Luka 8:1-56
8 Asui Jesus usu tetama kiti turusuwaita kuairawaita yuiri umbue ainta kua inyenga purangawaa rese imiraita arama ainta kua Deus, kuaita duziwaita aintausu irumu.
2 Aintausu yuiri irumu yepeyepe kunyaita umburiwaita aintasui demuniu puxuwerawaita mãsi yuiri, kua Maria sera rakapira Madalena kua usemuwaa isui seti demuniu.
3 Asui Juana kua Kuza rimiriku kua upurakiwaa Erudi ruka upe, asui Suzana asui siya xinga kuaita uajudariwaita ae aintamaa irumu.
Nyenga uyutimawaa rese
4 Asui aintauri ipiri siya miraita panye aintaretama sui, asui Jesus umbue ainta inyenga irumu ipupe aramawaa umbue ainta, unyee:
5 —Yepe uyutimasara usu uyutima, asui uyutima irumu yepeyepe mitima karusu uwari pee arukanga rupi, asui aintaupiru ae kuaita miraita asui kuaita wirá mirita uwewewaita iwaka rese aintaumbau ae.
6 Asui yepeyepe mitima karusu uwari itatiwa upe asui uyukiriari rire uxirika ae nyãse watari ixupe iruruwaa.
7 Asui yepeyepe uwari yuutiwa upe asui uyukiriari yepewasu asui yuu umamana ae.
8 Asui yepeyepe uwari purangawaa iwi upe, asui uyukiriari asui iya ae, asui aintayaweyawe aintauxari aintaiya sem. Awa uriku iapisa urikute usendu.
Mayesawataa nyenga uyutimawaa rese
9 Asui kuaita umbuewaita aintaupurandu ae aintaunyee:
—Mayesawataa kua nyenga.
10 Asui Jesus usuaxara ainta:
—Haxari pekuawa arama kua nyenga aintauyumimiwaa maye Deus imiraita arama ainta, maa kuaita amuita hambue ainta nyenga irumu hambuewaa rupiara ainta, aintaumaa pukusawa tiarama aintaukuawa maataa aintaumaawaa, aintausendu pukusawa tiaintaukuawa mayesawataa ae.
11 Yawesawa kua nyenga hambuewaa rupiara ainta. Deus inyenga kua mitima karusu.
12 Kua uwariwaa pee rimbiwa rupi aete kuaita usenduwaita asui uri kua Yurupari usiki arama aintapia sui kua nyenga tiarama aintauruyari ae yawaite aintauyumukaturu.
13 Kua uwariwaa itatiwa upe aete kuaita usenduwaita kua nyenga asui suuri aintausuanti ae, maa tiaintauriku aintarapu, kuaira aintauruyari, asui puxuwera usika rame aintarese aintauxari ae.
14 Kua uwariwaa yuutiwa upe aete kuaita usenduwaita asui arirewara aintauyuka aintapia aintamaa rese aintauputari yuiri aintauyumusuuri asui panye nyã umamana ainta asui timaa tiaru puranga aintaiya.
15 Kua uwariwaa purangawaa iwi upe aete kuaita usenduwaita kua nyenga aintaumukaturu ae aintapia supiwa purangawaa irumu aintauriku aintaiya puranga santa resewara aintauiku.
Nyenga turi rese
16 Tiyasikindawa yaneturi lata kuara upe yamundeka rire ae tiyuiri yaxari ae yanekama wirupi, maa yaxari ae uwapika arama sendawa upe umuturi arama aintaumaa panye kuaita uwikewaita uka upe.
17 Tiyamaa kua yayumimiwaa tiwa kuri yamaa, tiyuiri yamaa kua aintauyumimiwaa tiwa kuri yakuawa sese maa uyukuawa kuri ae.
18 Pemaa pesui puranga maye pesendu, nyãse kua urikuwaa imaa aintauxari kuri ixupe turusu piri asui kua tiwa uriku aintauyuka kuri isui kua umanduariwaa yepe uriku.
Jesus familia
19 Asui aintauri ipiri imaya imuita yuiri maa tiaintaupuderi aintausika suaki miraita siyawaita resewara.
20 Asui yepe umbeu ixupe:
—Nemaya nemuita yuiri aintaupuamu ukara kiti aintausikari aintaumaa inde.
21 Maa usuaxara ainta:
—Semaya semuita yuiri aintate kuaita usenduwaita Deus nyenga asui aintaumunya kuaye umbeuwaa yawe.
Jesus umpitu iwitu
22 Asui yepe ara uwiye igara upe umbuewaita irumu, asui umbeu ainta supe:
—Yasuana lagu ruaxara, asui aintausuana.
23 Asui aintausuwaa upe Jesus ukiri. Asui uri aintaruaxara trevada kirimbawa kuairantu aintausu tiipi kiti.
24 Asui aintausu ipiri aintaumbaka ae aintaumbeu ixupe:
—Yaneruixawa, yaneruixawa aiwana yasu tiipi kiti, asui upaka Jesus, asui umpitu iwitu gapenu yuiri asui aintaupituana, asui parana uikuntuana.
25 Asui unyee ainta supe:
—Maa resetaa pexari pepia? Asui aintausikie turusu aintaakayemu yuiri aintaumaa, asui aintauyupurungita, aintaunyee:
—Awataa kua umpituwaa iwitu gapenu yuiri aintauruyari arama ae?
Umukaturu yepe urikuwaa demuniu
26 Asui aintausika aintaiwi kiti kuaita gerazenuita, kua iwi uikuwaa Galileya ruaxara kiti.
27 Asui aintausemu irumu igara sui uri aintaruaxara tetama sui yepe apigawa urikuwaa demuniu, kuximare tiumundeu irupa tiyuiri uiku uka upe maa anyunte uiku semiteriu upe.
