Marku 10:1-52
10 Asui Jesus upuamu usu Judeya kiti Jurdão ruaxara kiti. Ape aintauyumuatiri yuiri kuaita miraita siyawaita, ape umbue yuiri ainta maye umbuewerawaa yawe ainta.
Maitaa puranga yaxari yanerimiriku
2 Asui aintauri ipiri kuaita farizewita aintauputari aintausaã ae, aintaunyee ixupe:
—Maitaa puranga apigawaita aintaumuyuiri aintarimiriku?
3 Asui usuaxara ainta:
—Maitaa Muize umundu?
4 Aintaunyee ixupe:
—Muize uxari apigawa umpinima papera aintaumuyuiriwaa rupiara aintarimiriku aintasui.
5 Asui Jesus unyee ainta supe arama:
—Umpinima penye arama kua inyenga yawewaa santa resewara pepia.
6 Maa uyupirungawa upe Deus umunya panye maa umunya yepe apigawa yepe kunya.
7 Yawewaa resewara apigawa uxariana ipaya imaya yuiri.
8 Uiku arama ximiriku irumu yepenyu arama ainta kuaita mukuĩwaita, ape timaa mukuĩwaita ainta maa yepenyuana ainta.
9 Maa kuaita Deus uxariwaita aintauiku aintapawa tiawa upuderi utiari ainta.
10 Asui uka upe kuaita umbuewaita aintaupurandu ae sese kua umbuewaa.
11 Asui unyee ainta supe:
—Awa umuyuiri isui ximiriku uyuka arama amu umunya kuri ixupe puxuwera kua uxariwaa kuera.
12 Kunya uxari rame imena uiku arama amu apigawa irumu puxuwera kuri umunya ixupe kua uxariwaa kuera.
Uabensuari tainaita
13 Asui aintaururi ixupe tainaita uxari arama ipu aintarese maa kuaita umbuewaita aintausaisu aintauri.
14 Maa Jesus umaa rame yawewaa ape tiupita ugustari, asui umbeu ainta supe:
—Pexari aintauri sepiri kuaita tainaita tepesaisu aintauri nyãse iyaraita ainta kua yaneruixawa Deus,
15 Supiwa hambeu penye arama:
—Kua tiwa uputari suixawa arama kua Deus kuaye taina uputariwaa yawe ae timaa kuri suixawa kua Deus.
16 Asui upisika kuaita tainaita iwá rese uxari ipu aintarese uabensuari ainta.
Yepe rikuwaa
17 Asui Jesus uyupiru uwata pee rupi yepe apigawa uyana suaxara umunya benditu ixupe upurandu ae:
—Inde umbuesarawaa purangawaa, maataa kuri hamunya hariku arama mundu nunka upawa?
18 Asui Jesus usuaxara ae:
—Marantaa rembeu purangawaa ixe? Tiyamaa awa purangawaa anyunte yepenyu Deus.
19 Rekuawate maye Deus umbeu kuxima: Tereyuká mira, terexari nerimiriku nemena yuiri, teremunda, tereganani amuita rese, tereganani reyuka amu iyara, regustari nepaya nemaya yuiri.
20 Usuaxara ae:
—Inde rembuewaa, haruyariana panye kua Deus umbeuwaa setaina suiwarate.
21 Asui Jesus umaa ixupe ugustari ae asui umbeu ixupe:
—Yepentuana nerunde, resuana revenderi panye rerikuwaa, remee sikuyara pirasuawaita supe ape kuri reriku neyara iwaka kiti asui reyuiri serakakuera.
22 Asui kua inyenga usenduwaa umusasiyara ae, asui sasiyara uyuiri nyãse rikuwaa ae.
Yawaite mundu iyara uganani yande
23 Asui Jesus umaa suaki umbeu umbuewaita supe:
—Iwasu aintauxari aintaruixawa arama kua Deus kuaita rikuwaita.
24 Asui kuaita umbuewaita aintaakayemu aintausendu kua inyenga umbeuwaa. Maa Jesus umbeu yuiri ainta supe:
—Serairaita iwasu yaxari yaneruixawa arama kua Deus.
25 Maa iwasuima kamelu uwike awi resa kuara rupi isui kua rikuwaa uxari suixawa arama kua Deus.
26 Asui aintaakayemu aintausendu ixupe, asui aintauyupurungita aintapawa:
—Awataa maa upuderi uyumukaturu?
27 Jesus umaa ainta supe asui unyee:
—Kuaita miraita tiaintaupuderi, maa Deus upuderi, nyãse Deus upuderi umunya panye maa.
28 Asui Pedru uyupiru umbeu ixupe:
—Remaa yande, yaxariana panye maa yasu arama nerakakuera.
