Láas 5 de la mañanaeʼ Femi Durodola yéetel Yana, u yataneʼ, tʼaʼanoʼob tumen juntúul anciano. Yanaeʼ ku yaʼalik baʼax aʼalaʼabtiʼob: «Le ancianooʼ tu yaʼalajtoʼon: ‹Preparartabaʼex tumen le soldadoʼob rusoʼoboʼ tsʼoʼok u káajal u kʼuchloʼob Kiev, pero maʼ a jach sajaktaleʼex›. Teʼ súutuk jeʼeloʼ tin wuʼuyaj jach preoucuparnajen».

Femi yéetel Yanaeʼ maʼ úuch tsʼoʼokok u beeloʼobiʼ. Teʼ kʼiin jeʼeloʼ ka tsʼoʼok u tʼaanoʼob yéetel le ancianooʼ tu listokintubaʼobeʼ ka tu chʼaʼtukloʼob u yukʼikoʼob junpʼíit café. Ka tsʼoʼokeʼ tu xokoʼob u tekstoil le kʼiinoʼ tuʼux ku yaʼalik: «Wa ka pʼáatleʼex tranquiloil yéetel ka weʼeskeʼex a kʼubmaj a wóoleʼex tiʼ teneʼ yaan u yantal a muukʼeʼex» (Isaías 30:15). Ka tsʼoʼok u xakʼaltikoʼob u tekstoil le kʼiinoʼ Femieʼ yéetel u jaajil u yóoleʼ tu beetaj junpʼéel oración tiʼ Jéeoba. Letiʼobeʼ maʼ junpʼéeliliʼ tuʼux síijoʼobiʼ, Femieʼ nigeriail yéetel Yanaeʼ ucraniail. Teʼ kʼiin jeʼeloʼ letiʼobeʼ lukʼoʼob Ucrania utiaʼal u púutsʼloʼob tiʼ le guerraoʼ ka binoʼob kajtal Países Bajos, chéen tu bisoʼob junpʼéel mochila tuʼux yaan le baʼaxoʼob maas kʼaʼabéettiʼoboʼ.

Jeʼex Femi yéetel Yanaeʼ desde ka atacartaʼab Ucrania tumen Rusia tu kʼiinil 24 tiʼ febrero tiʼ 2022, u milesil u testigoʼob Jéeoba táan u púutsʼloʼob. Tu luʼumil Ucraniaeʼ yaan óoliʼ 130,000 Testigoʼobiʼ. Tak teʼ kʼiinaʼ maas tiʼ 36,000 u túulaleʼ tsʼoʼok u pʼatik u yotochoʼob yéetel maas tiʼ 16,000 u túulaleʼ tsʼoʼok u binoʼob kajtal táanxel luʼumil. Letiʼobeʼ anchaj u pʼatik u yotochoʼob, u meyajoʼob bey xan u congregaciónoʼob. Le táan le guerraoʼ aʼalaʼabeʼ le xiiboʼob sijnáaloʼob Ucrania yaantiʼob 18 tak 60 añoseʼ maʼ tun chaʼabil u jóokʼloʼob tiʼ le luʼumiloʼ, chéen baʼaleʼ le xiiboʼob sijnáaloʼob táanxel luʼumiloʼ jeʼel u páajtal u jóokʼloʼobeʼ.

Le máaxoʼob ku púutsʼloʼoboʼ chéen ku biskoʼob le baʼaxoʼob maas kʼaʼabéettiʼoboʼ. Ku viajaroʼob tiʼ trenoʼob bey xan tiʼ autobúsoʼob. Kex maʼ fácil le viajeoʼ, ku beetkoʼob tumen taak u binoʼob kajtal tiʼ junpʼéel lugar maas seguro. Chéen baʼaleʼ yaʼab u téeneleʼ le kéen jóokʼkoʼobeʼ maʼ u yojloʼob jach tuʼux kun kʼuchloʼobiʼ. Kex maʼ u yojloʼob wa yaan u suutoʼob tu yotochoʼobeʼ le fe yaantiʼoboʼ le áantkoʼob utiaʼal u yantaltiʼob u valoril u púutsʼloʼob.

