Tu kʼiinil 1 tiʼ septiembre tiʼ 2024, le sukuʼun Massimiliano Bricconi, táakaʼan ichil u Comitéil u Sucursalil Italiaeʼ tu presentartaj le Biblia U Suttʼaanil Túumben Luʼum tu chúukaʼanil ich lengua de señas Italiana. Le Bibliaaʼ presentartaʼab teʼ asamblea regional 2024 «¡Tsʼáaʼex ojéeltbil le maʼalob noticiaʼoboʼ!», le asambleaaʼ beetaʼab teʼ Najil Asamblea yaan tu kaajil Romaoʼ (Italia). Le asistenciaoʼ tu chukaj 854, le máaxoʼob binoʼob teʼ asambleaoʼ páajchaj u descargarkoʼob tu séebaʼanil le Biblia teʼ sitio jw.org bey xan teʼ aplicación JW Library Sign Language.

Le Bibliaaʼ letiʼe yáax traducirtaʼab tu chúukaʼanil ich lengua de señas italianaoʼ. U testigoʼob Jéeobaeʼ desde tu añoil 1998 ka káaj u traducirkoʼob publicaciónoʼob teʼ idiomaaʼ. Teʼ kʼiinoʼobaʼ tu luʼumil Italiaeʼ yaan 845 u túulal u testigoʼob Jéeoba ku serviroʼob tiʼ 15 congregaciónoʼob, 12 grupoʼob yéetel 10 pregrupoʼob ich lengua de señas italiana.

Tu kʼiinil 6 tiʼ septiembre tiʼ 2024, le sukuʼun Frederick Nyende, táakaʼan ichil u Comitéil u Sucursalil Ugandaeʼ tu presentartaj u libroil Mateo, Marcos, Lucas yéetel Juan ichil le idioma toorooʼ. Presentartaʼab teʼ asamblea regional «¡Tsʼáaʼex ojéeltbil le maʼalob noticiaʼoboʼ!», beetaʼab tu kaajil Hoima (Uganda). Le asistenciaoʼ tu chukaj 928 u túulal yéetel tuláakloʼob tu kʼamoʼob Le Bibliao’: U Evangelioil Mateo. Tsoʼoleʼ le máaxoʼob binoʼob teʼ asambleaoʼ páajchaj u descargarkoʼob tu séebaʼanil le Biblia teʼ sitio jw.org yéetel teʼ aplicación JW Library

Ku tuklaʼaleʼ yaan maas tiʼ 2 millones máakoʼob tʼanik tooro yéetel ñoro tu luʼumil Uganda. Yaʼab tiʼ le Bibliaʼob traducirtaʼan ichil le idiomaʼobaʼ maʼatech u taaskoʼob u kʼaabaʼ Dios. Teʼ kʼiinoʼobaʼ yaan 374 u túulal u testigoʼob Jéeoba ku serviroʼob tiʼ kaʼapʼéel congregaciónoʼob ichil le idioma tooro yéetel cuatro ichil le idioma ñorooʼ. Le sukuʼunoʼoboʼ jach kiʼimak u yóoloʼob yoʼolal le Bibliaaʼ tumen yaan u páajtal u meyajtiʼob teʼ predicaciónoʼ yéetel teʼ reuniónoʼoboʼ.

Tu kʼiinil 8 tiʼ septiembre tiʼ 2024, presentartaʼab u libroil Mateo ichil le idioma uiguroʼ (alfabeto árabe yéetel cirílico). Presentartaʼab tiʼ junpʼéel reunión especial beetaʼab tu sucursalil Kazajistán, tu kaajil Almaty. Le asistenciaoʼ tu chukaj 483 u túulal. U libroil Mateoeʼ páajchaj u descargartaʼal tu séebaʼanil teʼ sitio jw.org yéetel teʼ aplicación JW Library.

Yaʼab tiʼ le Bibliaʼob ichil le idioma uiguroʼ jach úuchbentak yéetel difícil u naʼataʼal baʼax ku yaʼalik. Le idiomaaʼ ku tʼaʼanal tumen kex 11 millones máakoʼob yéetel u maas yaʼabileʼ tiʼ kajaʼanoʼob Asiaeʼ, pero yanoʼob xaneʼ kajaʼanoʼob tu luʼumiloʼob África, Europa yéetel Norteamérica.

