UMBUESÁ 7
Mayé repoderi rembué ne raíraitá?
“Kuá ñheenga amunduwaá peruyari arama urikuté uikú ne piá upé, asuí rerikuté rembué aé ne raíraitá supé.” — Deuteronômio 6:6, 7
Mairamé Jeová umuñhãwaá anamaitá aé uxari payaitá supé yepé murakí, ta umukirari arama ta raíraitá. (Kolosowaraitá 3:20) Payaitá ta urikuté ta umbué ta raíraitá ta usaisú arama Jeová asuí ta uyukirari arama mayé yepé mira purangawaá. (2 Timóteo 1:5; 3:15) Rerikuté resikari rekuá mayé ne raíraitá ta uyusaã ta piá upé asuí maã ta umanduári. Rerikuté rexari ta umaã ne rangá purangawaá. Rembué arama puranga ne raíraitá Deus Ñheenga resé, primeiro rerikuté rerikú aé ne piá upé. — Salmo 40:8.
1 REXARI NE RAÍRAITÁ TA UKUÁ INDÉ RESENDÚ AINTÁ
MAÃ BÍBLIA UMBEU: ‘Aintá usendú arama kutara pañhe kuaitá apigawaitá, ti aintá ukuntari arama kutara.’ (Tiago 1:19) Indé reputari ne raíraitá ta ukuntari ta piá suí ne irum, ti será? Ayuã, aintá uprecisari ta ukuá resú resendú ta uprecisari ramé ta ukuntari ne irum. Reikú ramé yepewasú ne raíraitá irum ta usú ta ugustari ta ukuntari ne irum. (Tiago 3:18) Sá reyaká u rekuntari puxiwera ta resé aintá ti ta usú ta uputari ta ukuntari ne irum. Rerikú paciência ne raíraitá irum asuí rexariwara ta ukuá resaisú aintá. — Mateu 3:17; 1 Korintowaraitá 8:1.
MAÃ REPODERI REMUÑHÃ:
-
Mairamé ne raíraitá ta uputari ta ukuntari ne irum resendú puranga aintá.
-
Rekuntariwara ne raíraitá irum umbá añhũ ta usasá ramé iwasuwaá rupí.
2 RESIKARI REKUÁ MAÃ RESÉ TA UPUTARI TA UKUNTARI
MAÃ BÍBLIA UMBEU: “Awá ukuawaá puranga yepé maã resé usú usasá puranga.” (Provérbios 16:20) Amuramé reprecisari resikari rekuá maã usasá ipiá upé rekuá arama mayé uyusaã. Amuramé pisasuwaitá ta ukuntari maã tiwaá ta uputari u teñhuntuwaá. “Awá usuaxara usendú rundé, aé teñhuntuwara asuí upawa puxiwera.” (Provérbios 18:13) Yawé arama te ne piaíwa. — Provérbios 19:11.
MAÃ REPODERI REMUÑHÃ:
-
Até mairamé ne raíraitá ta umbeu maã tiwaá regustari, paciência irum rexari ta ukuntari pawa.
-
Resikari remanduári mayé reyusaã pisasú ramé kuera indé asuí maã kuera importante indé arama ñhã tempo upé.
3 REXARI TA UKUÁ REMANDUÁRIWAÁ YEPEWASÚ NE MENA U NE RIMIRIKÚ IRUM
MAÃ BÍBLIA UMBEU: “Resendú, se raíra, mairamé ne paya umusatambika indé asuí te rexari resendú maã ne mañha umbeuwaá.” (Provérbios 1:8) Jeová uxari payaitá ta umundú arama ta raíraitá resé. Yawé arama, peprecisari pembué pe raíraitá ta urespeitari arama asuí ta usendú arama peñhe. (Efezowaraitá 6:1-3) Taínaitá ta ukuá ‘ti ramé pemanduári yepewasú’ (1 Korintowaraitá 1:10) Ti ramé pemanduári yepewasú yepé maã resé, te rexari pe raíraitá ta ukuá, ñhãsé kuá rupí ti ta usú ta urespeitari peñhe.
MAÃ REPODERI REMUÑHÃ:
-
Peyukuntari peparawaka arama mayé pesú pemusatambika pe raíraitá.
-
Resikari remaã pañhe maã mayé ne mena u ne rimirikú umaãwaá yawé pemanduári ramé amurupité pemukirari resé pe raíraitá.
4 REMANDUÁRI PURANGA
MAÃ BÍBLIA UMBEU: “Rembué ne raíraitá ta uwatá arama peé purangawaá rupí.” (Provérbios 22:6) Te rembué ne raíraitá mayentu. Reprecisari remanduári puranga asuí remusatambika ta uprecisari ramé. (Salmo 127:4; Provérbios 29:17) Remusatambika ramé ne raíraitá indé ti añhũ rerikuté reyaká aintá, ma reajudari aintá ta ukuá arama marã remundú ta umuñhã arama yepé maã. (Provérbios 28:7) Rembué aintá ta usaisú arama Jeová Ñheenga asuí ta ukuá arama conselhoitá resé. (Salmo 1:2) Kuá usú uajudari ta ukuá arama maã purangawaá asuí maã puxiwerawaá. — Ebreoitá 5:14.
MAÃ REPODERI REMUÑHÃ:
-
Rembué ne raíraitá ta umaã arama Deus mayé yepé mira ta upoderiwaá ta uruyari.
-
Reajudari ne raíraitá ta uyawáu arama ikiawaá suí ta upoderiwaá ta uwasemu internet upé. Rembué aintá ta umaã katú arama ta suí kuá miraitá ta uputariwaá ta upisika aintá.
“Rembué kurumĩwasú mayewaá peé rupí urikuté uwatá.”
