Tiagu 5:1-20
5 Kuiri penye rikuita, peyaxiu, pesasemu sesewara kua pepurarawaa kuri.
2 Pemaa iyukana, asui trasa umbawana perupaita.
3 Peyaraita uru suiwaraita, prata yuiri ferujuana ainta, asui aintaferuju umbeu peresewara, asui umbau kuri perukuera kuaye tata usapiwaa yawe. Pemuatiriana pemaa anyu aramawaa ara runde.
4 Pemaa, kua aintaupurakiwaa rikuyara pesaisu aintasui kuaita upuuwaita pekupixawa upe usenuiwana kirimbawa, asui kua aintaruixawa kuaita siyawaita usenduana aintausenui kuaita upuuwaita.
5 Puranga peiku kua mundu upe pemaa irumu, peyumusuuri, peyumukirá kua mundu purangasawa irumu.
6 Pexariana tiarama ueskapari kua apigawa purangawaa, asui peyuka ae, maa tiumuruanyana penye.
Yaaguentari puranga
7 Ape penye semuita, periku pasiensia ate yaneruixawa uri. Pemaa kua upurakiwaa kupixawa upe usaru uikupuku imitima iya ate amana uwari.
8 Ape penye peaguentari yuiri. Asui pemukirimbawa pepia nyãse kuayentuana yaneruixawa rangawa uri arama.
9 Semuita, tepembeu amu resewara tiarama kuri umbeu peresewara, nyãse kua umbeu yaneresewara uikuana ukena ruaki.
10 Semuita, pemaa perangawa maye kuera aintaupurara, maye kuera yuiri aintauwaguentari kuaita utitikawaita umbeuwaita yaneruixawa rera rese.
11 Suuriwaita yaseruka kuaita uikuwaita kuera santa. Pesenduana maye kuera uiku santa kua Jú, pekuawate maye kuera yaneruixawa uxari ixupe turusu purangawaa anyu aramawaa; pekuawate purangawaa yaneruixawa pirasua umaa yande arama.
Tepembeu nyenga kirimbawa
12 Ape semuita, tepembeu kirimbawa nyenga iwaka rese, mundu rese yuiri, tiyuiri maa resentu; pembeu rame ẽẽ, perikute pemunya kuaye pembeuwaa yawe, yawete yuiri pembeu rame umbaa, yawaite puxi aintaumbeu perese.
13 Upurara rame yepe pesuiwara, urikute upurandu Deus irumu. Suuri rame yepe urikute unyengari purangawaa.
14 Imãsi rame yepe pesuiwara, urikute usenui kuaita ingreja serakuenawaita, aintaupurandu arama sese, asui aintauxari azeti iakanga rese yaneruixawa rera rupi.
15 Asui aintaupurandu resewara uruyarisawa irumu umukaturu kuri kua imãsiwaa, asui yaneruixawa usupiri kuri ae mãsi sui, umunya rame ipuxuwerasawa umburi kuri isui ae.
16 Ape pembeu pepekadu perumuaraita ainta supe, pepurandu perumuaraita rese, umukaturu arama kuri penye mãsi sui. Deus kuri usendu ixupe kua purangawaa upuranduwaa irumu kirimbawa.
17 Asui kua Elia apigawa ae kuaye yaneyawe, asui upurandu Deus irumu kirimbawa tiarama amana uwari, asui musapiri akayu seis yasi yuiri timaa amana uwari iwi rese.
18 Asui upurandu mukuĩsawa Deus irumu, asui amana uwari iwaka sui, asui usini panye mitima iwi sui.
19 Semuita, yepe pesuiwara uyusupari rame ae isui kua nyenga supiwa, asui amu umuyuiri ae,
20 Pekuawate kua umuyuiriwaa kua uyusupariwaa sapee puxuwerawa sui, umukaturu kuri ae manusawa sui, asui uyumimi ipuxuwerasawa siyawaita.
