Titu 3:1-15
3 Rexari aintaumanduari aintauruyari arama aintanyenga kuaita umunduwaita ainta, guvernuita yuiri, aintauruyari arama aintanyenga puranga, suuri arama aintaumunya panye muraki purangawaa;
2 Tiarama aintaumbeu puxi amuita rese; tiarama aintaumaramunya; tiarama aintapiaiwa, aintaurespetari arama panye apigawaita.
3 Nyãse kuxima yande yuiri tiwaita ukuawa yande, tiwaita uruyari yande, uyusupariwaita yande, yanepira umprezuwaa kuera yande yamunya arama kuaye uputariwaa yawe, yamusuuri arama ae, yaikuwaa kuera panye puxuwerawa rese, yamuasi, yanepiaiwa yuiri yande, puxi yayumaa.
4 Maa usika rameana kuera yanerese ipurangasawa, ugustarisawa yuiri kua Deus umukaturuwaa yande,
5 Asui umukaturu yande, maa timaa yamunyawaita purangawaita resewara, maa pirasua resewara umaa yande, utrukari yamanduarisawa pisasua irumu kua Espiritu Santu umuyasukawaa yande.
6 Kua uyusenawaa yanerese turusu sesewara kua Jesus Kristu kua umukaturuwaa yande.
7 Umaa arama yande kuaye purangawaita yawe ipurangasawa resewara, ixupe aramawaita yande yasaru arama irumu kua mundu tiwa upawa.
8 Supiwate kua nyenga, haputari kirimbawa rexari aintaumunya arama kuaye hambeuwaa yawe, aintausikari arama kirimbawa aintaumunya purangawaa kuaita uxariwaita aintapia Deus rese. Puranga yamunya yawe, nyãse uajudari kuaita apigawaita.
9 Teresendu ainta supe kuaita aintaupurungitawaita tenyuntu, teresendu aintairumu kuaita upurungitawaita aintaramunyaita rese, terexari aintaupurungita tenyuntu, teresikari remaramunya Deus nyenga kuximawara rese, nyãse kuaita yawewaita timaa arama ainta, retentuwaa ainta.
10 Rexari nesui kua apigawa uruyariwaa apekatu Deus nyenga sui, tirame uruyari inde, rembeu rireana ae yepe u mukuĩ viaji.
11 Rekuawa tenyuntuwara umanduarisawa kua apigawa, turusu umunya ipuxuwerasawa, uyuxari simutara ukanyemu arama aepawate.
Kuekatu
12 Hamundu rame kuri nepiri kua Artema u Tikiku, reyuiri kutara sepiri Nikupuli upe, nyãse haputari haiku ape paranawasu rame.
13 Remundu puranga aintausu, Zena kua umbeusara Deus nyenga kuximawara rese, asui Apulu yuiri; terexari aintausu yawentu.
14 Asui kuaita yanemiraita rexari aintausikari aintaumunya purangawaa ainta supe kuaita watariwaita ainta supe, yawaite tiaintauriku aintaiya.
15 Panye kuaita serumuaraita aintaumundu kuekatu inde arama; rexari sekuekatu ainta supe panye kuaita uruyariwaita ugustariwaita yande. Deus purangasawa uiku peirumu muiri penye.
