Kex cincuenta betelitaʼob ku meyajoʼob bul semana tu kaajil Duala yaan Camerúnoʼ. Maʼ kun xáantaleʼ yaan u meyajoʼob teʼ túumben Betel ku beetaʼaloʼ. Le oficinaʼob yaan tu kaajil Bonabérioʼ yaan u xuʼulul u meyajoʼob tumen táan u beetaʼal junpʼéel u Najil Betel tiʼ junpʼéel lugar ku kʼaabaʼtik Logbessou. Le u kʼaʼabéettal junpʼéel túumben Beteloʼ ku yeʼesikeʼ táan u maas yaʼabtal le máaxoʼob meyajtik Dios teʼ Camerúnoʼ. Tu añoil 2017, maas tiʼ 100,000 máakoʼob tu muchʼubaʼob utiaʼal u kʼaʼajsikoʼob u kíimil Cristo, lelaʼ maas tiʼ u dobleil le Testigoʼob yanoʼob teʼeloʼ.

Le túumben Beteloʼ táan u beetaʼal tu tséel junpʼéel u Najil Asamblea yéetel tsʼoʼok u káajal u beetaʼal u cimientoil. Teʼeloʼ yaan xan u beetaʼal cuartoʼob óoliʼ jeʼex le suuk u beetaʼal teʼ bandaoʼ yéetel yaan u beetaʼal xan oficinaʼob jeʼex u chíikpajal teʼ dibujo yaan tu káajbal le xookaʼ. Tu tsʼoʼokbal u añoil 2019 tuklaʼan u máan kajtal le betelitaʼoboʼ.

Gilles Mba, juntúul betelita yaan Camerún yéetel ku meyaj teʼ Sección de Información Públicaoʼ, tu yaʼalaj: «Jach jatsʼuts u yilaʼal u milesil sukuʼunoʼob kiʼimak u yóoloʼob taak u meyajoʼob yéetel ku tuukuloʼob jeʼex le profeta Isaíasoʼ» (Isaías 6:8). Tu yaʼalaj xan: «Tuláakal le máaxoʼob táan k-meyaj Beteloʼ jach kiʼimak k-óol ikil u beetaʼal le najaʼ. K-tsʼíiboltik u séeb tsʼoʼoksaʼal utiaʼal k-meyajtik Jéeoba tumen letiʼe baʼax oʼolal ku beetaʼaloʼ».