Yandé yapurará retana manũsá resewara. Yawé arama, Bíblia useruka manũsá mayé yané ruayana. (1 Korintowaraitá 15:26) Umbuesá 27 upé, indé reyumbué Jeová usú umukañhemu manũsá. Ma maã usú usasá umanũwaitá irum? Kuá umbuesá upé, resú reyumbué yepé Jeová promessa purangawaá resé: aé usú kurí umbaka siya umanũwaitá ta uviveri arama pañhe ara. Será yapoderi yaruyari usuté usasá kuayé? Mamé tá usú tá uviveri ta upaka ramé manũsá suí? Será iwaka upé u iwí upé?

1. Maã Jeová uputari umuñhã yané rumuaraitá rupí u yané anamaitá rupí ta umanũwanawaá?

Jeová uputari retana umbaka umanũwaitá. Yepé apigá umuñhãwaá kuera Deus vontade iserawaá Jó, ukuawaté Deus ti sesarai aé umanũ ramé. Aé umbeu Deus supé: “Indé resenúi kurí ixé asuí ixé asú asuaxara kurí indé.” — Releri Jó 14:13-15.

2. Mayé yakuá umanũwaitá ta upoderi ta upaka?

Mairamé Jesus uikú kuera iwí upé, Deus umeẽ ixupé kirimbasá umbaka arama umanũwaitá. Yepé exemplo, Jesus umbaka kuera yepé kuñhãmukú asuí yepé viúva membira. (Marko 5:41, 42; Luka 7:12-15) Aé umbaka kuera yuíri isumuara Lázaro umanũwanawaá kuera quatro ara. Jesus upurandú Deus irum asuí umbeu: “Indé Lázaro, resemu!” Asuí “kuá umanũwaá kuera usemu”. Lázaro upaka! (João 11:43, 44) Remanduári mayé isumuaraitá asuí ianamaitá ta upitá surí ta umaã ramé Lázaro upaka mukũisá!

3. Maã yapoderi yasarú usasá arama kurí yané rumuaraitá asuí yané anamaitá irum ta umanũwanawaá?

Bíblia uprometeri: “Deus usupiri manũsá suí kuaitá.” (Ato 24:15) Miraitá Jesus umbakawaitá kuera ti ta usú iwaka kití. (João 3:13) Aintá ta upitá surí ta uikú resewara iwí upé mukũisá. Yaweté yuíri, kuaírantuwana Jesus usú umbaka siya miraitá ta uviveri arama pañhe ara yepé paraíso upé iwí upé. Aé umbeu “pañhe kuaitá iwí kuara upéwaitá” ta usú ta upaka. (João 5:28, 29) Kuá uputari umbeu pañhe awá Deus umanduáriwaá isesé usú uviveri mukũisá, até awaitá miraitá tiã ta umanduári ta resé.

 REYUMBUÉ PIRI ARAMA

4. Jesus uxari yakuá aé upoderi umbaka umanũwaitá

Remaã maã xinga Jesus umuñhã isumuara Lázaro rupí. Peleri João 11:14, 38-44. Ariré pekuntari kuá resé:

• Supí será Lázaro umanũ? — Pemaã kuá versículo 39.

• Jesus umbaka Lázaro uviveri arama iké iwí upé mukũisá. Sá Lázaro usúma iwaka kití, puranga será Jesus umuyuíri aé iwí kití?

Pemaã kuá VÍDEO.

5. Siya miraitá ta usú ta upaka manũsá suí!

Peleri Salmuitá 37:29. Ariré pekuntari kuá resé:

• Siya miraitá ta usú ta upaka. Mamé ta usú kurí ta uviveri?

Jesus usú umbaka Jeová miraitá ta umanũwanawaá asuí yuíri siya amú miraitá. Peleri Ato 24:15. Ariré pekuntari kuá resé:

• Awá reputari remaã mairamé umanũwaitá ta upaka mukũisá?

• Mayé umusurí Phelicity payaitá ta usarú resewara umanũwaitá ta usú ta upaka?

 MAÃ REYUMBUÉ

Bíblia uprometeri siya miraitá ta umanũwanawaá ta usú ta upaka manũsá suí. Jeová uputari aintá ta uviveri arama mukũisá asuí umeẽ kirimbasá Jesus supé umbaka arama umanũwaitá.

Remanduári arama

• Maã Jeová asuí Jesus ta uputari ta umuñhã umanũwaitá rupí?

• Upakawaitá ta usú ta uviveri iwaka upé u iwí upé? Marã rembeu kuayé?

• Indé reruyari ne piá suí umanũwaitá ta usú ta upaka? Marã?