaa ae
47 Ape hambeu inde arama:
—Haperduariana isui ipekadu turusuwaa, ape ugustari ixe turusu, maa kua haperduariwaa isui kuaira, kuaira ugustari ixe.
48 Asui umbeu ixupe kua kunya:
—Haperduariana nesui nepekadu.
49 Asui kuaita uwapikawaita irumu meza ruaki aintauyupiru aintauyupurungita aintapawa aintaunyee:
—Awataa kua apiga umburi arama pekadu?
50 Maa Jesus umbeu ixupe kua kunya:
—Hamukaturu inde reruyari resewara, resuana timaarese.