Yanaeʼ ku yaʼalik: «Anchaj k-pʼatik tuláakal baʼax yaantoʼon, chéen t-bisaj jujunpʼéel baʼaxoʼob maas kʼaʼabéettoʼon. Le baʼax úuchoʼ tu kʼaʼajsajtoʼoneʼ le baʼax maas importanteoʼ letiʼe a wantal naatsʼ tiʼ Jéeobaoʼ».

Lilia Antoniukeʼ juntúul u testigo Jéeoba kajaʼan tu kaajil Kiev. Naatsʼ tiʼ u yotocheʼ ku yuʼubaʼal bix u juum le bombaʼob ku wáakʼloʼoboʼ. Tsʼoʼoleʼ teʼ calleʼoboʼ chéen ku yilaʼal le cocheʼob láaj eeloʼoboʼ bey xan le edificioʼob yéetel le puenteʼob juutoʼoboʼ.

Lilia yéetel Olexandra, u hija yaan 17 años tiʼeʼ, tu chʼaʼtukloʼob u lukʼloʼob Ucrania. Viajarnajoʼob tiʼ tren, pero como jach yaʼab máakoʼob taak u púutsʼloʼobeʼ yaʼab kʼiinoʼob tu bisajtiʼob utiaʼal u kʼuchloʼob Polonia. Le ka lukʼoʼob Ucraniaeʼ maʼ yaʼab janal yaantiʼob kaʼachiʼ yéetel yaʼab horaʼob anchaj u pʼáatloʼob waʼatalil tumen minaʼan tuʼux u kutaloʼob. Chéen baʼaleʼ le ka kʼuchoʼob Polonia tu kaajil Przemysleʼ jach kiʼimakchaj u yóoloʼob.

Liliaeʼ ku yaʼalik: «Le ka t-ilaj le sukuʼunoʼob u machmoʼob le carteloʼob ku yaʼalik JW, jach kiʼimakchaj k-óol tumen t-uʼuyaj maʼ t-juunal yanoʼoniʼ». Le sukuʼunoʼoboʼ tu bisoʼob Lilia yéetel Olexandra tiʼ junpʼéel salón utiaʼal u kʼíintkubaʼob, u janaloʼob yéetel utiaʼal u chan jeʼeleloʼob. Ka tsʼoʼokeʼ bisaʼaboʼob utiaʼal u kʼubéentubaʼob tu yotoch le sukuʼunoʼoboʼ.

Lilia yéetel u maamaeʼ maʼ pʼáatoʼob Poloniaiʼ, baʼaxeʼ binoʼob tak Alemania. Liliaeʼ ku seguer u yaʼalik: «T-uʼuyaj bix u kanáantkoʼon Jéeoba, leloʼ jach tu muʼukʼaʼankúuntaj k-fe. Jach kin tsʼáaik u graciasil tiʼ Jéeoba tumen mantatsʼ ku yeʼesiktoʼon yaabilaj. Tsʼoʼoleʼ yaan xan sukuʼunoʼob ku yáantkoʼonoʼob teʼ súutukiloʼob maas kʼaʼabéetoʼ».

Anastasia Kovaliovaeʼ tu yaʼaleʼ tu yilaj bix wáakʼik le bombaʼob lúub tu kaajil Zaporozhieoʼ. Letiʼeʼ ku yaʼalikeʼ u sobrino de siete años yéetel u chan sobrina de tres añoseʼ jach ku jaʼakʼal u yóoloʼob kaʼach le kéen u yuʼuboʼob u wáakʼal le bombaʼoboʼ yéetel káaj u afectartaʼaloʼob, le oʼolal tu chʼaʼtukloʼob u púutsʼloʼob. Anastasiaeʼ ku seguer u yaʼalik: «Maʼ páajchaj k-bisik yaʼab nookʼiʼ mix uláakʼ baʼaloʼob, le oʼolal yaʼab baʼaloʼob ku bineltiktoʼon kaʼachi. Chéen baʼaleʼ le sukuʼunoʼoboʼ tu tsʼáajoʼobtoʼon tuláakal le baʼaxoʼob kʼaʼabéettoʼonoʼ, mix baʼal tu bineltajtoʼon». Anastasia, u sobrinoʼob yéetel Anya, u cuñadaeʼ, kʼuchoʼob Polonia ka tsʼoʼokeʼ binoʼob Alemania.

