Ichil jujunpʼéel idiomaʼobeʼ nukaʼaj u tsʼáa tres años joʼopʼok u tsʼaʼabal u audiodescripciónil le asambleaʼob regionaloʼ. Le audiodescripciónoʼoboʼ ku tsolkoʼob baʼax le ku chíikpajal teʼ videoʼoboʼ yéetel maases ku meyaj tiʼ le máaxoʼob chʼóopoʼob wa le máaxoʼob maʼ jach sáasil u paakatoʼoboʼ. Lelaʼ junpʼéel tiʼ le meyajoʼob ku beetik u testigoʼob Jéeoba utiaʼal u yáantkoʼob le chʼóopoʼob yéetel le máaxoʼob maʼ jach sáasil u paakatoʼob utiaʼal u kankoʼob baʼax ku yaʼalik le Bibliaoʼ. Tiʼ tuláakal yóokʼol kaabeʼ yaan kex 43 millones máakoʼob chʼóopoʼob yéetel kex 295 millones máakoʼob maʼ jach sáasil u paakatoʼobiʼ.

Joel Snyder, u presidenteil junpʼéel asociación tuʼux ku beetaʼal audiodescripciónoʼob yéetel jach u yojel bix u beetaʼal le meyajoʼ, tu yaʼalaj: «Jach jakʼaʼan in wóol tumen u testigoʼob Jéeobaeʼ ku beetkoʼob publicaciónoʼob utiaʼal u yáantkoʼob le máakoʼob minaʼan u sáasiloʼoboʼ. Letiʼobeʼ ku tsʼáaikoʼob audiodescripciónoʼob teʼ videoʼob utiaʼal u jóoʼsaʼal u yutsil tumen le máaxoʼob chʼóopoʼoboʼ, le jeʼeloʼ óoliʼ mix máak beetik. Le oʼolaleʼ jach kin felicitartik u testigoʼob Jéeoba ikil u beetkoʼob le jeʼeloʼ».

Yoʼolal le pandemiaoʼ le Cuerpo Gobernanteoʼ tu yaʼalaj yaan u grabartaʼal le asamblea regional utiaʼal le año 2020, utiaʼal u béeytal u chaʼantik máak desde tu yotoch, tu yaʼaloʼob xaneʼ yaan u yantal u audiodescripciónil le videoʼoboʼ. Tu añoil 2020, le Departamento tiʼ Servicios tiʼ Traducción yaan tiʼ u testigoʼob Jéeoba tu kaajil Warwick, Nueva Yorkoʼ (Estado Unidos), tu tsʼáajoʼob u audiodescripciónil le videoʼob grabartaʼab utiaʼal le asambleaoʼ. Chéen baʼaleʼ tu añoil 2021, le meyajaʼ máansaʼab tiʼ le departamento ku preparartik le publicaciónoʼob ich jejeláas formatoʼob ku publicartaʼaloʼoboʼ, le departamento jeʼelaʼ tiaʼan tu kaajil Patterson, Nueva Yorkeʼ. Le equipo beetik le meyajaʼ tu kʼamaj junpʼéel curso ich Internet utiaʼal u beetkoʼob audiodescripciónoʼob jach maʼalobtakoʼob.

Joel Snydereʼ tu yaʼaleʼ «jeʼel u páajtal u kaʼansaʼal máak utiaʼal u beetik audiodescripciónoʼob jach maʼalobtakoʼobeʼ». Letiʼeʼ tu yaʼaleʼ utiaʼal u beetaʼal leloʼ «kʼaʼabéet u imaginartik máak le baʼax ku yúuchloʼ, yéetel le kéen u tsoleʼ ka meyajnaktiʼ tʼaanoʼob séeb u naʼataʼal yéetel maʼ chowaktakoʼobiʼ».

Le kéen kʼubéentaʼak le meyaj tiʼ junpʼéel equipooʼ táanileʼ chéen ku yuʼubikoʼob u audioil le videooʼ, maʼatech u chaʼantikoʼob. Ku imaginarkoʼob le baʼax ku yúuchloʼ, beyoʼ ku tsʼáaikubaʼob tu lugar le máaxoʼob minaʼan u sáasiloʼoboʼ. Tsʼoʼoleʼ ku tsʼíibtikoʼob le baʼaxoʼob tu naʼatoʼoboʼ. Kéen tsʼoʼokkeʼ le equipooʼ ku kaʼa tsʼáaik le videooʼ yéetel ku yilik tuʼux ken u tsʼáaʼob le audiodescripciónoʼoboʼ.

