Marku 8:1-38
8 Asui amu ara aintauyumuatiri mukuĩsawa kuaita miraita siyawaita, timaa aintauriku aintaumbau arama, asui Jesus usenui ipiri kuaita umbuewaita unyee ainta supe:
2 —Pirasua hamaa kuaita miraita nyãse aintaurikuana musapiri ara aintauiku seirumu timaa nungara aintaumbau.
3 Hamundu rame maa aintauyuiri aintaruka kiti tirame maa aintaumbau aintauwari maa pee rupi nyãse apekatu sui aintauri amuita.
4 Maa kuaita umbuewaita usuaxara ae:
—Maa suitaa maa yawasemu meyu ike iyaraimawaa upe aintaumbau arama aintaapu arama?
5 Jesus upurandu ainta:
—Muiritaa periku meyu? Aintausuaxara ae:
—Yariku seti meyuita.
6 Asui Jesus umundu aintauwapika iwi upe kuaita miraita. Asui upisika seti meyu umee grasa asui upixama ainta umee arama umbuewaita supe aintaupartiri ainta supe kuaita siyawaita.
7 Aintauriku yepeyepe pirá kuairawaa umee rire grasa aintarese umundu aintaupartiri yuiri ainta supe kuaita siyawaita.
8 Asui aintaumbau aintaapu, asui aintaumuatiri seti sextu aintaumbauwaa rimirera.
9 Aikue yamanduarintu kuatru mili miraita. Asui Jesus uxari aintausu.
10 Asui yawewaa rire uwiye igara upe umbuewaita irumu usu arama amu kiti iwi sera Damanuta.
Farizewita uputari umaa milagri
11 Asui uri kuaita farizewita aintauputari aintauyutemari irumu asui aintauputari aintausaã ae aintaupurandu irumu milagri iwaka suiwara.
12 Asui Jesus usiki ianga arama turusu, asui unyee:
—Marantaa kuaita miraita kuiriwaita aintausikari umaa milagri? Supiwa hambeu penye arama, kuaita miraita kuiriwaita tikuri aintaumaa milagri.
13 Asui uxari aintauwiye yuiri igara upe usu arama sendawa kiti.
Farizewita maniaka membeka
14 Asui tiaintaumanduari aintaurasu aintameyu arama, anyunte aintauriku aintaigara upe yepenyu meyu.
15 Asui Jesus umbeu ainta supe:
—Pemaa pesui aintamaniaka membeka kuaita farizewita, imaniaka membeka yuiri kua Erudi.
16 Asui aintauyumbeu aintapawa:
—Yawe unyee tiresewara yarasu meyu.
17 Asui Jesus ukuawa aintaumbeuwaa upurandu ainta:
—Marantaa pembeu penye arama tiresewara perasu meyu? Maitaa tire pemaa? Maitaa tire pekuawa? Maitaa santawaa pepia?
18 Periku peresa, maitaa tipemaa? Periku peapisa kuara, maitaa tipesendu? Maitaa tipemanduari?
19 Maitaa tipemanduari kua sinku meyu hapixamawaa ainta supe kuaita sinku mili miraita, muiritaa sextu pemuatiri aintaumbauwaa rimirera? Aintaumbeu ixupe:
—Duzi sextu.
20 Maitaa tipemanduari hapixamawaa kuera seti meyu ainta supe kuaita kuatru mili miraita, muiritaa sextu simirera pemuatiriwaa? Aintaunyee ixupe:
—Seti sextu.
21 Asui Jesus unyee ainta supe:
—Maitaa tire pekuawa?
Umukaturu yepe sesaimawaa
22 Asui aintausika Betisaida kiti, asui aintaurasu ixupe yepe sesaimawaa aintaupurandu Jesus uxari arama ipu sese.
23 Asui Jesus upisika ipu urasu ae tetama sui asui utumuna sesa upe uxari ipu sese asui upurandu ae:
—Maitaa remaawana?
24 Asui umaawana, unyee ixupe:
—Hamaa apigawaita maye mirá yawe, aintauwata.
25 Asui uxari mukuĩsawa ipu sesa upe, asui umukaturuana sesa asui umaawana puranga.
26 Asui Jesus umundu usu suka kiti asui umbeu ixupe:
—Teresu tetama kiti kuiri.
Pedru umbeu Kristu kua Jesus
27 Asui Jesus usu umbuewaita yuiri, aintausu tetama kiti Sezareya Filipe kiti, asui pee rupi upurandu ainta:
—Mayetaa aintaupurungita serese kuaita apigawaita, awataa ixe?
28 Asui aintausuaxara ae:
—Amuita umbeu —Juão Batista inde, amuita umbeu —Elia inde, maa amuita umbeu —Inde yepe aintasuiwara kuaita utitikawaita.
29 Asui upurandu ainta:
—Penyetaa, maitaa peseruka ixe? Asui Pedru usuaxara ae unyee ixupe:
—Indete Kristu.
30 Asui Jesus umbeu ainta supe:
—Tepembeu seresewara yawewaa.
Umbeu ainta supe umanu kuri ae
31 Asui uyupiru umbue ainta:
—Kua Deus raira urikute upurara turusu, urikute uxari aintaumburi ae kuaita tuyuweita kuaita yuiri saserduti ruixawaita umpinimawaita yuiri urikute uxari aintauyuká ae, asui musapiri ara rire upaka yuiri kuri.
32 Yawe unyee ainta supe uyukuawawaa irumu. Asui Pedru usenui ae amu kiti, umbeu ixupe:
—Terembeu yawewaa.
33 Asui Jesus uyereu umbuewaita kiti kirimbawa umbeu Pedru supe:
—Resu sesui inde Yurupari, timaa remanduari Deus yawe maa apigawa yawe.
Usuwaita Kristu rakakuera
34 Asui umuatiri yuiri kuaita siyawaita umbuewaita yuiri, unyee ainta supe:
—Awa uputari usu seirumu urikute uyuxari aepawa urikute usupiri ikurusa usu arama seirumu.
35 Maa kua ugustariwaa kua ara, kua ara ukanyemu kuri isui, kua tiwa ugustari kua ara seresewara senyenga resewara yuiri uriku kuri ara nunkawaa upawa.
36 Maataa kuri sikuyara ixupe kua apigawa uganyariwaa panye kua mundu iyara asui ukanyemu kuri isui mundu nunkawaa upawa?
37 Maa irumutaa apigawaita upuderi upiripana kua mundu nunkawaa upawa?
38 Mayewaa aintasuiwara kuaita miraita kuiriwaita uyumuwarixiwaita puxuwerawaita utiĩwaa rame ae seresewara senyenga resewara yuiri, utiĩ yuiri kuri umaa suaxara kua unaseriwaa umaa kua ara uri rame kuri iwaka sui umuturi ipaya iyawe aintairumu kuaita anjuita purangawaita.
