Marku 16:1-20
16 Asui sauru rire kua Maria Madalena kuawaa yuiri kua amu Maria Tiagu imaya kuawaa yuiri Salume, aintausu aintaupiripana pusanga sakuenawaa aintauxari arama Jesus rese.
2 Asui kurasi usemu irumu mitu rame aintausu iwi kuara kiti.
3 Asui aintaupurungita aintapawa, aintaunyee:
—Awataa kuri umutirika yande arama kua ita turusuwaa ita kuara rukena sui?
4 Asui apekatu suire aintaumaa kua ita turusuwaa uyenuana amu kiti nyãse turusuwaa ae.
5 Asui aintauwike iwi kuara kiti aintaumaa yepe kurumiwasu uwapika katusawa banda sui iwi kuara upe, murutingawaa ipupekawa ipukuwaa, asui turusu aintaakayemu aintaumaa.
6 Asui umbeu ainta supe:
—Tepeakayemu hakuawate pesikari Jesus Nazare suiwara aintaupregariwaa uyari kurusa rese, usemuana, tiana yamaa ae ike, pemaa sendawa mame aintauxariwaa uyenu.
7 Pesuana pembeu umbuewaita supe arama Pedru supe yuiri usu arama perunde Galileya kiti akiti kuri pemaa ae kuaye umbeuwaa yawe penye arama.
8 Asui aintausemu aintauyawawa iwi kuara sui, asui aintauyupiru aintauriri aintausikie resewara, asui tiawa supe aintaumbeu aintausikie resewara.
Jesus umaa Maria Madalena
9 Asui usemu rire iwi kuara sui mitu kuemaite uyupiru uyukuawa ixupe kua Maria Madalena, kua umburiwaa kuera isui seti demuniu.
10 Asui usu umbeu ainta supe kuaita Jesus rumuaraita kuera sasiyara rame kuera ainta aintauyaxiu.
11 Aintausendu rame upaka ae uxari yuiri umaa timaa aintauruyari inyenga kua kunya.
Umaa mukuĩ umbuewaita
12 Asui yawewaa rire uyukuawa ainta supe amu yawe kuaita mukuĩwaita aintausuwaa upe uiku kampu kiti.
13 Asui aintausu aintaumbeu amuita supe arama yuiri, maa timaa aintauruyari aintanyenga kuaita mukuĩwaita.
Umundu aintausu arama aintaumbue
14 Asui anyu arama Jesus uyukuawa ainta supe kuaita unziwaita aintauwapikawaa upe meza ruaki, asui umbeu ainta nyãse tiaintauruyari santa yuiri aintapia nyãse timaa aintauruyari aintaumbeuwaa kuaita umaawaita ae uyuiri rire upaka.
15 Asui umbeu ainta supe:
—Pesuana panye kua mundu upe pembue arama ainta panye ainta supe kua inyenga purangawaa.
16 Kua uxariwaa ipia serese uxari yuiri aintaubatizari ae hamukaturu kuri ae, maa kua tiwa uruyari ipuxuwerasawa uiku kuri sese.
17 Asui kuaita uruyariwaita kuri aintaumunya kuri tiwaita yamunya, aintaumburi kuri demuniwita serera rupi, aintaupurungita apekatuwaraita inyenga rupi,
18 Aintaupisika buya aintaipu irumu, aintauu rame venenu timaa kuri umunya ainta supe puxuwera, aintauxari rame aintaipu aintarese kuaita mãsiweraita ikatu kuri ainta.
Jesus usu iwaka kiti
19 Ape upurungita rire yaneruixawa Jesus uyusupiri ae iwaka kiti uwapika arama Deus katusawa upe.
20 Asui aintausu aintaumbue panye mundu upe, yaneruixawa uajudari ainta, asui umukirimbawa ainta supe inyenga aintaumunya pukusawa milagri aintaukuawa arama supiwa ae.
