Mateu 28:1-20
28 Asui sauru rire kuemaite mitu rame uri umaa ita kuara kua Maria Madalena kua amu Maria yuiri.
2 Asui kirimbawa uriri kua iwi nyãse yaneDeus anju uwiye iwaka sui uri umutirika ita kuara rukena sui kua ita turusuwaa, asui uwapika sese.
3 Kirimbawa suwa umuturi kuaye truvão werawaa yawe, murutingawaa irupa kuaye ii tiesawa murutingawaa yawe.
4 Asui aintauriri kuaita usaruwaita kua ita kuara aintausikie resewara isui, asui aintauwari aintauyenu iwi upe kuaye umanuwaa yawe.
5 Maa kua anju umbeu ainta supe kuaita kunyaita:
—Tepesikie penye, nyãse hakuawate pesikari kua Jesus aintaunupawaa uyari kurusa rese.
6 Tiana yamaa ike ae, uyuiriana upaka kuaye umbeuwaa yawe. Peyuiri pemaa kua uyenuwaa kuera upe.
7 Pesuana kutara pembeu arama umbuewaita supe:
—Uyuiriana upaka manusawa sui, asui kuiri usu arama perunde Galileya kiti, akiti kuri pemaa ae, anyunte hambeu penye arama.
8 Asui kutara aintauyuiri ita kuara sui aintausikie maa suuri aintapia turusu, aintauyana aintaumbeu arama umbuewaita supe ae.
9 Asui Jesus uri aintaruaxara umbeu ainta supe:
—Suuri penye, asui aintausu suaki aintaupisika ipi rese, aintaumee ixupe purangawaa.
10 Ape Jesus umbeu ainta supe:
—Tepesikie, pesu pembeu semuita supe aintausu arama Galileya kiti, akiti kuri aintaumaa ixe.
Serakuenawaita upagari suraraita
11 Asui aintausuwaa upe anyunte yepeyepe usaruwaita ita kuara aintausu tetama kiti aintaumbeu saserdutita ruixawaita supe kua usasawawaa ita kuara upe.
12 Asui aintauyumuatiri aintauyupurungita arama kuaita serakuenawaita tuyuweita irumu, asui aintauxari turusu dinyeru ainta supe kuaita suraraita.
13 Aintaumbeu ainta supe:
—Kuiri kuri pembeu ainta supe kuaita miraita, umbuewaita umunda ipira pituna rame yakiri pukusawa.
14 Usendu rame peresewara pekiri kua peruixawa yambeu kuri peresewara puranga tiarama kuri uxari pepurara.
15 Asui aintaupisika kua dinyeru kuaita suraraita, asui aintaumunya kuaye aintaumbeuwaa yawe ainta supe, ape kuaita judewita aintaumbeu kua nyenga aintausenduwaa ate kuiri yuiri.
Jesus umaa umbuewaita
16 Asui kua unzi umbuewaita aintausu Galileya kiti, aintausu aintausaru Jesus yepe iwitera rese umbeuwaa kiti.
17 Asui aintaumaa irumu Jesus aintaumee ixupe purangawaa, maa yepeyepe mukuĩ aintaumanduariwaa.
Jesus umundu ainta
18 Asui Jesus uri aintapiri umbeu ainta supe:
—Umeewana ixe arama panye ikirimbawasawa panye iwaka kiti panye kua ara upe yuiri.
19 Ape pesu arama pembue panye kua mundu upe pebatizari ainta sera rese kua sepaya taira Espiritu Santu yuiri.
20 Pembue ainta aintauruyari arama panye kua nyenga hamunduwaa peruyari, ape peirumute kuri ixe yawewarawate, ate mairame upawa kua mundu.
