7 TIʼ MAYO TIʼ 2018
COREA DEL SUR
U testigoʼob Jéeobaeʼ tu tʼoxoʼob publicaciónoʼob jóoʼsaʼan teʼ Biblia teʼ Juegos Olímpicos yéetel Paralímpicos 2018
Tu kʼiinil 9 tak 25 tiʼ febrero yéetel 9 tak 18 tiʼ marzoeʼ, beetaʼab tu kaajil Pyeongchang le Juegos Olímpicos yéetel Paralímpicos tiʼ Invierno 2018. Le testigoʼob tiʼ Jéeoba kajaʼanoʼob Corea del Suroʼ táakpajoʼob tiʼ junpʼéel campaña utiaʼal u tsʼáaikoʼob tiʼ le máakoʼob publicaciónoʼob ku tʼaanoʼob tiʼ le Bibliaoʼ.
Teʼ luʼumilaʼ maas tiʼ 7,100 Testigoʼob táakpajoʼob tiʼ le campañaaʼ. Yaʼab tiʼ letiʼobeʼ tiʼ u taaloʼob tiʼ u noj kaajiloʼob Busán, Gwangju, Incheon, Seúl yéetel Suwon. Yanoʼob xaneʼ tiʼ u taaloʼob tiʼ junpʼéel isla jach kʼaj óolaʼan ku kʼaabaʼtik Jeju, lelaʼ maas tiʼ 480 kilómetros (120 leguas) u náachil tiʼ u noojolil Pyeongchang.
Le Testigoʼoboʼ tu tsʼáajoʼob 152 carritoʼob tiʼ 48 lugaroʼob, ichil leloʼobaʼ yaan tu tsʼáajoʼob teʼ Parque Olímpico tiʼ Gangneung bey xan teʼ Plaza Olímpica tiʼ Pyeongchangoʼ. Tsʼaʼabtiʼob permiso xan utiaʼal u tsʼáaikoʼob carritoʼob tu jool le tuʼux ku muchʼkuba junpʼéel religión teʼ Villa Olímpicaoʼ.
Kaʼapʼéel carritoʼob tsʼaʼab naatsʼ teʼ jool yaan tu xamanil le Parque Olímpico yaan Gangneungoʼ.
Tsʼoʼoleʼ le autoridadoʼoboʼ tu tsʼáajoʼob permiso utiaʼal u tsʼaʼabal carritoʼob tu Estaciónil Gangneung. Lelaʼ letiʼe túumben terminal tuʼux ku láaj kʼuchul le trenoʼob chich u binoʼob kʼaj óolaʼanoʼob KTX tiʼ le Línea Gyeonggangoʼ. Le trenoʼobaʼ ku bisik máakoʼob desde tu kaajil Incheon yéetel Seúl tak tu kaajil Pyeongchang. Tu yáax kʼiinil le Juegos Olímpicosoʼ maas tiʼ 28, 000 máakoʼob máanoʼob tu Estaciónil Gangneung.
Utiaʼal u atendertaʼal le 80,000 máakoʼob taaloʼoboʼ, jóoʼsaʼab teʼ carritoʼob libroʼob, folletoʼob, revistaʼob yéetel tratadoʼob ichil 20 idiomaʼob, ichiloʼobeʼ chino, coreano, inglés, kazajo yéetel ruso. Tsʼoʼoleʼ le sukuʼunoʼob u yojloʼob señas ich coreanooʼ tu yeʼesoʼob videoʼob utiaʼal le máaxoʼob kóokoʼob taaloʼob teʼ Juegos Paralímpicosoʼ. Tʼoʼox maas tiʼ 71,200 publicaciónoʼob, ichileʼ táakaʼan maas tiʼ 22,000 invitaciónoʼob utiaʼal u kʼaʼajsaʼal u kíimil Cristo.
U testigoʼob Jéeobaeʼ ku meyajtiʼob maas tiʼ 300,000 carritoʼob utiaʼal u tʼaanoʼob tiʼ Dios ich maas tiʼ 35 luʼumiloʼob. Lelaʼ le áantkoʼob utiaʼal u tsʼáaikoʼob kʼaj óoltbil u Tʼaan Dios tiʼ tuláakal le máakoʼoboʼ (2 Timoteo 4:5).