Anastasia Shchukina yéetel kiik Olha Lisenko, u maamaeʼ, cada ken u yuʼuboʼob u juum le alarmaʼob ku avisar de ke yaan bombaʼob kun pulbileʼ kex yaan u muʼyajtikoʼob keʼeleʼ ku bin u taʼakubaʼob tu sótanoil u yotochoʼob. Letiʼobeʼ precursoraʼob yéetel binoʼob áantaj tu kaajil Brailiv (Vínnytsia), tumen kʼaʼabéet kʼaʼaytajoʼobiʼ. Maʼ fácil tu yililoʼob u chʼaʼtuklikoʼob u binoʼob kajtal táanxel tuʼuxiʼ pero le ka tu yiloʼob táan u peortal le baʼax ku yúuchloʼ anchaj u púutsʼloʼob. Le ka púutsʼoʼobeʼ tu chʼaʼajoʼob chéen le baʼaxoʼob maas kʼaʼabéettiʼoboʼ, yéetel kaʼapʼéel kʼiinoʼob viajarnajoʼob tiʼ tren. Mientras táan u viajaroʼobeʼ maʼ páajchaj mix u weenloʼobiʼ. Kiik Olhaeʼ 58 años yaantiʼ tsʼoʼoleʼ kʼojaʼan, le oʼolal maʼ fácil úuchik u púutsʼuliʼ. Kʼuchoʼob Rzeszów láas 2 de la mañana. Jach kiʼimakchaj u yóoloʼob tumen táan u páaʼtaʼaloʼob tumen le sukuʼunoʼoboʼ, tsʼoʼoleʼ kʼaʼamoʼob yéetel yaabilaj. Anastasiaeʼ ku yaʼalik: «Kex maas tiʼ chúumuk áakʼab le ka kʼuchoʼonoʼ táan k-páaʼtaʼal kaʼach tumen le sukuʼunoʼoboʼ. Jach k-tsʼáaik u graciasil tiʼ letiʼob bey xan tiʼ Jéeoba yoʼolal le yaabilaj eʼesaʼabtoʼonoʼ».

Tu kaajil Sumieʼ kajaʼan Andréi Chyba, juntúul sukuʼun síij Polonia yéetel Elizabeth, u yatan, letiʼeʼ síij Gran Bretaña. Utiaʼal u kanáantkubaʼobeʼ letiʼob bey xan uláakʼ cinco u túulal sukuʼunoʼobeʼ ku taʼakikubaʼob tu sótanoil u yotoch juntúul sukuʼun. Le u taʼakmubaʼoboʼ tu yuʼuboʼob bix u máan le aviónoʼoboʼ, bix u wáakʼal le bombaʼoboʼ bey xan bix u tsʼoʼontsʼonkuba le máakoʼoboʼ. Utiaʼal túun u líikʼil u yóoloʼobeʼ tu chaʼantoʼob le drama ku kʼaabaʼtik: ‹Jéeoba, in kʼubmaj in wóol tiʼ teech›. Le videoaʼ ku yeʼesik baʼax tu beetaj Ezequías le ka atacartaʼab Jerusalén tumen le asirioʼoboʼ.

Andréi yéetel Elizabetheʼ beoraeʼ tiaʼanoʼob Poloniaeʼ. Andréieʼ ku yaʼalik: «Le sukuʼunoʼoboʼ utiaʼal u líiʼskoʼob k-óoleʼ yaʼab tekstoʼob tiʼ le Biblia tsʼoʼok u túuxkoʼob tiʼ toʼonoʼ. Yanoʼobeʼ tu yaʼaloʼobtoʼon ka k-xok le Salmo capítulo 27».

Yaʼab sukuʼunoʼobeʼ tsʼoʼok u kʼaʼabéettal ‹u pʼatkoʼob tuláakal le baʼaloʼob yaantiʼoboʼ›, pero mientras u kʼuchul u kʼiinil u pʼáatal minaʼan guerraʼobeʼ k-ojleʼ yaan u seguer u kanáantaʼaloʼob yéetel u bendecirtaʼaloʼob tumen Jéeoba (Filipenses 3:8).