Maʼ chéen chʼaʼabil u tsʼaʼabal junpʼéel audiodescripción ichil junpʼéel video tuʼux ku yuʼubaʼal u tʼaan le máaxoʼob ku chíikpajloʼoboʼ. Michael Millen, táakaʼan ichil le equipo yaan tiʼ u testigoʼob Jéeoba ku beetkoʼob audiodescripciónoʼ, ku yaʼalik: «Como chichan le espacio tuʼux ku bin le audiodescripciónoʼ kʼaʼabéet k-chʼaʼtuklik baʼax ken k-tsʼáa utiaʼal u naʼataʼal le videooʼ. Le oʼolal unaj k-chʼaʼik en cuenta le tiempooʼ, le lugaroʼ, le máaxoʼob ku chíikpajloʼoboʼ bey xan le baʼax ku beetkoʼoboʼ».

Le equipo beetik audiodescripciónoʼoboʼ unaj u kanáantkoʼob maʼ u tsolkoʼob jach tuláakal le baʼax ku chíikpajal teʼ videooʼ. Tiʼ junpʼéel u libroeʼ, Joel Snydereʼ, ku yaʼalik tiʼ le máaxoʼob ku beetkoʼob audiodescripciónoʼoboʼ: «Le máaxoʼob uʼuyikoʼ maʼ kʼaʼabéet u chuchuknaʼatkoʼob le baʼax ku yaʼalaʼaloʼ, baʼaxeʼ le baʼax ku yuʼubikoʼoboʼ kʼaʼabéet u yáantaj utiaʼal u imaginarkoʼob le baʼax ku yúuchloʼ. Leloʼ u kʼáat u yaʼaleʼ maʼ unaj u yaʼalaʼal: ‹Le máakoʼ pʼujaʼan› wa ‹le koʼoleloʼ táan u tsʼíikil›. Baʼaxeʼ maas maʼalob ka aʼalaʼak: ‹Le máakoʼ u wolmaj u kʼab› wa ‹le koʼoleloʼ táan u yokʼol›» (De la imagen a la palabra, traducirtaʼan tumen Marta Brescia Zapata yéetel Irene Hermosa Ramírez).

Kéen tsʼoʼokok u tsʼíibtaʼal le audiodescripciónoʼob tumen le equipooʼ ku grabartaʼal tumen wa máax. Michael Milleneʼ ku yaʼalik bix unaj u beetaʼal: «Le máax kun grabartik le audiodescripciónoʼoboʼ maʼ unaj u copiartik le emoción yaan tiʼ le máax ku chíikpajal teʼ videooʼ. Tumen wa maʼeʼ le máax kun uʼuyik le audiodescripciónoʼoboʼ yaan u tuklikeʼ yaan uláakʼ máax ku chíikpajal aparte tiʼ le máax ku tʼaan teʼ videooʼ».

Kéen tsʼoʼokkeʼ ku yilaʼal wa yaan baʼax kun kʼaʼabéettal u yutskíintaʼal. Tsʼoʼoleʼ ku túuxtaʼal tiʼ le sucursaloʼob tuláakal le audiodescripciónoʼob tsʼoʼok u preparartaʼaloʼoboʼ, utiaʼal beyoʼ ka páajchajak u traducirtaʼal tiʼ uláakʼ idiomaʼob. Michael Milleneʼ ku yaʼalikeʼ teʼ kaʼapʼéel asambleaʼob tsʼoʼok u beetaʼaloʼ tu bisaj tres horas u beetaʼal chéen junpʼéel minuto audiodescripción.

Tak bejlaʼeʼ u testigoʼob Jéeobaeʼ táan u traducirkoʼob publicaciónoʼob ku chʼaʼabal teʼ Biblia ich maas tiʼ 1,000 idiomaʼoboʼ. Pero le audiodescripciónoʼoboʼ maʼ táakaʼan ichil le mil idiomaʼoboʼ, chéen baʼaleʼ yaan máaxoʼob aʼalikeʼ le audiodescripciónoʼoboʼ láayliʼ bey junpʼéel idiomaeʼ. Michael Milleneʼ ku yaʼalik: «Le audiodescripciónoʼoboʼ junpʼéel traducción jach utiaʼal le máaxoʼob minaʼan u sáasiloʼoboʼ. Le baʼaxoʼob ku chíikpajal tiʼ junpʼéel videooʼ ku traducirtaʼal utiaʼal u béeytal u yuʼubaʼal».

Jach k-tsʼáaik gracias tiʼ Jéeoba tumen tiʼ tuláakal máak ku tsʼáaik baʼax kʼaʼabéet utiaʼal u muʼukʼaʼantal u fe (Isaías 65:13).