Marku 2:1-28
2 Asui amu ara rundere Jesus uyuiri Kafarnaum kiti, asui kuaita miraita aintausendu sesewara usika suka kiti.
2 Asui aintauyumuatiri ipiri kuaita miraita siyawaita, aintaumuteresemu panye ukena panye ukara kiti yuiri.
3 Asui umbue ainta kua inyenga. Asui aintauri ipiri aintaururi yepe imãsiwaa membekawaa ipira, kuatru apigawaita ururi ae.
4 Tiaintaupuderi aintaumusuaki Jesus miraita siyawaita resewara, asui aintaumukuara uka Jesus iarupi, asui aintaumukuara rire uka aintaumuye ipiri kua imãsiwaa membekawaa ipira.
5 Jesus umaa irumu maitaa aintauxari aintapia sese unyee ixupe arama kua imãsiwaa:
—Inde seraira hamburi nesui nepekadu.
6 Yepeyepe umpinimawaita aintauwapika ape, aintaunyee aintapia upe:
7 —Marantaa umbeu kuaye kua apigawa. Upurungita puxi Deus rese. Awataa upuderi umburi yanesui yanepekadu isui kua Deus?
8 Asui Jesus ukuawa aintaumanduari puxi sese aintapia upe asui unyee ainta supe arama:
—Marantaa pemanduari puxi pepia upe?
9 Maataa iwasupiri? Hambeu ixupe kua imãsiwaa:
—Hamburi nepekadu nesui u hamundu repuamu repisika nekama rewata arama?
10 Kuiri pekuawa arama kuri upuderi umburi aintasui aintapekadu kua unaseriwaa umaa kua mundu umbeu ixupe kua imãsiwaa:
11 —Repuamu repisika nekama resu neruka kiti.
12 Asui upuamu upisika ikama usemu ukara kiti aintaumaa ixupe panye, asui aintaupita aintaumanduari, asui aintaumee purangawaa Deus supe arama, aintaunyee:
—Tire yamaa yawewaa.
Usenui Levi
13 Asui Jesus usu yuiri mukuĩsa lagu rimbiwa kiti, asui aintauyumuatiri ipiri kuaita miraita siyawaita, asui umbue ainta.
14 Asui usasawa irumu umaa kua Alfeu raira sera Levi uwapika impustu meza ruaki, unyee ixupe:
—Reyuiri serakakuera. Asui upuamu usu sakakuera.
Jesus umbau puxuwerawaita irumu
15 Asui Jesus uwapika umbau Levi ruka upe umbuewaita irumu aintauri ipiri siya publikanuita pekaduruita yuiri, nyãse siya aintauri sakakuera.
16 Asui kuaita umpinimawaita farizewita yuiri aintaumaa Jesus umbau aintairumu kuaita publikanuita pekaduruita yuiri, aintaunyee umbuewaita supe:
—Marantaa umbau aintairumu kuaita publikanuita pekaduruita yuiri?
17 Jesus usendu irumu aintanyenga unyee ainta supe arama:
—Tiaintauputari umpusangasara kuaita tiwaita imãsi, maa kuaita imãsiwaita aintauputari ae, timaa hayuiri hasenui purangawaita maa hayuiri hasenui kuaita pekaduruita.
uyukuaku rese
18 Kuaita Juão umbuewaita aintauyukuaku kuaita farizewita umbuewaita yuiri, asui aintauri ipiri aintaupurandu ae:
—Marantaa aintauyukuaku Juão umbuewaita farizewita umbuewaita yuiri maa kuaita rembuewaita tiaintauyukuaku?
19 Jesus unyee ainta supe:
—Maitaa aintaupuderi aintauyukuaku kuaita aintausenuiwaita kazamentu festa upe uiku pukusaware aintairumu kua nuivu? Tiaintaupuderi aintauyukuaku aikue rame aintairumu kua nuivu.
20 Maa amu ara kuri aintaurasu aintasui kua nuivu asui kuri aintauyukuaku.
21 Tiyapuderi yaremendari kuximawara fazenda pisasuwaa irumu yawaite usuruka kua kuximawara asui puxuwera panye yanemaa.
22 Tiyaxari vinyu pisasuwaa siru kuximawara uvelya pirera suiwara upe yawaite vinyu riru usuruka kuximawarawaa, yawaite ukanyemu kua vinyu siru yuiri. Maa yaxari vinyu pisasuwaa siru pisasuwaa upe.
Sauru iyara kua Jesus
23 Asui yepe sauru rame Jesus usasawa kupixawa rupi asui umbuewaita aintaumpena awati.
24 Asui kuaita farizewita aintaunyee ixupe:
—Remaa, marantaa aintaumunya kua tiwa puranga yamunya sauru ara upe?
25 Asui Jesus unyee ainta supe:
—Maitaa tire peleri Davi resewara upurara irumu yumãsi?
26 Ae uwike Deus ruka kiti saserduti ruixawa pukusawa kua Abiataru, umbau meyu aintauxariwaa Deus supe, anyunte saserdutita upuderi umbau ae, asui uxari aintaumbau arama kuaita sumuaraita yuiri.
27 Asui Jesus unyee ainta supe:
—Deus umunya sauru aintaresewara kuaita miraita, timaa umunya miraita sauru resewara.
28 Ape sauru ruixawa yuiri kua unaseriwaa umaa kua mundu.
