Tu kʼiinil 9 tiʼ octubre tiʼ 2024, le huracán Miltonoʼ tu jatsʼuba Florida (Estados Unidos). Le huracánaʼ categoria 3, le oʼolal yaʼab baʼaloʼob tu kʼaskúuntaj yéetel tu beetaj u búulul le kaajoʼoboʼ. Tsʼoʼoleʼ chéen kaʼapʼéel semana máanak xan le huracán Heleneoʼ. U yiikʼal le huracán Miltonoʼ tu chukaj 289 kilómetros por hora yéetel tu beetaj u sen kʼáaxal jaʼ, u kaʼanlil le jaʼoʼ tu chukaj kex 45 centímetros. Tsʼoʼoleʼ u olasil le kʼáaʼnáaboʼ tu chukaj tak 3 metros u kaʼanlil.

Le huracánoʼ tu beetaj u formar kex 38 tornados Florida le oʼolal maas yaʼab baʼaloʼob tu kʼaskúuntaj. Kex 24 máakoʼob kíimoʼobiʼ yéetel óoliʼ 80,000 u túulal pʼáat minaʼan corriente tiʼob.

• Mix juntúul sukuʼun kíimi.

• Kaʼatúul publicadoroʼobeʼ jach úuch loob tiʼob.

• Cuatro publicadoroʼobeʼ yaan baʼax úuchtiʼob.

• 9,949 publicadoroʼob anchaj u pʼatik u yotochoʼob, yaan tiʼ letiʼobeʼ maʼ páajchajak u suutiʼ.

• 16 najoʼobeʼ láaj júutoʼob.

• 235 najoʼobeʼ jach kʼaschajoʼob.

• 1,398 najoʼobeʼ yaan baʼax kʼaschajtiʼob.

• Junpʼéel salóneʼ yaan baʼax kʼaschajtiʼ.

• 30 salónoʼobeʼ pʼáat minaʼantiʼob corriente le oʼolal tak bejlaʼa maʼ páajchajak u muchʼkuba le sukuʼunoʼob teʼ salónoʼoboʼ.

• Kaʼapʼéel kʼiin antes u kʼuchul le huracán Miltonoʼ u sucursalil Estados Unidoseʼ tu túuxtaj cartaʼob tiʼ le maas tiʼ 800 congregaciónoʼob yanoʼob teʼ tuʼux ken u jatsʼuba le huracánoʼ. Teʼ cartaʼoboʼ ku yaʼalaʼaltiʼob kaʼach tuʼux jeʼel u páajtal u binoʼob wa taak u pʼatik u yotochoʼobeʼ.

• Le superintendenteʼob tiʼ circuito yéetel le ancianoʼoboʼ táan u yáantkoʼob yéetel táan u líiʼskoʼob u yóol le sukuʼunoʼob afectartaʼaboʼob tumen le huracán Milton yéetel Heleneoʼ.

• Formartaʼab óoxpʼéel Comitéʼob tiʼ Socorro utiaʼal u yáantaʼal le sukuʼunoʼoboʼ.

• Le sukuʼunoʼob kajaʼanoʼob Georgia yéetel Carolina del Suroʼ yéetel kiʼimak óolal tu kʼamoʼob tu yotochoʼob le sukuʼunoʼob lukʼoʼob Floridaoʼ.

Jach k-kʼáatik tiʼ Jéeoba ka seguernak u yáantik le sukuʼunoʼob afectartaʼaboʼob tumen le huracánoʼoboʼ (Isaías 4:6).