28 Asui umaa irumu Jesus uyawika senunde kiti usasemu asui umbeu inyenga kirimbawawaa irumu:
—Maataa resikari seirumu inde Jesus? Inde taira kua Deus kirimbawa piriwaa panye sui! Hapurandu inde tiarama rempurarakari ixe!
29 Nyãse Jesus umbeuwana kua demuniu ikiawaa usemu arama isui kua apigawa, nyãse siya viaji upisika kirimbawa kua apigawa. Aintauputari rame aintaupukuari ae kurenti irumu feru irumu yuiri anyunte umusaka ae asui kua demuniu urasu ae kampu kiti.
30 Asui Jesus upurandu ae:
—Maataa nerera? Asui usuaxara:
—Serera siyawaa, nyãse siya demuniwita uwike ipia upe.
31 Asui aintaupurandu ae tiarama umundu aintausu tiipi kiti.
32 Ape siya tayasu aintaumbau iwitera rese, asui aintaupurandu Jesus uxari arama aintauwike tayasu ipia upe. Asui Jesus uxari aintausu.
33 Asui kuaita demuniwita aintausemu rire isui kua apigawa aintauwike tayasu ipia kiti, asui panye kuaita tayasu siyawaita aintauyana aintauwari parana kiti asui aintaumanu panye.
34 Asui kuaita usaruwaita tayasu aintaumaa irumu maye aintausasawa aintauyawawa aintausu aintaumbeu panye aintaresewara tetama kiti panye kampu kiti yuiri.
Gerazenuita tiaintauputari Jesus
35 Asui kuaita miraita aintausu aintaumaa kua usasawawaa aintausu Jesus ipiri. Asui aintaumaa kua apigawa usemuwaa isui kuaita demuniwita umundeuwana irupa ukuawana ara, uwapika Jesus ipi ruaki, asui aintausikie turusu.
36 Asui kuaita umaawaita panye kua usasawawaa aintaumbeu ainta supe yuiri maye ikatuana kua urikuwaa demuniwita.
37 Asui panye kuaita miraita uikuwaita aintaiwi upe kuaita gerazenuita aintaupurandu Jesus uyuiri arama aintasui nyãse aintausikie turusu. Asui Jesus uwiye yuiri igara upe asui uyuiriana aintasui.
38 Asui kua apigawa usemuwaa isui kuaita demuniwita upurandu Jesus uxari arama uiku irumu, maa Jesus umundu uyuiri arama asui unyee ixupe:
39 —Reyuiri neruka kiti rembeu neanamaita supe panye kua Deus umunyawaa inde arama, asui usu umbeu panye setama kiti panye kua Jesus umunyawaa ixupe.
Jairu upurandu Jesus
40 Asui Jesus uyuiri irumu panye kuaita miraita siyawaita suuri aintausuanti ae nyãse aintausaruana ae.
41 Asui uri ipiri yepe apigawa serawaa Jairu usaruwaa sinaguga, asui uyawika ipi ruaki, asui upurandu ae usu arama suka kiti.
42 Nyãse umanu putariana uiku kua tayera yepenyuwaa, uriku duzi akayu. Asui aramete aintaumusuaki ae kuaita miraita siyawaita.
Upurarawaa tuwi
43 Ape yepe kunya urikuana duzi akayu upurara tuwi, asui tiawa upuderi umukaturu ae.
44 Asui uri sakakuera asui upisika irupa rakapira rese asui aramete upitu tuwi isui.
45 Asui Jesus unyee:
—Awataa upisika serese? Asui panye kuaita miraita aintaumbeu:
—Tiyande. Asui Pedru umbeu:
—Inde umbuewaa, kuaita siyawaita aintaumusuaki inde panye aintaupisika inde.
46 Maa Jesus umbeu mukuĩsawa:
—Yepe upisika ixe nyãse hakuawa hakuawasawa usemu sesui.
47 Asui kua kunya ukuawa tiupuderi uyuyumimi asui usu ipiri uriri, asui uyawika senunde uyumuyukuawa arama aintaumaa panye miraita maa resewarataa upisika ae, maye yuiri purangana ae aramete.
48 Asui umbeu ixupe:
—Inde serayera, ikatuana inde reruyari resewara resuana timaarese.
Usupiri Jairu rayera
49 Upurungita ramere uiku Jesus uri ipiri yepe suka suiwara kua usaruwaa sinaguga umbeu:
—Umanuana nerayera, teremuapatuka kua umbuesarawaa.
50 Maa Jesus usendu irumu inyenga umbeu ixupe:
—Teresikie, reruyari, ape kuri ikatute ae.
51 Asui usika irumu uka kiti tiawa uxari uwike irumu anyunte Pedru Juão Tiagu yuiri asui ipaya kua taina imaya yuiri.
52 Asui panye ainta aintauyaxiu aintausasemu maa Jesus umbeu ainta supe:
—Tepeyaxiu timaa umanu ae, anyunte ukiri uiku.
53 Asui aintaupuká sese nyãse aintaukuawa umanuana ae.
54 Maa upisika ae ipu irumu umbeu ixupe kirimbawa:
—Kunyatai, repuamu.
55 Asui aramete ianga uyuiri ixupe, asui upuamu, asui umundu aintaumee umbau arama.
56 Asui ipaya imaya aintaakayemu aintaumaa, maa Jesus umbeu ainta supe tiarama awa supe aintaumbeu kua umunyawaa.