Tu kʼiinil 13 tiʼ septiembre tiʼ 2024, le sukuʼun Moses Oundooʼ, takaʼan ichil u Comitéil u Sucursalil Ugandaeʼ tu presentartaj u libroil Mateo, Marcos, Lucas yéetel Juan ichil le idioma konjooʼ. Lelaʼ presentartaʼab teʼ asamblea regional 2024 «¡Tsʼáaʼex ojéeltbil le maʼalob noticiaʼoboʼ!», beetaʼab tu kaajil Bwera (Uganda). Le asistenciaoʼ tu chukaj 925 yéetel tuláakloʼobeʼ tu kʼamoʼob Le Bibliaoʼ: U Evangelioil Mateo. Tsʼoʼoleʼ páajchaj u descargartal tu séebaʼanil teʼ sitio jw.org yéetel teʼ aplicación JW Library.

Tu luʼumil Ugandaeʼ kex junpʼéel millón máakoʼob tʼanik le idioma konjooʼ. U testigoʼob Jéeobaeʼ káaj u traducirkoʼob le publicaciónoʼob desde tu añoil 2001. Teʼ kʼiinoʼobaʼ yaan 324 u túulal u testigoʼob Jéeobaiʼ, ku serviroʼob tiʼ seis congregaciónoʼob ichil le idioma konjo tu luʼumil Ugandaoʼ.

Tu kʼiinil 15 tiʼ septiembre tiʼ 2024, le sukuʼun Jethro Barclay, takaʼan ichil u Comitéil u Sucursalil Liberiaeʼ tu presentartaj u libroil Mateo yéetel Marcos ichil le idioma inglés de Liberiaoʼ. Lelaʼ presentartaʼab tiʼ junpʼéel reunión especial beetaʼab teʼ Najil Asamblea yaan Johnsonvilleoʼ (Liberia). Le asistenciaoʼ tu chukaj 1,176 máakoʼob. Tsʼoʼoleʼ tuláakal le congregaciónoʼob ichil le idiomaaʼ páajchaj u conectarkubaʼob tiʼ videoconferencia. Le kaʼapʼéel libroʼobaʼ páajchaj u descargartal tu séeblakil ich formato digital yéetel ich audio desde jw.org yéetel JW Library. Maʼ kun xáantaleʼ yaan u imprimirtaʼal Le Bibliaoʼ: U Evangelioil Mateo

Tu luʼumil Liberiaeʼ inglés ku tʼaʼanliʼ. Chéen baʼaleʼ ku tuklaʼaleʼ maas tiʼ junpʼéel millon máakoʼobeʼ ku tʼankoʼob inglés de Liberia. Ichil lelaʼ takaʼan 7,034 sukuʼunoʼobiʼ yéetel tiʼ ku serviroʼob tiʼ 120 congreciónoʼobeʼ. Yaan jujunpʼéel u traduccióniloʼob le Biblia ichil le idiomaaʼ pero chéen ich audio yaan. Lelaʼ letiʼe u yáax traducciónil le Biblia kun imprimirtbiloʼ.

Tu kʼiinil 20 tiʼ septiembre tiʼ 2024, le sukuʼun Lázaro González, takaʼan ichil u Comitéil u Sucursalil Centroaméricaeʼ tu presentartaj u libroil Mateo, Marcos, Lucas yéetel Juan ichil le idioma Náhuatl de Guerrerooʼ. Presentartaʼab tu yáax kʼiinil le asamblea regional «¡Tsʼáaʼex ojéeltbil le maʼalob noticiaʼoboʼ!», beetaʼab teʼ Najil Asamblea yaan Chilpancingo, Guerrero (México). Le asistenciaoʼ tu chukaj 769 máakoʼob. Yéetel páajchaj xan u conectarkuba 742 sukuʼunoʼob desde tiʼ uláakʼ asamblea regional beetaʼab tu kaajil Tlapa de Comonfort. Tuláakloʼobeʼ tu kʼamoʼob Le Bibliaoʼ: U Evangelioil Mateo. Tsʼoʼoleʼ páajchaj u descargartaʼal tu séebaʼanil teʼ sitio jw.org yéetel teʼ aplicación JW Library.

Tu luʼumil Méxicoeʼ kex 250,000 máakoʼob tʼanik Náhuatl de Guerrero. Le yáax congregaciónoʼ yanchaj tu añoil 1987. Teʼ kʼiinoʼobaʼ tiʼ tuláakal u luʼumil Méxicoeʼ yaan 1,216 sukuʼunoʼob ku serviroʼob tiʼ 37 congregaciónoʼob yéetel kaʼapʼéel grupoʼob.