29 Jesus umbeu:
—Supiwa hambeu penye arama, kua uxariwaa sendawa, imuita, sendiraita, imaya yuiri, ipaya yuiri, tairaita yuiri, ikupixawa yuiri seresewara senyenga resewara,
30 Uriku kuri sem viaji suka, imuita, sendiraita, imayaita, tairaita, ikupixawa, asui aintaumuruanyana kuri ae asui uriku kuri kua mundu nunka upawa.
31 Maa siya kuaita uputariwaita aintarunde piri ainta maa aintarakakuerawaraita kuri ainta, maa kuaita aintarakakuerawaraita aintarundewaraita kuri ainta.
Jesus umbeu umanu kuri
32 Asui aintausuwaa upe pee rupi Jeruzalẽ kiti Jesus usu aintarunde kuaita umbuewaita, asui aintaakayemu aintausendu ixupe, kuaita yuiri usuwaita sakakuera aintausikie isui, asui uyumuyukuawa ainta supe panye uriwaa kuri sese.
33 Umbeu ainta supe:
—Pemaa, kuiri yasu Jeruzalẽ kiti, asui kua usemuwaa umaa kua ara uyuxari kuri saserdutita ruixawa supe ainta supe yuiri kuaita umpinimawaita aintaukundenari arama ae asui aintauxari kuri ae tiwaita judeu supe.
34 Ape kuri aintaukasuari sese, aintautumuna sese, aintausurari ae asui aintauyuká ae, maa musapiri ara rire uyuiri upaka.
Tiagu Juão yuiri
35 Asui aintausu Jesus ipiri kuaita Tiagu Juão Zebedeu rairaita aintaumbeu ixupe:
—Inde umbuewaa yaputari rexari yande arama maa yapuranduwaa neirumu.
36 Asui unyee ainta supe:
—Maataa peputari hamunya penye arama?
37 Asui aintaunyee ixupe:
—Rexari yawapika neirumu purangawaa upe yepe uwapika nekatusawa sui yepe uwapika nekanyuntu sui.
38 Maa Jesus umbeu ainta supe:
—Timaa pekuawa maa pepurandu, maitaa pepuderi peu kua hauwaa kuri? Maitaa pepuderi pexari aintaubatizari penye kuaye ainta batizariwaa yawe kuri ixe?
39 Asui aintaunyee ixupe:
—Yapuderite. Asui Jesus unyee:
—Peu kuri kua hauwaa, aintaubatizari kuri penye kuaye seyawe.
40 Tihapuderi haxari pewapika sekatusawa sui kanyutu sui yuiri maa aintauwapika kuri ape sepaya uxariwaita.
41 Asui kuaita dezi umbuewaita aintausendu irumu kua yawewaa aintaipiaiwa aintaumaa Tiagu Juão yuiri.
42 Asui Jesus usenui ipiri ainta, umbeu ainta supe:
—Pekuawate maye kuaita mira ruixawaita kirimbawa aintaumundu aintamiraita kuaita yuiri kua aintakirimbawawaita aintaumundu yuiri ainta.
43 Maa pepiterupi tipuranga yawewaa, nyãse kua uputariwaa umundu ainta, urikute uajudari ainta panye.
44 Kua uputariwaa umundu amuita urikute upuraki ainta supe panye.
45 Nyãse yawete yuiri kua usemuwaa umaa kua ara timaa uri uxari aintaupuraki ixupe, maa upuraki ainta supe, umanu arama aintaresewara kuaita siyawaita uyurawa arama ainta.
Umukaturu sesaimawaa Jeriku upe
46 Asui aintausika Jeriku upe. Asui uyuiri irumu Jeriku sui umbuewaita irumu kuaita siyawaita yuiri, uwapika pee rimbiwa upe kua upuranduwaa dinyeru sesaimawaa sera Bartimeu Timeu raira.
47 Usendu irumu Jesus Nazare suiwara ae uyupiru usenui, unyee:
—Inde Jesus Davi rimiariru pirasua remaa ixe arama.
48 Asui siya miraita uyakawa ae ukiriri arama, maa kirimbawa piri usenui, unyee:
—Inde Davi rimiariru pirasua remaa ixe arama.
49 Asui Jesus usika upuamu unyee:
—Pesenui ae, asui aintausenui kua sesaimawaa, aintaunyee ixupe:
—Repita suuri, repuamu nyãse usenui inde.
50 Asui umburi isui ipupekawa upuri upuamu asui uri Jesus ipiri.
51 Asui Jesus upurandu ae:
—Maataa reputari hamunya inde arama? Asui kua sesaimawaa usuaxara ae:
—Seruixawa rexari hamaa.
52 Asui Jesus unyee ixupe:
—Resuana, purangana inde reruyari resewara ixe. Asui purangana umaa asui usu Jesus rakakuera pee rupi.
